ৰাজ্যিক কেবিনেট বৈঠকৰ পিছত সংবাদমেল সম্বোধন কৰি মুখ্যমন্ত্ৰী হিমন্ত বিশ্ব শৰ্মাই, অসমত বৰ্তমান কেৱল জনগাঁথনিগত পৰিৱৰ্তন নহয়, আৰ্থিক ক্ষেত্ৰতো এক গুৰুত্বপূর্ণ পৰিৱৰ্তন দেখা গৈছে বুলি মতপোষণ কৰিছে। তেওঁ ৰাজ্যৰ মুছলমান সমাজৰ মাজত ক্ৰমে বৃদ্ধি পাই অহা আৰ্থিক সমৃদ্ধিক অসমীয়া জনজাতিৰ দুৰৱস্থাৰ আৰম্ভণি বুলি উল্লেখ কৰে।
মুখ্যমন্ত্ৰীগৰাকীয়ে উল্লেখ কৰে যে, “পূৰ্বে আমি কেৱল জনসংখ্যা বৃদ্ধিক লৈ চিন্তিত আছিলোঁ, কিন্তু এতিয়া সম্পদৰ আৰ্হিও সলনি হৈছে।”
মুখ্যমন্ত্ৰীয়ে ২০০১ চনৰ পৰা ২০১১ চনৰ চৰকাৰী তথ্য দাঙি ধৰি কয় যে এই এক দশকৰ ভিতৰত ৰাজ্যত হিন্দু জনসংখ্যাৰ বৃদ্ধিৰ হাৰ হ্ৰাস পাইছে।
এই তথ্যৰ ভিত্তিত মুখ্যমন্ত্ৰীগৰাকীয়ে কয় যে ৰাজ্যৰ প্ৰায় সকলো ব্লকতে হিন্দু জনসংখ্যাৰ বৃদ্ধি হ্ৰাস পোৱাৰ বিপৰীতে মুছলমান জনসংখ্যা বৃদ্ধি পাইছে। লগতে তেওঁ হিন্দু ধৰ্মাৱলম্বী লোকৰ পৰা মুছলমানসকলে ভূমি ক্ৰয়ৰ ক্ষেত্ৰতো চিন্তা ব্যক্ত কৰে।
চৰকাৰৰ পূৰ্বৰ নিৰ্দেশনাৰ অধীনত এই দিশত চৰকাৰে তীক্ষ্ণ দৃষ্টি ৰাখিব বুলি তেওঁ সঙ্কেত দিয়ে। তেওঁ স্পষ্টকৈ কয় যে অসমীয়া হিন্দু আৰু খিলঞ্জীয়া মুছলমানৰ মাজৰ ভূমি লেনদেনত চৰকাৰৰ কোনো আপত্তি নাই। তথাপি, জনগাঁথনিগত পৰিৱৰ্তনৰ সৈতে সম্পদৰ ক্ষেত্ৰত হোৱা এই পৰিৱৰ্তন অসমীয়া সমাজৰ বাবে উদ্বেগজনক বুলি মন্তব্য কৰে। মুখ্যমন্ত্ৰীৰ ভাষাত, “এই পৰিস্থিতিয়ে অসমীয়া জনজাতিৰ আত্মসমৰ্পণৰ এক নতুন অধ্যায়ৰ আৰম্ভণি নিৰ্দেশ কৰে।”
