চিকিৎসক আৰু চিকিৎসাকৰ্মী সকলৰ নেৰানেপেৰা চেষ্টাৰ অন্তত ক’ৰ’নাৰ পৰা সম্পূৰ্ণৰূপে আৰোগ্য লাভ কৰিছে ৰাজ্যৰ প্ৰথম গৰাকী ক’ৰ’না আক্ৰান্ত কৰিমগঞ্জৰ জালালুদ্দিন।
জালালুদ্দিনক আজি শিলচৰ মেডিকেল কলেজ হস্পাতালৰ পৰা মুক্তি দিয়া হয়।
ছ’চিয়েল মিডিয়াযোগে ৰাজ্যৰ স্বাস্থ্য মন্ত্ৰী ড০ হিমন্ত বিশ্ব শৰ্মাই আজি এই কথা ঘোষণা কৰে।
উল্লেখযোগ্য যে, শৰীৰত মৰাত্মক ক’ৰ’না ভাইৰাছৰ উপস্থিতি ধৰা পৰাৰ পাছত বিগত ৩১ মাৰ্চত শিলচৰ চিকিৎসা মহাবিদ্যালয় হস্পাতালত ভৰ্তি কৰোৱা হৈছিল জালালুদ্দিনক।
দীৰ্ঘদিন ধৰি চিকিৎসাৰ অন্তত আজি চিকিৎসালয়ৰ পৰা মুক্তি দিয়া হয় জালালুদ্দিনক।
দিল্লীৰ নিজামুদ্দিন মাৰ্কাজলৈ গৈ ক’ৰ’নাত আক্ৰান্ত হৈছিল ৰাজ্যৰ প্ৰথম গৰাকী ক’ৰ’না আক্ৰান্ত জালালুদ্দিন।
জালালুদ্দিনৰ লগতে আজি মতিউৰ তৰপদাৰকো মহেন্দ্ৰ মোহন চৌধুৰী চিকিৎসালয়ৰ পৰা মুক্তি দিয়া হৈছে।
ৰাজ্যত ক’ৰ’নাত আক্ৰান্ত হোৱা মুঠ ৪৪ গৰাকী ব্যক্তিৰ ভিতৰত বৰ্তমানলৈ ৩৪ গৰাকী ব্যক্তি সম্পূৰ্ণৰূপে সুস্থ হৈ ঘৰলৈ উভতিছে।
অসমত মাত্ৰ এগৰাকী ৰোগীৰ ক’ৰ’নাৰ ফলত মৃত্যু হোৱাৰ বিপৰীতে বৰ্তমান মুঠ ৯ গৰাকী ব্যক্তি চিকিৎসালয়ত চিকিৎসাধীন হৈ আছে।