উদ্ধতালিৰ চৰম সীমা হয়তো অতিক্ৰম কৰিছে অসমৰ মুখ্যমন্ত্ৰী ড০ হিমন্ত বিশ্ব শৰ্মাই। এইবাৰ চৰম উদ্ধতালিৰে আদালতৰ জাননীকো উপেক্ষা কৰিছে মুখ্যমন্ত্ৰী ড০ শৰ্মাই। ঘৃণা আৰু মানহানিকৰ মন্তব্য কৰি আদালতৰ ৰোষত পৰিছে মুখ্যমন্ত্ৰী ড০ শৰ্মা। উত্তৰাখণ্ডত নিৰ্বাচনী প্ৰচাৰ কৰিবলৈ গৈ দেশবাসীৰ আগত অসমৰ মান সন্মান পানী কৰি আহিছিল মুখ্যমন্ত্ৰী ড০ শৰ্মাই। মুখ্যমন্ত্ৰী শৰ্মাই ভোটৰ লালসাত কেৱল ৰাহুল গান্ধী আৰু ছোনিয়া গান্ধীকে নহয় অপমান কৰিছিল প্ৰয়াত প্ৰধানমন্ত্ৰী ৰাজীৱ গান্ধীকো। ইমানেই অপমানজনক মন্তব্য কৰিছিল যে যি মন্তব্য সভ্য আৰু শিক্ষিত মানুহৰ বাবে কল্পনাৰো অগোচৰ আছিল ।
২০২২ চনৰ ১১ ফেব্ৰুৱাৰীত উধম সিং নগৰ জিলাৰ কিছা চহৰত ৰাজহুৱা সভাত মুখ্যমন্ত্ৰী ড০ শৰ্মাই অতি তীৰ্যকভাৱে প্ৰয়াত প্ৰধানমন্ত্ৰী ৰাজীৱ গান্ধীৰ নাম উল্লেখ কৰি ৰাহুল গান্ধীৰ পিতৃ পৰিচয়ক লৈ প্ৰশ্ন কৰিছিল। এজন প্ৰয়াত প্ৰধানমন্ত্ৰীকো অপমানজনক মন্তব্য কৰি দেশবাসীৰ আগত সৰলমনা অসমীয়াৰ মান সন্মান ধূলিসাৎ কৰিছিল ড০ শৰ্মাই ।
মুখ্যমন্ত্ৰী হিমন্ত বিশ্ব শৰ্মাৰ চূড়ান্ত অপমানজনক আৰু মানহানিকৰ মন্তব্যৰ বিৰুদ্ধে আদালতৰ দ্বাৰস্থ হৈছিল উত্তৰাখণ্ডৰ কংগ্ৰেছৰ মুখপাত্ৰ গণেশ উপাধ্যায়ে। গণেশ উপাধ্যায়ে দাখিল কৰা এজাহাৰত অভিযোগ কৰিছিল যে “২০২২ চনৰ ১১ ফেব্ৰুৱাৰীত উধম সিং নগৰ জিলাৰ কিছা চহৰত ৰাজহুৱা সভাত মুখ্যমন্ত্ৰী শৰ্মাই ৰাহুল গান্ধীৰ বংশক লৈ প্ৰশ্ন উত্থাপন কৰিছিল আৰু ছোনিয়া গান্ধীৰ বিৰুদ্ধে মানহানিকাৰক মন্তব্য কৰিছিল। উপাধ্যায়ৰ মতে এই মন্তব্যবোৰ অতি অপমান আৰু মানহানিকাৰক আৰু আই টি আইন বিৰুদ্ধ।
এই গোচৰ শুনানি গ্ৰহণ কৰি উত্তৰাখণ্ডৰ উধম সিং নগৰ জিলা আৰু সত্ৰ আদালতে চমন জাৰি কৰিছে। আদালতৰ অতিৰিক্ত চেচন ন্যায়াধীশৰ আদালতে চমন জাৰি কৰি মুখ্যমন্ত্ৰী শৰ্মাক “অভিযোগৰ উত্তৰ দিবলৈ ২১ ছেপ্টেম্বৰত আদালতত হাজিৰ হ’বলৈ নিৰ্দেশ দিয়ে। অৰ্থাৎ আদালতৰ নিৰ্দেশ মৰ্মে আজি মুখ্যমন্ত্ৰী হিমন্ত বিশ্ব শৰ্মাই আদালত উপস্থিত হব লাগিছিল।
কিন্তু আদালতত উপস্থিত নহ’ল মুখ্যমন্ত্ৰী হিমন্ত বিশ্ব শৰ্মা। এদিন পূৰ্বে মধ্যপ্ৰদেশত দিলেগৈ চৰম ঘৃণা আৰু উচতনিমূলক ভাষণ। কমল নাথক ১০ জনপথ জ্বলাই দিয়াৰ আহ্বানেৰে দিলে হিংসাৰ উচতনি।
উল্লেখ্য যে পত্নীৰ ভূমি কেলেংকাৰী আৰু পত্নীৰ প্ৰতিষ্ঠানে ১০ কোটি টকা ৰাজসাহায্য লাভে মুখ্যমন্ত্ৰী হিমন্ত বিশ্বক শলঠেকত পেলাইছে। ৰাষ্ট্ৰীয় পৰ্যায়টো মুখ্যমন্ত্ৰী হিমন্ত বিশ্ব শৰ্মাৰ পত্নীৰ কেলেংকাৰীয়ে চাঞ্চল্যৰ সৃষ্টি কৰিছে, যিয়ে সৰ্বভাৰতীয় স্তৰতো হিমন্ত বিশ্ব শৰ্মাৰ অৱশিষ্ট ভাৱমূৰ্তিক ধূলিসাৎ কৰিলে। এনে এক দুৰ্যোগপূৰ্ণ সময়তে ভূতৰ ওপৰত দানহ পৰাৰ দৰে উত্তৰাখণ্ডৰ এখন জিলা আদালতৰ চমন জাৰীয়ে হিমন্ত বিশ্ব শৰ্মাক মোক্ষম আঘাত দিলে। ইয়াৰ পৰা উপশম লাভ আৰু হিন্দুত্ববাদী মহলৰ গুড বুকত পুনৰ নাম লিখাবলৈ হিমন্তই আদালতৰ চমনক উপেক্ষা কৰি ঘৃণা আৰু হিংসা বিয়পোৱাৰ দায়িত্ব পালন কৰিছে। আৰু আদালতক চৰম উপেক্ষা কৰি হিমন্ত বিশ্ব শৰ্মাই আজি আদালত উপস্থিত নাথাকিল।
