ৰাজ্যৰ নিৰ্বাচনী পৰিৱেশ ক্ৰমান্বয়ে উত্তপ্ত হৈ পৰাৰ সময়তে অসমৰ মুখ্যমন্ত্ৰী ড° হিমন্ত বিশ্ব শৰ্মা আৰু তেওঁৰ পত্নী ৰিণিকি ভূঞা শৰ্মাৰ বিৰুদ্ধে এক গুৰুতৰ তথা বিস্ফোৰক অভিযোগ উত্থাপন কৰিছে বিৰোধী দল কংগ্ৰেছে। দেওবাৰে কংগ্ৰেছৰ জ্যেষ্ঠ নেতা পৱন খেৰাই এখন সংবাদ মেল সম্বোধন কৰি দাবী কৰে যে মুখ্যমন্ত্ৰীৰ পৰিয়ালে অসমৰ সম্পদ লুণ্ঠন কৰি আমেৰিকা যুক্তৰাষ্ট্ৰ আৰু ডুবাইত হাজাৰ হাজাৰ কোটি টকাৰ এক বৃহৎ ব্যৱসায়িক সাম্ৰাজ্য গঢ়ি তুলিছে। নিৰ্বাচনী শপতনামাত এই বিশাল সম্পত্তিৰ তথ্য লুকুৱাই ৰখাৰ গুৰুতৰ অভিযোগ উত্থাপন কৰি কংগ্ৰেছ নেতাজনে এই কাৰ্যক ৰাজ্যবাসীৰ প্ৰতি চৰম প্ৰতাৰণা বুলি অভিহিত কৰিছে।
পৱন খেৰাই সংবাদ মেলত দাঙি ধৰা ২০২২ চনৰ ৮ আগষ্টৰ এক ‘টাইটেল ডিড’ৰ তথ্য অনুসৰি, ডুবাইৰ অতি অভিজাত এলেকা ‘আলবৰ্শা চাউথ ফোৰ্থ’ত মুখ্যমন্ত্ৰীৰ পত্নী ৰিণিকি ভূঞা শৰ্মাৰ নামত দুটাকৈ বিলাসী সম্পত্তি আছে। ইয়াৰে এটা বিলাসী ফ্লেট আৰু আনটো এখন হোটেলৰ কোঠা বুলি উল্লেখ কৰা হৈছে। কংগ্ৰেছৰ অভিযোগ অনুসৰি, আটাইতকৈ উদ্বেগজনক দিশটো হ’ল নিৰ্বাচনী আইন উলংঘা কৰি মুখ্যমন্ত্ৰী ড° শৰ্মাই নিজৰ শপতনামাত পত্নীৰ নামত থকা এই বিদেশী সম্পত্তিৰ কথা সম্পূৰ্ণৰূপে গোপন কৰি ৰাখিছে। যিগৰাকী ব্যক্তিয়ে শপতনামাত তথ্য লুকুৱাই ৰাখে, তেওঁ মুখ্যমন্ত্ৰীৰ দৰে গুৰুত্বপূৰ্ণ পদবীত থকাৰ নৈতিক অধিকাৰ হেৰুৱাই পেলায় বুলি খেৰাই দাবী কৰে।
কেৱল ডুবাইতেই নহয়, আমেৰিকাৰ ৱাইমিঙতো মুখ্যমন্ত্ৰীৰ পৰিয়ালে ‘ৰিণিকি ভূঞা শৰ্মা এছেট কালেক্টিভ এল.এল.