নিৰ্বাচনী নিৰাপত্তা সুনিশ্চিত কৰিবলৈ অসম কংগ্ৰেছে বিশেষ তৎপৰতা গ্ৰহণ কৰিছে আৰু ইয়াৰ বাবে ৭টা বিশেষ প্ৰতিনিধি দলক গুৰুত্বপূৰ্ণ দায়িত্ব অৰ্পণ কৰা হৈছে। ভোটগণনাৰ সময়ত যাতে কোনোধৰণৰ খেলিমেলি সংঘটিত হ’ব নোৱাৰে তাৰ বাবে অসম প্ৰদেশ কংগ্ৰেছ কমিটিয়ে এতিয়াৰে পৰা বিশেষ পদক্ষেপ হাতত লৈছে।
নিখিল ভাৰত কংগ্ৰেছ কমিটীৰ সাধাৰণ সম্পাদক তথা অসমৰ তত্ত্বাৱধায়ক জিতেন্দ্ৰ সিং আৰু অসম প্রদেশ কংগ্ৰেছৰ সভাপতি গৌৰৱ গগৈৰ আলোচনামৰ্মে ৰাজ্যৰ বিভিন্ন জিলাসমূহ ভ্ৰমণ কৰিবলৈ এই প্ৰতিনিধি দলসমূহ গঠন কৰা হৈছে। এই দলসমূহক সংশ্লিষ্ট জিলাসমূহৰ ষ্ট্ৰং ৰুম পৰিদৰ্শন কৰাৰ লগতে দলীয় প্ৰাৰ্থীসকলক সাক্ষাৎ আৰু জিলা প্ৰশাসনৰ সৈতে মত-বিনিময় কৰিবলৈ নিৰ্দেশ দিয়া হৈছে যি ভ্ৰমণসূচী ২৫ এপ্ৰিলৰ পৰা আৰম্ভ হ’ব।
উজনি অসমৰ দায়িত্বত দেৱব্ৰত শইকীয়াৰ নেতৃত্বত এটা দলে তিনিচুকীয়া, ডিব্ৰুগড়, শিৱসাগৰ, চৰাইদেউ, যোৰহাট আৰু গোলাঘাট জিলা ভ্ৰমণ কৰিব।
উত্তৰ পাৰৰ জিলাসমূহৰ বাবে ৰিপুন বৰাৰ নেতৃত্বত এটা দলক দায়িত্ব দিয়া হৈছে।
একেদৰে মধ্য অসম আৰু পাহাৰীয়া অঞ্চলৰ দায়িত্বত শিৱামণি বৰা আৰু দিগন্ত বৰ্মনৰ লগতে এটা বৃহৎ দলে হোজাই, নগাঁও, মৰিগাঁও, কামৰূপ, কামৰূপ মহানগৰ, নলবাৰীৰ লগতে কাৰ্বি আংলং আৰু ডিমা হাচাও জিলা পৰ্যবেক্ষণ কৰিব।
নামনি অসমৰ জিলাসমূহৰ বাবে ৰকিবুল হুছেইনৰ নেতৃত্বত এটা দলক মনোনীত কৰা হৈছে যিয়ে বৰপেটা, বঙাইগাঁও, ধুবুৰী আৰু গোৱালপাৰাৰ দৰে জিলাসমূহ ভ্ৰমণ কৰিব।
আনহাতে বৰাক উপত্যকাত অজিত সিঙৰ নেতৃত্বত এটা দলে আৰু বি.টি.এ.ডি. অঞ্চলৰ বাবে মেহেদী আলম বৰাৰ নেতৃত্বত আন এটা দলে দায়িত্ব পালন কৰিব। অসম প্রদেশ কংগ্ৰেছৰ সাধাৰণ সম্পাদক ৰামান্না বৰুৱাই এক জাননী যোগে এই নিৰ্দেশনা প্ৰদান কৰিছে।
