আন্দোলনে তুলি ধৰা প্ৰশ্নসমূহৰ সমাধানেৰে স্ব-আৰোপিত দায়বদ্ধতা পালন কৰাৰ বিপৰীতে বিজেপিৰ একাংশ শীৰ্ষ নেতাই সুবিধা পালেই কৰা ‘আন্দোলন-বিৰোধিতা’ৰ বিপৰীত স্থিতিৰে গণতান্ত্ৰিক আন্দোলনৰ ‘শলাগ’ লৈছে মুখ্য মন্ত্ৰী সৰ্বানন্দ সোণোৱালে।
সদৌ কোচ ৰাজবংশী ছাত্ৰ সন্থাৰ সৈতে বুধবাৰে গুৱাহাটীৰ অসম প্ৰশাসনীয় প্ৰাধিকাৰী মহাবিদ্যালয়ত হোৱা আলোচনাত জনজাতিকৰণৰ দাবীত দীৰ্ঘদিন ধৰি সংগঠনটোৱে চলাই অহা আন্দোলনৰ ‘শলাগ’ লয় মুখ্য মন্ত্ৰীয়ে।
‘জনজাতিকৰণৰ বাবে জনগোষ্ঠীটোৱে গণতান্ত্ৰিকভাৱে চলাই অহা আন্দোলনৰ শলাগ লয় (মুখ্য মন্ত্ৰীয়ে),’ চৰকাৰৰ ওপৰত আস্থা ৰাখিবলৈ আহ্বান জনাই সোণোৱালৰ উদ্ধৃতিৰে চৰকাৰী বিবৃতিত প্ৰকাশ।
মুখ্য মন্ত্ৰীৰ এই আন্দোলনৰ ‘শলাগ’ সমকামিতা সম্পৰ্কীয় উচ্চতম ন্যায়ালয়ৰ শেহতীয়া ৰায়ৰ পৰিপ্ৰেক্ষিতটো গুৰুত্বপূৰ্ণ। সমকামিতাৰ ওপৰত অপৰাধৰ মোহৰ গুচাই উচ্চতম ন্যায়ালয়ৰ সাংবিধানিক বিচাৰপীঠে দিয়া ৰায়ত ‘সংখ্যাধিক্যৰ মত’ সন্দৰ্ভত ব্যাখ্যা আগবঢ়াইছিল মুখ্য ন্যায়াধীশ দীপক মিশ্ৰই।
‘সংখ্যাগৰিষ্ঠৰ দৃষ্টিভংগি আৰু সাৰ্বজনীন নৈতিকতাই সাংবিধানিক অধিকাৰক পৰিচালিত কৰিব নোৱাৰে,’ ৰায়দানত এয়া আছিল মুখ্য ন্যায়াধীশৰ মন্তব্য।
‘মত প্ৰকাশৰ অধিকাৰ’ৰ ক্ষেত্ৰত ভাৰতৰ সাংবিধানিক গণতন্ত্ৰৰ এই বিশ্বজনীন আবেদনৰ বিপৰীতে বিৰুদ্ধ মতৰ বিৰোধিতা কৰাৰ পথত ‘জনাদেশ’ৰ কথা দোহাৰাটো শেহতীয়াকৈ দেশজুৰি একাংশ জনপ্ৰতিনিধিৰ অভ্যাসত পৰিণত হৈছে।
অসমৰ ৬টা জনগোষ্ঠীৰ জনজাতিকৰণৰ প্ৰধান নিৰ্বাচনী প্ৰতিশ্ৰুতি পালনত পুতৌজনকভাৱে ব্যৰ্থ হৈছে ৰাজ্যৰ বিজেপি নেতৃত্বাধীন চৰকাৰখন। পিছে শেহতীয়াকৈ একগোট হোৱা আক্ৰাছুৰ সভাপতি অৰুণ কুমাৰ ৰায়, উপদেষ্টাদ্বয় হিতেশ্বৰ বৰ্মন আৰু প্ৰদীপ ৰয়ৰ লগতে আন কেইবাটাও কোচ-ৰাজবংশী সংগঠনৰ নেতৃত্বক বৈঠকত তেওঁলোকৰ দাবী সন্দৰ্ভত ধনাত্মক সঁহাৰি দিয়ে সোণোৱালে।
‘যাতে জনগোষ্ঠীকেইটাৰ দাবী উপযুক্ত মঞ্চত শক্তিশালীভাৱে উপস্থাপন কৰিব পৰা যায় তাৰ বাবে অসম চৰকাৰে ৩গৰাকী জ্যেষ্ঠ মন্ত্ৰীৰ নেতৃত্বত এখন কেবিনেট উপ সমিতি গঠন কৰি দিছে,’ জনজাতিকৰণৰ ক্ষেত্ৰত চৰকাৰৰ ‘সদিচ্ছা আছে’ বুলি দাবী কৰি মুখ্য মন্ত্ৰীৰ আশ্বাস।
বিদেশী নাগৰিককে ধৰি অসমৰ এশ-এবুৰি সমস্যাৰ সমাধান আৰু চৰকাৰৰ বিভিন্ন সিদ্ধান্তক ‘অন্যায়’ৰূপে বিৰোধিতা কৰা আন্দোলনসমূহৰ ন্যায্যপ্ৰাপ্তিত মুখ্য মন্ত্ৰীৰ এই ‘শলাগ’এ কি সহায় কৰে লক্ষণীয় হ’ব।
সোণোৱালৰ এই আশ্বাস আগন্তুক লোকসভা আৰু পঞ্চায়ত নিৰ্বাচনকেন্দ্ৰিক নহয়টো? সময়ে ক’ব।