চি’ নামৰ এটা কোম্পানী স্থাপন কৰাৰ তথ্য পোহৰলৈ অহা বুলি বিৰোধীয়ে প্ৰকাশ কৰিছে। কোম্পানীটোৰ বাৰ্ষিক বৈঠকৰ কাৰ্যবিৱৰণীৰ উদ্ধৃতি দি কংগ্ৰেছ নেতাজনে দাবী কৰে যে এই প্ৰতিষ্ঠানটোৰ বাজেট প্ৰায় ৩,৪৭৬ কোটি আমেৰিকান ডলাৰ। আটাইতকৈ বিস্ফোৰক অভিযোগটো হ’ল, মুখ্যমন্ত্ৰী, তেওঁৰ পত্নী আৰু পুত্ৰ নন্দিল শৰ্মাৰ অংশীদাৰিত্ব থকা এই ব্যৱসায়িক সাম্ৰাজ্যৰ পৰা ৫২,০০০ কোটি টকা তেওঁলোকে নিজৰ মাজত ভগাই লোৱাৰ প্ৰস্তাৱ গ্ৰহণ কৰিছে। ইয়াৰ উপৰিও কোম্পানীটোৰ পৰা ৫,৬৬৭ কোটি টকাৰ ওপৰঞ্চি ধন সংগ্ৰহৰ লক্ষ্য স্থিৰ কৰা হৈছে। টেক্স ফাঁকি দিয়াৰ স্বৰ্গভূমি হিচাপে পৰিচিত ৱাইমিঙত এনেদৰে কোম্পানী খোলাৰ আঁৰত লুণ্ঠিত ধনৰ গোপনীয়তা ৰক্ষা কৰাৰ উদ্দেশ্য নিহিত হৈ আছে বুলি কংগ্ৰেছে সন্দেহ প্ৰকাশ কৰিছে।
সংবাদ মেলত পৱন খেৰাই মুখ্যমন্ত্ৰীৰ পৰিয়ালক তীব্ৰ সমালোচনা কৰি কয় যে যিদৰে দাউদ ইব্ৰাহিম, নীৰৱ মোডী বা মেহুল চৌকছিয়ে দেশৰ ধন লুণ্ঠন কৰি বিদেশত আশ্ৰয় লৈছিল, মুখ্যমন্ত্ৰীৰ পৰিয়ালেও একেই পথ অনুসৰণ কৰিছে। এই বিশাল সম্পত্তি আৰু পূৰ্বতে অভিযোগ উঠা তিনিখনকৈ বিদেশী পাছপোৰ্ট নিৰ্বাচনত পৰাজিত হ’লে দেশৰ পৰা পলায়ন কৰাৰ এক আগতীয়া সুৰক্ষিত প্ৰস্তুতি বুলি তেওঁ কটাক্ষ কৰে। এই অভিযোগসমূহ কোনো ৰাজনৈতিক উদ্দেশ্যপ্ৰণোদিত নহয় বৰঞ্চ নিৰ্দিষ্ট ৱেবছাইটৰ পৰা সংগ্ৰহ কৰা দস্তাবেজৰ আধাৰত কৰা হৈছে বুলি খেৰাই স্পষ্ট কৰি দিয়ে। মুখ্যমন্ত্ৰী আৰু তেওঁৰ পত্নীক ‘বণ্টি-বাবলী’ যুটীৰ সৈতে তুলনা কৰি কংগ্ৰেছে এই সমগ্ৰ প্ৰক্ৰিয়াক অসমৰ তথাকথিত বিকাশৰ আঁৰৰ এক লুণ্ঠনকাৰী সাম্ৰাজ্য বুলি অভিহিত কৰিছে আৰু নিৰ্বাচনৰ পাছত ন্যায়ালয়ৰ কাষ চপাৰ হুংকাৰ দিছে।
বৰ্তমানলৈকে এই গুৰুতৰ অভিযোগ সন্দৰ্ভত মুখ্যমন্ত্ৰীৰ কাৰ্যালয় বা পৰিয়ালৰ তৰফৰ পৰা কোনো আনুষ্ঠানিক প্ৰতিক্ৰিয়া প্ৰকাশ কৰা নাই। অনাগত দিনত নিৰ্বাচন আয়োগ আৰু ন্যায়ালয়ে এই সন্দৰ্ভত কি পদক্ষেপ গ্ৰহণ কৰে, সেয়া পৰৱৰ্তী সময়ত লক্ষণীয় হ’ব আৰু এই বিতৰ্কই ৰাজ্যৰ ৰাজনৈতিক প্ৰেক্ষাপটত এক উত্তপ্ত পৰিৱেশ অব্যাহত ৰাখিব বুলি ধাৰণা কৰা হৈছে।
