যোৱা ৬ মাৰ্চৰ দিনা পঞ্চায়ত ও গ্ৰামোন্নন বিভাগৰ ৯৪৫ টা পদৰ ফলাফল ঘোষণাৰ পাছদিনাই অৰ্থ্যাৎ ২৪ ঘন্টা নৌ হওঁতেই সেইসকলক পুলিচ ভেৰিফিকেশ্যন অবিহনে নিযুক্তি দিয়া বিষয়টোৱে সকলোকে আচম্বিত কৰিছিল তথা বহুতেই এই নিযুক্তি অনিয়মৰ মাজেৰে হোৱা বুলি অভিযোগ তুলিছিল।
তেনে সময়তে উক্ত বিভাগৰ নিযুক্তি প্ৰক্ৰিয়াত কোনোধৰণৰ অনিয়ম অথবা গাফিলতি হোৱা নাই বুলি ৰাজ্য চৰকাৰখনক ক্লীনশ্বিট দিয়াত উঠি-পৰি লাগিছে বিজেপিৰ কিছুসংখ্যক নেতা। আনকি বিষয়টোৰ ওপৰত সংবাদমেল সম্বোধন কৰি জনসাধাৰণক দুৰ্নীতি হোৱা নাই বুলি পতিয়ন নিয়াবলৈ চেষ্টা কৰা দেখা গ’ল বিজেপিৰ মেডিয়া পেনেলিষ্ট সুভাষ দত্তক।
আজি বিজেপিৰ ৰাজ্যিক কাৰ্য্যালয়ত মেডিয়া পেনেলিষ্ট দত্তই নিযুক্তি প্ৰক্ৰিয়া সম্পূৰ্ণ নিকা তথা স্বচ্ছতাৰে হোৱা বুলি দাবী কৰাৰ লগতে বিজেপিৰ নেতা-কৰ্মী তথা আত্মীয়সকলক সুৰক্ষা দিবলৈ গৈ কয়, ‘তেওঁলোকে নিজে মেধাৰ ভিত্তিত চাকৰি পাইছে।‘
প্ৰসংগক্ৰমে উল্লেখ কৰিব পাৰি যে, কোনো চাকৰিৰ লিখিত পৰীক্ষাত এগৰাকী প্ৰাৰ্থী উত্তীৰ্ণ হোৱাৰ পাছত তেওঁলোকে আবেদনৰ সৈতে গাঁথি দিয়া নথি-পত্ৰ(জেৰক্স)সমূহৰ মূল নথিসমূহ পৰীক্ষণ কৰা হয় বা এইক্ষেত্ৰত পুলিচ ভেৰিফিকেশ্যন দিয়াটো অত্যন্ত বাধ্যতামূলক।
তেনে পৰিপ্ৰেক্ষিতত আমাৰ সাংবাদিকে কিয় একে ৰাতিৰ ভিতৰতে পৰীক্ষাৰ ফলাফল দি নিৰ্বাচিত প্ৰাৰ্থীসমূহক নিযুক্তি পত্ৰ প্ৰদান কৰা হ’ল তথা তাৰ বাবে পুলিচ ভেৰিফিকেশ্যনৰ প্ৰয়োজন নাছিল নেকি অথবা অন্যান্য নথি-পত্ৰসমূহৰ পুনৰ পৰীক্ষণৰ প্ৰয়োজনীয়তা নাছিল নেকি বুলি প্ৰশ্ন কৰিছিল।
আমাৰ সাংবাদিকৰ প্ৰশ্নৰ উত্তৰত নিযুক্তি লাভ কৰাৰ পাছত পুলিচ ভেৰিফিকেশ্যন দিলেও হয় বুলি মন্তব্য কৰে বিজেপিৰ মেডিয়া পেনেলিষ্টৰ দৰে গুৰুত্বপূৰ্ণ বিভাগৰ দায়িত্বত থকা নেতাজনে।
