ৰাজ্যৰ পঞ্চায়ত নিৰ্বাচনৰ বাবে চৰকাৰী বিদ্যালয়সমূহে পৰীক্ষা অনুষ্ঠিত কৰি দুই-তিনিদিনৰ ভিতৰতে পৰীক্ষাৰ ফলৰ ঘোষণা কৰিব লাগিব বুলি শিক্ষা বিভাগে জাৰি কৰা নিৰ্দেশনাই চৰকাৰী শিক্ষা ব্যৱস্থাত ছাত্ৰ-ছাত্ৰীৰ প্ৰতি শিক্ষা বিভাগৰ দায়িত্বহীনতা তথা অৱহেলাৰ কথাকে উদঙাই দিছে।
অসম চৰকাৰৰ শিক্ষা বিভাগৰ মাধ্যমিক আৰু প্ৰাথমিক শিক্ষাৰ আয়ুক্ত সচিবে যোৱা ১ নৱেম্বৰত স্মাৰক নং ‘এ এছ ই ৮৩১/২০১৮/১০-এ’ৰ জৰিয়তে দিয়া নিৰ্দেশ মৰ্মে আগন্তুক পঞ্চায়ত নিৰ্বাচনৰ প্ৰতি লক্ষ্য ৰাখি বছৰেকীয়া পৰীক্ষাৰ সময়সূচী সাল-সলনি কৰাৰ বিষয়ে জিলাসমূহৰ শিক্ষা বিভাগৰ সংশ্লিষ্ট বিষয়ালৈ জাননী প্ৰেৰণ কৰিছে।
জাননী অনুসৰি চৰকাৰী খণ্ডৰ বিদ্যালয়সমূহৰ বাৰ্ষিক পৰীক্ষা ১৫ৰ পৰা ২৮ ডিচেম্বৰৰ ভিতৰত সম্পন্ন কৰাৰ লগতে ২০১৯ চনৰ শৈক্ষিক বৰ্ষ পূৰ্বৰ সূচী মতেই আৰম্ভ কৰাৰ নিৰ্দেশ দিয়া হৈছে।
ৰাজ্য চৰকাৰৰ শিক্ষা বিভাগৰ এই নিৰ্দেশনাই নিম্ন প্ৰাথমিক পৰ্যায়ৰ পৰা উচ্চ মাধ্যমিক পৰ্যায়ৰ সংশ্লিষ্ট বিদ্যালয়সমূহৰ শিক্ষকসকলৰ মাজত প্ৰতিক্ৰিয়াৰ সৃষ্টি কৰিছে। প্ৰায়বোৰ চৰকাৰী বিদ্যালয়ৰ শিক্ষক পঞ্চায়ত নিৰ্বাচনৰ কামত জড়িত হোৱাৰ লগতে বহু বিদ্যালয়ত ভোটগ্ৰহণ কেন্দ্ৰ স্থাপন হোৱাৰ বাবে তাত পূৰ্বৰে পৰা প্ৰশাসনে নিৰ্বাচন সংক্ৰান্তীয় কামকাজ আৰম্ভ কৰিব। এনে ক্ষেত্ৰত পাঠদান তথা পৰীক্ষাৰ প্ৰস্তুতি স্বাভাৱিকতে বাধাপ্ৰাপ্ত হ’ব।
শিক্ষা বিভাগৰ নিৰ্দেশনা অনুসৰি ১৫ৰ পৰা ২৮ ডিচেম্বৰৰ ভিতৰত বছৰেকীয়া পৰীক্ষা সম্পন্ন কৰি ৩১ ডিচেম্বৰৰ ভিতৰত উত্তৰ বহী মূল্যায়নেৰে ফল ঘোষণা কৰিব লাগিব। তদুপিৰ, পূৰ্বৰ সূচী অনুসৰি ২০১৯ চনৰ পহিলা জানুৱাৰিৰ পৰাই নতুন শৈক্ষিক বৰ্ষ আৰম্ভ হ’ব।
আনহাতে, এই নিৰ্দেশনা অনুসৰি ২৮ ডিচেম্বৰত পৰীক্ষা সম্পূৰ্ণ হোৱাৰ পাছত ৩১ ডিচেম্বৰলৈকে তিনিদিনৰ ভিতৰতে উত্তৰ বহী মূল্যায়ন কৰাৰ লগতে ফলো ঘোষণা কৰিব লাগিব। শিক্ষা বিভাগৰ এনে অবিবেচক কাণ্ডই ছাত্ৰ-ছাত্ৰী, শিক্ষক-অভিভাৱকৰ তথা শিক্ষানুৰাগী ৰাইজৰ মাজত প্ৰতিক্ৰিয়াৰ সৃষ্টি কৰিছে।
চৰকাৰী শিক্ষা ব্যৱস্থাত চৰকাৰী বিদ্যালয়ৰ শিক্ষাৰ্থীসকলক এনেদৰে ‘গিনিপিগ’ সজাই চৰকাৰী শিক্ষাক প্ৰহসনলৈ পৰিগণিত কৰিব বিচৰা কাৰ্যই চৰকাৰৰ শিক্ষাৰ প্ৰতি থকা অনীহাৰ কথাকে প্ৰতীয়মান কৰে।
