ৰাজ্যত শেহতীয়াকৈ তীব্ৰ হাৰত বৃদ্ধি পোৱা আৰক্ষীৰ এনকাউণ্টাৰ সন্দৰ্ভত উচ্চ ন্যায়ালয়ত শপতনামা দাখিল কৰাত ব্যৰ্থ হৈছে অসম চৰকাৰ।
ন্যায়ালয়ে চৰকাৰক ইয়াৰ বাবে পুনৰ কিছুদিন সময় ধাৰ্য কৰি দিছে। ৮ ফেব্ৰুৱাৰীত গোচৰটোৰ পৰৱৰ্তী শুনানি হ’ব।
উচ্চ ন্যায়ালয়ে যোৱা ১১ জানুৱাৰীত যোৱা বৰ্ষৰ মে’ মাহত বিজেপি পুনৰ ক্ষমতালৈ অহাৰ পিছৰে পৰা দ্ৰুত হাৰত সংঘটিত হৈ থকা আৰক্ষীৰ এনকাউণ্টাৰৰ ওপৰত শপতনামা দাখিল কৰিবলৈ নিৰ্দেশ দিছিল।
অধিবক্তা আৰিফ মোঃ য়েছিন জৱাড্ডাৰে দাখিল কৰা এখন ৰাজহুৱা স্বাৰ্থৰ আবেদনৰ শুনানি গ্ৰহণ কৰি মুখ্য ন্যায়াধীশ সুধাংশু ধুলিয়া আৰু ন্যায়াধীশ সৌমিত্ৰ ডেকাক লৈ গঠিত খণ্ড বিচাৰপীঠে অধিক সময় বিচাৰি চৰকাৰে কৰা আবেদন গ্ৰহণ কৰে।
“শপতনামাখন এতিয়াও সম্পূৰ্ণ হোৱা নাই আৰু এতিয়াও প্ৰস্তুত হৈ আছে। আমি কিছু সময় বিচাৰিছিলো আৰু আদালতে আমাক আৰু ১০ দিন সময় দিছে।” অসমৰ এডভোকেট জেনেৰেল দেৱজিৎ শইকীয়াই কয়।
উচ্চ ন্যায়ালয়ে অসম চৰকাৰৰ প্ৰধান সচিব (গৃহ), সচিব (গৃহ) বা অতিৰিক্ত সচিব (গৃহ)ক কথিত ভুৱা এনকাউণ্টাৰ সন্দৰ্ভত বিতং শপতনামা দাখিল কৰিবলৈ নিৰ্দেশ দিছিল।
অসম চৰকাৰৰ উপৰিও অসম আৰক্ষীৰ ডিজিপি, আইন আৰু ন্যায় বিভাগ, ৰাষ্ট্ৰীয় মানৱ অধিকাৰ আয়োগ আৰু অসম মানৱ অধিকাৰ আয়োগক অধিবক্তা আৰিফ মোঃ য়েছিন জৱাড্ডাৰে দাখিল কৰা আবেদন খনত উত্তৰদাতা হিচাপে নামাকৰণ কৰা হৈছে।
আবেদনকাৰী জৱাড্ডাৰে আদালতৰ তত্বাৱধানত চিবিআই, এছআইটি বা আন ৰাজ্যৰ যিকোনো আৰক্ষী দলৰ দৰে স্বতন্ত্ৰ সংস্থাৰ দ্বাৰা এনকাউণ্টাৰৰ তদন্ত বিচাৰিছে।
আবেদন খনৰ জৰিয়তে এনকাউণ্টাৰ সন্দৰ্ভত গুৱাহাটী উচ্চ ন্যায়ালয়ৰ এজন বৰ্তমানৰ ন্যায়াধীশৰ দ্বাৰা ন্যায়িক তদন্ত আৰু উপযুক্ত প্ৰমাণীকৰণৰ পিছত ভুক্তভোগী পৰিয়ালক আৰ্থিক ক্ষতিপূৰণ দিয়াৰ ব্যৱস্থা গ্ৰহণ কৰিবলৈ আহ্বান জনোৱা হৈছে।
জৱাড্ডাৰে আবেদন খনত দাবী কৰিছে যে হিমন্ত বিশ্ব শৰ্মাই মুখ্যমন্ত্ৰী হিচাপে নিৰ্বাচিত হোৱাৰ পিছৰে পৰা অসম আৰক্ষী আৰু অভিযুক্তৰ মাজত ৮০ টাতকৈও অধিক ভুৱা সংঘৰ্ষ সংঘটিত হৈছে। ইয়াৰ ফলত ২৮ জন লোকৰ মৃত্যু হৈছে আৰু ৪৮ জনৰো অধিক আঘাতপ্ৰাপ্ত হৈছে।
নিহত বা আহত লোকসকল ভয়ংকৰ অপৰাধী নাছিল আৰু সকলো এনকাউণ্টাৰতে আৰক্ষীৰ কাৰ্যপ্ৰণালী একে আছিল বুলি আবেদন খনত উল্লেখ কৰা হৈছে।
উল্লেখ্য যে অধিবক্তা জৱাড্ডাৰে ইয়াৰ পূৰ্বে যোৱা বৰ্ষৰ জুলাইত ৰাষ্ট্ৰীয় মানৱ অধিকাৰ আয়োগৰ ওচৰত কথিত ভুৱা এনকাউণ্টাৰ সন্দৰ্ভত অভিযোগ দাখিল কৰিছিল।
২০২১ চনৰ নৱেম্বৰত আয়োগে গোচৰটো অসম মানৱ অধিকাৰ আয়োগলৈ স্থানান্তৰ কৰে আৰু ৰাজ্য চৰকাৰৰ পৰা এই বিষয়ত প্ৰতিবেদন বিচাৰে।