‘’আমাৰ চৰকাৰ শাসনলৈ অহাৰ পাছৰে পৰা নিযুক্তি প্ৰক্ৰিয়া স্বচ্ছ আৰু নিকা হোৱাৰ স্বাৰ্থতেই তাৎক্ষণিকভাৱেই এই ব্যৱস্থা কৰা হৈছে। পুলিচ ভেৰিকেশ্যনটো পাছত হ’লেও হ’ব। নিযুক্তি লাভ কৰাৰ পাছত যদি পুলিচ ভেৰিফিশ্যনত যদি খেলি-মেলি ওলায়, তেন্তে নিযুক্তি প্ৰক্ৰিয়া বাতিল হ’ব পাৰে।‘’
বিজেপি নেতাৰ এনে উত্তৰৰ পাছত স্বাভাৱিকতে প্ৰশ্ন হয় ‘’পুলিচ ভেৰিফিকেশ্যন নোহোৱাকৈ কেনেকৈ কোনো এজন চাকৰি প্ৰত্যাশী প্ৰাৰ্থীক নিযুক্তি দিব পাৰি? যদি প্ৰাৰ্থীগৰাকীয়ে পূৰ্বতে অপৰাধ কৰি থৈছিল বা তেওঁৰ বিৰুদ্ধে আদালতত গোচৰ চলি আছে, তেন্তে তেওঁৱো কোনো চৰকাৰী চাকৰিত নিযুক্তি পাব পাৰে নেকি? অথবা কোনো ভাৰতীয় নোহোৱাকৈয়ো বিদেশী লোকে অসমত চাকৰি ল’ব পাৰিব নেকি?’’
প্ৰসংগক্ৰমে উল্লেখ কৰিব পাৰি যে, পুলিচ ভেৰিফিকশ্যন নোহোৱাকৈয়ে পঞ্চায়ত ও গ্ৰামোন্নয়নত ৭ টা বিভিন্ন পৰ্য্যায়ৰ বিভাগৰ বাবে ৯৪৫ টা পদত নিযুক্তি লাভ কৰিছিল তথা প্ৰাৰ্থীসকলে কোন কোন স্থানত যোগদান কৰিব লাগিব তাৰো ঘোষণা কৰিছিল। এনেধৰণে নীতি বহিৰ্ভূতভাৱে পদসমূহত নিযুক্তি দিয়াক কেন্দ্ৰ কৰি ৰাজ্যজুৰি প্ৰতিবাদমুখৰ পৰিস্থিতিৰ সৃষ্টি হৈছিল।
আনহাতে, আজিৰ সংবাদমেলতে ভাৰতীয় জনতা পাৰ্টীৰ কাৰ্য্যকৰ্তাসকল মেধা সম্পন্ন বুলি দাবী কৰে সুভাষ দত্তই।
দত্তৰ মতে ‘’পঞ্চায়ত ও গ্ৰামোন্নয়ন বিভাগত যিসকল কাৰ্য্যকৰ্তা অথবা তেওঁলোকৰ আত্মীয়ই চাকৰি লাভ কৰিছে তেওঁলোক মেধাসম্পন্ন আৰু সম্পূৰ্ণ যোগ্যতাৰ ভিত্তিত চাকৰি পাইছে।‘’
প্ৰশ্ন হয়, ভাৰতীয় জনতা পাৰ্টীয়ে এই নিযুক্তি স্বচ্ছ তথা নিকা বুলি দাবী কৰিলেও মুখ্য মন্ত্ৰী সৰ্বানন্দ সোণোৱালে তেওঁৰে বিভাগীয় অতিৰিক্ত মুখ্য সচিব জিষ্ণু বৰুৱাক কেলেংকাৰিৰ তদন্ত কৰিবলৈ কিয় নিৰ্দেশনা জাৰি কৰিলে?
তদুপৰি, এক সুত্ৰৰ পৰা পোৱা খবৰ অনুসৰি গ্ৰেপ্তাৰ হোৱাৰ ভয়তে বা ৰাকেশ পাল বাহিনীৰ জৰিয়তে চাকৰি লাভ কৰা ৰাজপতিত বিষয়াসকলে সন্মুখীন হোৱা দুৰ্গতিৰ আতংকত এতিয়াও বহু প্ৰাৰ্থীয়ে চাকৰিত যোগদান কৰা নাই।
