শেহতীয়াকৈ ৰাজ্যত আঁচনি, আৰু বঁটা-বাহন, সাহায্যৰ ধল অনা অসম চৰকাৰে আজি অসম সাহিত্য সভাকে ধৰি ৰাজ্যৰ আন আন ভাষাৰ সাহিত্য সভাবোৰলৈ বিত্তীয় সাহায্য ঘোষণা কৰিছে।
আজি মুখ্য মন্ত্ৰীজনে অসম সাহিত্য সভা, খিলঞ্জীয়া জনজাতীয় সাহিত্য সভা অসম, দেউৰী সাহিত্য সভা, ডিমাছা সাহিত্য সভা, অসম নেপালী সাহিত্য সভা, নিখিল ৰাভা সাহিত্য সভা, কাৰ্বি সাহিত্য সভা, মিচিং সাহিত্য সভা, নিখিল বিষ্ণুপুৰীয়া সাহিত্য সভা, পূৰ্বাঞ্চল তাই সাহিত্য সভা, তিৱা সাহিত্য সভা, অসম মণিপুৰী সাহিত্য পৰিষদ, গাৰো সাহিত্য সভা, মৰাণ সাহিত্য সভা, অসম চাহ জনগোষ্ঠী সাহিত্য সভা, সোণোৱাল কছাৰী সাহিত্য সভা, কুৰুখ সাহিত্য সভা, কোচ ৰাজবংশী সাহিত্য সভা, চাওঁতাল সাহিত্য সভা, মুণ্ডাৰি সাহিত্য সভা, শৰণীয়া কছাৰী সাহিত্য সভাৰ প্ৰতিনিধিৰ সৈতে এখন বৈঠকত বহে।
বৈঠকৰ অন্তত মুখ্য মন্ত্ৰীয়ে ৰাজ্য চৰকাৰে অসম সাহিত্য সভালৈ ১০ কোটি টকা, বড়ো সাহিত্য সভালৈ ৫ কোটি টকা আৰু আন আন সাহিত্য সভাবোৰলৈ ৩ কোটিকৈ টকাৰ এক কালীন সাহায্য ঘোষণা কৰে।
মুখ্য মন্ত্ৰীৰ জন সম্পৰ্কৰক্ষী কোষে নৰ্থ-ইষ্ট নাওলৈ প্ৰেৰণ কৰা এটা বিবৃতিত কোৱা হয় যে এই সাহায্যবোৰ সংশ্লিষ্ট সভাবোৰৰ স্থায়ী পুঁজিত জমা হ’ব, য’ৰ পৰা সভাবোৰে বছৰেকীয়া সুত লাভ কৰিব।
বিবৃতিটোৰ মতে, অসম সাহিত্য সভাই বাৰ্ষিক ৮০ লাখ টকা, বড়ো সাহিত্য সভাই ৪০ লাখ টকা আৰু আন আন জনগোষ্ঠীয় সাহিত্য সভাবোৰে বাৰ্ষিক ২৪ লাখ টকাকৈ সুত লাভ কৰিব পাৰিব।
বৈঠকত মুখ্য মন্ত্ৰী সোণোৱালে ৰাজ্যৰ নবীন লেখকসকলৈও বিত্তীয় সাহায্য ঘোষণা কৰে। সেই অনুসৰি ১ হাজাৰ নতুন লেখক “ভাষা গৌৰৱ” আঁচনিৰ অধীনত ৫০ হাজাৰকৈ টকা দিব।
“এই আঁচনিয়ে নতুন লেখকসকলক বিভিন্ন ভাষাত সাহিত্য কৰ্মত জড়িত হ’বলৈ অনুপ্ৰাণিত কৰিব বুলি আশা কৰা হৈছে”, বিবৃতিটোত কোৱা হয়।
সোণোৱালে থলুৱা সাহিত্য অনুষ্ঠানবোৰক থলুৱা ভাষা আৰু সংস্কৃতিৰ সংৰক্ষণ আৰু উদগনিৰ বাবে গৱেষণামূলক কামত জোৰ দিবলৈ আহ্বান জনায়। এই ক্ষেত্ৰত সকলো প্ৰকাৰৰ সহায় আগ বঢ়োৱাৰ আশ্বাসো দিয়ে মুখ্য মন্ত্ৰীজনে।
বৈঠকত বাণিজ্য আৰু উদ্যোগ মন্ত্ৰী চন্দ্ৰমোহন পাটোৱালী, প্ৰাথমিক আৰু মাধ্যমিক শিক্ষা বিভাগৰ আয়ুক্ত আৰু সচিব প্ৰীতম শইকীয়া, মুখ্য মন্ত্ৰীৰ আইন উপদেষ্টা শান্তনু ভৰালী আৰু মুখ্য মন্ত্ৰীৰ প্ৰেছ উপদেষ্টা হৃষিকেশ গোস্বামীও উপস্থিত আছিল।
