অসম বিধানসভা নিৰ্বাচনৰ মনোনয়ন পত্ৰ দাখিল পৰ্ব সামৰণি পৰাৰ পাছত ৰাজ্যজুৰি মনোনয়ন পত্ৰসমূহৰ পৰীক্ষণ প্ৰক্ৰিয়া সম্পন্ন হৈছে। নিৰ্বাচন আয়োগৰ শেহতীয়া তথ্য অনুসৰি, সমগ্ৰ ৰাজ্যত দাখিল হোৱা প্ৰাৰ্থীসকলৰ মনোনয়ন পত্ৰসমূহৰ ভিতৰত ৭৭৬ গৰাকী প্ৰাৰ্থীৰ মনোনয়ন বৈধ বুলি বিবেচিত হৈছে। আনহাতে, নিৰ্দিষ্ট কিছু কাৰিকৰী কাৰণবশতঃ দুখন বিধানসভা আসনৰ মনোনয়ন পত্ৰ পৰীক্ষণ প্ৰক্ৰিয়া সাময়িকভাৱে স্থগিত ৰখা হৈছে, যিয়ে উক্ত সমষ্টি দুটাত ৰাজনৈতিক উৎকণ্ঠা বৃদ্ধি কৰিছে।
ৰাজ্যৰ ১২৬টা বিধানসভা সমষ্টিৰ বাবে আগন্তুক নিৰ্বাচনক লৈ ৰাজনৈতিক তৎপৰতা চলি থকাৰ সময়তে নিৰ্বাচন আয়োগে প্ৰাৰ্থীসকলৰ নথিপত্ৰসমূহ কঠোৰভাৱে পৰীক্ষা কৰে। প্ৰাথমিক পৰ্যায়ত ৮১৮ গৰাকী প্ৰাৰ্থীয়ে মনোনয়ন দাখিল কৰিছিল যদিও নথিপত্ৰৰ বিসংগতি, অসম্পূৰ্ণ তথ্য আৰু অন্যান্য কাৰিকৰী ত্ৰুটিৰ বাবে কেইবাগৰাকীও প্ৰাৰ্থীৰ মনোনয়ন বাতিল কৰা হয়। পৰীক্ষণৰ অন্তত ৭৭৬ গৰাকী প্ৰাৰ্থীৰ প্ৰাৰ্থিত্ব বাহাল থকাত এতিয়া ৰাজ্যত নিৰ্বাচনী যুঁজৰ মূল ছবিখন ক্ৰমাৎ স্পষ্ট হৈ পৰিছে। অৱশ্যে যি দুখন আসনৰ পৰীক্ষণ স্থগিত ৰখা হৈছে, সেই সন্দৰ্ভত নিৰ্বাচন আয়োগে পৰিস্থিতি পৰ্যালোচনা কৰি অতি সোনকালেই চূড়ান্ত সিদ্ধান্ত গ্ৰহণ কৰিব বুলি বিভাগীয় সূত্ৰই জানিবলৈ দিছে।
মনোনয়ন পত্ৰ পৰীক্ষণ প্ৰক্ৰিয়া প্ৰায় সমাপ্ত হোৱাৰ লগে লগে এতিয়া প্ৰাৰ্থীসকলৰ বাবে মনোনয়ন প্ৰত্যাহাৰৰ সময়সীমা নিৰ্ধাৰণ কৰা হৈছে। নিৰ্বাচন আয়োগৰ পূৰ্বনিৰ্ধাৰিত সূচী অনুসৰি, অহা ২৬ মাৰ্চলৈকে প্ৰাৰ্থীসকলে ইচ্ছা কৰিলে নিজৰ মনোনয়ন প্ৰত্যাহাৰ কৰিব পাৰিব। এই প্ৰক্ৰিয়া সম্পূৰ্ণ হোৱাৰ পাছতহে প্ৰতিটো সমষ্টিত কিমানগৰাকী প্ৰাৰ্থীয়ে চূড়ান্তভাৱে প্ৰতিদ্বন্দ্বিতা কৰিব, সেয়া নিশ্চিত হ‘ব। ইপিনে, অহা ৯ এপ্ৰিলত এটা পৰ্যায়তে অনুষ্ঠিত হ‘বলগীয়া এই নিৰ্বাচন স্বচ্ছ আৰু নিকাভাৱে সম্পন্ন কৰিবলৈ নিৰ্বাচন আয়োগে সকলো প্ৰস্তুতি সম্পূৰ্ণ কৰি তুলিছে। ৰাজ্যজুৰি কটকটীয়া নিৰাপত্তা ব্যৱস্থা গঢ়ি তোলাৰ সমান্তৰালকৈ ভোটাৰ ৰাইজক নিৰ্ভয়ে আৰু ব্যাপক হাৰত ভোটদান কৰিবলৈ আয়োগে আহ্বান জনাইছে। আগন্তুক ৪ মে‘ত ভোটগণনা সম্পন্ন হ‘ব আৰু ইয়াৰ জৰিয়তেই পৰৱৰ্তী চৰকাৰৰ ৰূপৰেখা নিৰ্ধাৰিত হ‘ব।
