আজি সোমবাৰে বিজেপিৰ সকলো দলীয় কাৰ্যসূচী বন্ধ থাকিব। লগতে আজি হ’ব লগীয়া কেন্দ্ৰীয় নিৰ্বাচনী কমিটীৰ বৈঠকো বাতিল কৰা হৈছে। গোৱাৰ মুখ্য মন্ত্ৰী মনোহৰ পাৰিকৰৰ মৃত্যুৰ বাবে আজি বিজেপিৰ সকলো কাৰ্যসূচী বন্ধ থাকিব।
আনহাতে গোৱাৰ মুখ্য মন্ত্ৰী তথা জনপ্ৰিয় নেতা মনোহৰ পাৰিকাৰৰ মৃত্যুত মুখ্য মন্ত্ৰী সৰ্বানন্দ সোণোৱালেও গভীৰ শোক প্ৰকাশ কৰিছে।
এক শোকবাৰ্তাত মুখ্য মন্ত্ৰী সোণোৱালে কয় যে জীৱনকালত একান্ত নিষ্ঠা আৰু একাগ্ৰতাৰে প্ৰয়াত পাৰিকাৰদেৱে দেশৰ প্ৰতি যি সেৱা আগবঢ়ালে সেয়া সদায় স্মৰণীয় হৈ ৰ’ব। প্ৰচুৰ মেধাসম্পন্ন এইগৰাকী জনদৰদী নেতাই কেন্দ্ৰীয় প্ৰতিৰক্ষা মন্ত্ৰী হিচাপেও দেশৰ ৰাজনৈতিক ক্ষেত্ৰত নিজৰ প্ৰতিভাৰ চাপ এৰি থৈ গৈছে। তেওঁৰ বিয়োগ দেশৰ সামাজিক আৰু ৰাজনৈতিক জীৱনৰ এক অপুৰণীয় ক্ষতি।
মুখ্য মন্ত্ৰী সোণোৱালে বিদেহ আত্মাৰ চিৰশান্তি কামনা কৰাৰ লগতে শোকসন্তপ্ত পৰিয়ালবৰ্গলৈ গভীৰ সমাবেদনা জ্ঞাপন কৰিছে।
ইফালে বিজেপিৰ আন এগৰাকী জ্যেষ্ঠ তথা উদ্যোগ আৰু বাণিজ্য মন্ত্ৰী চন্দ্ৰমোহন পাটোৱাৰীয়েও গোৱাৰ মুখ্য মন্ত্ৰী মনোহৰ পাৰিকাৰৰ মৃত্যুত শোক প্ৰকাশ কৰিছে।
উল্লেখযোগ্য যে দেওবাৰে অৰ্থাৎ ১৭ মাৰ্চত সন্ধিয়া গোৱাৰ মুখ্যমন্ত্ৰী মনোহৰ পাৰিকৰে শেষ নিশ্বাস ত্যাগ কৰে। দীৰ্ঘদিন ধৰি কৰ্কট ৰোগত আক্ৰান্ত হৈ আছিল মুখ্য মন্ত্ৰী পাৰিকৰ।
