ৰাজ্যৰ স্বাস্থ্য আৰু বিত্ত মন্ত্ৰী ড০ হিমন্ত বিশ্ব শৰ্মাই কোভিড-১৯-ৰ সংক্ৰমণৰ ফলত সৃষ্টি হোৱা ৰাজ্যৰ সাম্প্ৰতিক পৰিস্থিতি সন্দৰ্ভত জনতা ভৱনত এখন গুৰুত্বপূৰ্ণ সংবাদমেল সম্বোধন কৰে।
সংবাদমেলত মন্ত্ৰী শৰ্মাই ৰাজ্যত কোভিড-১৯-ৰ বৰ্ধিত সংক্ৰমণ সন্দৰ্ভত উদ্বেগ প্ৰকাশ কৰি কোৱাৰেণ্টাইন সফলত কৰাত ৰাজ্যৰ ভবিষ্যত নিৰ্ভৰ কৰিছে বুলি মত প্ৰকাশ কৰে।
হিমন্ত বিশ্ব শৰ্মাই কেন্দ্ৰ চৰকাৰে ঘোষণা কৰা অৰ্থনৈতিক পেকেজৰ ফলত অসমে বিশেষকৈ প্ৰব্ৰজিত শ্ৰমিক সকলে কিদৰে লাভৱান হ’ব সেই সম্পৰ্কতো মন্তব্য কৰে।
মন্ত্ৰী শৰ্মাই উল্লেখ কৰা অনুসৰি কেন্দ্ৰীয় চৰকাৰে দিয়া অৰ্থনৈতিক পেকেজৰ সহায়ত অসম চৰকাৰে বহিঃৰাজ্যৰ পৰা নিজ গৃহলৈ উভতি অহা প্ৰব্ৰজিত শ্ৰমিক সকলক ৩ মাহলৈ খাদ্য বস্তুৰ যোগান ধৰিব বুলি জানিবলৈ দিয়ে।
প্ৰব্ৰজিত শ্ৰমিক আগন্তুত তিনিমাহ পৰ্যন্ত খাদ্যবস্তুৰ লগতে অতিৰিক্ত ৫ কেজিকৈ চাউল লাভ কৰিব।
আনহাতে, কেন্দ্ৰ চৰকাৰে প্ৰব্ৰজিত শ্ৰমিক সকল ঘৰলৈ উভতি অহাৰ পাছত যাতে হতাশাত ভূগিব নালাগে তাৰবাবে তেওঁলোকক এনৰেগাৰ জৰিয়তে কৰ্মসংস্থাপন দিয়াৰ বাবেও ৰাজ্য চৰকাৰক আহ্বান জনাইছে বুলি কয়।
তদুপৰি, এনৰেগাত কৰ্মৰত শ্ৰমিক সকলে পূৰ্বে লাভ কৰা ১৮২ টকাৰ পৰিৱৰ্তে নতুনকৈ ২০২ টকা অৰ্থাৎ ২০ টকা বেছিকৈ লাভ কৰিব বুলিও হিমন্ত বিশ্ব শৰ্মাই সংবাদমেলত উল্লেখ কৰে।
অসমৰ মুঠ ১ কোটি মহিলাই ল’কডাউনৰ সময়ত তিনিমাহৰ বাবে প্ৰতিমাহে ৫০০ টকাকৈ মুঠ ১৫০০ টকা নিজৰ জন ধন যোজনাৰ একাউণ্টত লাভ কৰিব বুলিও বিত্ত মন্ত্ৰী গৰাকীয়ে লগতে কয়।
ইয়াৰ ফলত চৰকাৰৰ ৰাজকোষৰ পৰা তিনিমাহত মুঠ ১৫০০ কোটি টকাৰ খৰচ হ’ব বুলিও মন্ত্ৰী শৰ্মাই জানিবলৈ দিয়ে।
পদপথৰ ব্যৱসায়ী সকলক নিজৰ ব্যৱসায় পুনৰ আৰম্ভ কৰাৰ বাবে বেংকে ১০,০০০ টকাকৈ ঋণ প্ৰদান কৰিব বুলিও তেওঁ সংবাদমেলত কয়।
