কেগৰ শেহতীয়া ২০২৪-২৫ বৰ্ষৰ লেখাপৰীক্ষা প্ৰতিবেদনত অসম চৰকাৰৰ এক গুৰুতৰ বিত্তীয় বিশৃংখলতা পোহৰলৈ আহিছে। প্ৰতিবেদনখনত উল্লেখ কৰা অনুসৰি, ৰাজ্য চৰকাৰে বিধানসভাৰ কোনো পূৰ্বৱৰ্তী অনুমোদন নোহোৱাকৈয়ে ১৩ টা ভিন্ন ক্ষেত্ৰত মুঠ ৫০৯.৫৯ কোটি টকা ব্যয় কৰিছে। এই কাৰ্যই সংবিধানৰ ২০৪ নং অনুচ্ছেদক পোনপটীয়াকৈ উলংঘা কৰাৰ লগতে চৰকাৰী পুঁজিৰ পৰিচালনাৰ ক্ষেত্ৰত থকা চৰকাৰৰ চৰম গাফিলতিক উদঙাই দিছে।
আইন অনুসৰি, ৰাজহুৱা ধন ব্যয় কৰাৰ পূৰ্বে চৰকাৰে বিধানসভাৰ অনুমোদন লোৱাটো বাধ্যতামূলক। কিন্তু কেগৰ প্ৰতিবেদনত স্পষ্টকৈ কোৱা হৈছে যে ৰাজহুৱা ঋণ আৰু ঋণৰ পৰিশোধ শিতানত ব্যয় কৰা এই বৃহৎ পৰিমাণৰ ধনৰ বাবে মূল বাজেটত কোনো ব্যৱস্থা নৰখাৰ লগতে পৰিপূৰক অনুমোদন বা পুনৰ-বিনিয়োজনৰ (re-appropriation) কোনো নিৰ্দেশনাও জাৰি কৰা হোৱা নাছিল। এই সন্দৰ্ভত কেগে তীব্ৰ উদ্বেগ প্ৰকাশ কৰি প্ৰতিবেদনত উল্লেখ কৰিছে যে বাজেটৰ অনুমোদন অবিহনে কৰা এনে ব্যয় কেৱল বিত্তীয় নিয়মৰ উলংঘাই নহয়, ই বিধানসভাৰ সদিচ্ছাৰো পৰিপন্থী। চৰকাৰী বিভাগসমূহত বিত্তীয় শৃংখলা ঘূৰাই অনাৰ জৰুৰী প্ৰয়োজনীয়তাৰ ওপৰতো প্ৰতিবেদনখনত গুৰুত্ব আৰোপ কৰা হৈছে।
ইয়াৰ উপৰিও, চৰকাৰৰ জবাবদিহিতাৰ ক্ষেত্ৰত থকা দুৰ্বলতাসমূহো এই প্ৰতিবেদনৰ জৰিয়তে পোহৰলৈ আহিছে। ২০২৫ চনৰ ৩১ মাৰ্চলৈকে ৰাজ্য চৰকাৰৰ বিভিন্ন বিভাগৰ মুঠ ২৩,২৪০.৫৬ কোটি টকাৰ ৬,৯২৯ খন ব্যৱহাৰিক প্ৰমাণপত্ৰ (Utilisation Certificates) কেগৰ কাৰ্যালয়ত জমা নিদিয়াকৈ পৰি আছে। এই প্ৰমাণপত্ৰসমূহৰ অবিহনে আৱণ্টিত পুঁজি প্ৰকৃত উদ্দেশ্যত ব্যৱহাৰ কৰা হৈছে নে নাই সেয়া নিৰ্ধাৰণ কৰাটো অসম্ভৱ বুলি কেগে পৰ্যবেক্ষণ কৰিছে। আটাইতকৈ উদ্বেগজনক কথাটো হ’ল, এই অনাদায় প্ৰমাণপত্ৰসমূহৰ ভিতৰত কেৱল বিত্ত বিভাগৰেই সৰ্বাধিক ৪,০৬৭.০৬ কোটি টকাৰ হিচাপ দাখিল কৰিবলৈ বাকী আছে।
বিত্তীয় নিয়ন্ত্ৰণৰ দুৰ্বলতাৰ আন এক দিশ উন্মোচন কৰি প্ৰতিবেদনত উল্লেখ কৰা হৈছে যে ৰাজহুৱা ৰাজকোষৰ পৰা উপযুক্ত নথিপত্ৰ অবিহনে উলিওৱা ৭৫৩.৬১ কোটি টকাৰ মুঠ ১,২২২ খন ‘এবষ্ট্ৰেক্ট কণ্টিনজেণ্ট’ (Abstract Contingent) বিল একে তাৰিখলৈকে ‘ডিটেইলড কাউণ্টাৰচাইনড কণ্টিনজেণ্ট’ বিললৈ ৰূপান্তৰ কৰিবলৈ বাকী আছে। ইয়াৰ সমান্তৰালভাৱে, ২০২৪-২৫ বৰ্ষত এটা অনুদানৰ অধীনত হোৱা ৬০৪.৪০ কোটি টকাৰ অতিৰিক্ত ব্যয় সংবিধানৰ ২০৫ নং অনুচ্ছেদৰ অধীনত ৰাজ্যিক বিধানসভাৰ দ্বাৰা নিয়মীয়া কৰাটো প্ৰয়োজনীয় বুলি কোৱা হৈছে। তাৎপৰ্যপূৰ্ণভাৱে, ২০০৬-০৭ বৰ্ষৰ পৰা ২০২৩-২৪ বৰ্ষলৈকে হোৱা ১১,৭৯৫.৬৯ কোটি টকাৰ বিশাল অতিৰিক্ত ব্যয়ৰ হিচাপ বিগত প্ৰায় দুটা দশক ধৰি অনিয়মীয়া হৈয়ে আছে। সামগ্ৰিকভাৱে, মহাহেচাপ পৰীক্ষকৰ এই প্ৰতিবেদনে অসম চৰকাৰৰ বিত্তীয় ব্যৱস্থাপনাৰ এক বিশৃংখল ছবি দাঙি ধৰিছে। এই গুৰুতৰ বিত্তীয় বিসংগতিসমূহৰ ওপৰত আলোচনা আৰু উপযুক্ত পৰামৰ্শৰ বাবে কেগে সমগ্ৰ বিষয়টো এতিয়া ৰাজ্যৰ লোক হিচাপ সমিতিৰ মজিয়াত দাখিল কৰিছে। পৰৱৰ্তী সময়ত লোক হিচাপ সমিতিয়ে এই সন্দৰ্ভত কি ব্যৱস্থা গ্ৰহণ কৰে সেয়াহে লক্ষণীয় হ’ব।
