ল’কডাউনৰ সময়ছোৱাত দৰবৰ ক্ষেত্ৰত সাধাৰণ ৰাইজ বহু অসুবিধাৰ সন্মুখীন হৈছে। তাৰ প্ৰতি লক্ষ্য ৰাখি ৰাজ্যৰ স্বাস্থ্য বিভাগে গ্ৰহণ কৰিছে এক বিশেষ পদক্ষেপ।
আজিৰে পৰা স্থানীয় এলেকাত লাভ নকৰা ঔষধ লাভ কৰিব ৰোগীয়ে। ৰাষ্ট্ৰীয় স্বাস্থ্য অভিযানৰ ৰাজ্যিক কাৰ্য্যালয়ত এক সংবাদমেল সম্বোধন কৰি স্বাস্থ্য মন্ত্ৰী হিমন্ত বিশ্ব শৰ্মাই ধনন্তৰী নামৰ এক আঁচনিৰ কথা ঘোষণা কৰে। এই আঁচনিৰ অধীনত ১০৪ নম্বৰত ফোন কৰিলে জনসাধাৰণক স্বাস্থ্য বিভাগে ঘৰতে ঔষধ যোগান ধৰিব।
‘ধনন্তৰী আঁচনিৰ অধীনত যিসকল ৰোগীৰ ঔষধ স্থানীয় এলেকাত পোৱা নাযায়, বা অসমত সেই ঔষধ নাই সেইসকলে ঔষধ লাভ কৰিব পাৰিব। যদি ঘৰৰ পৰা ১০ কিঃমিঃতকৈ দূৰত ঔষধ নাপায় তেন্তে এটা হেল্পলাইন নম্বৰত ফোন কৰিব পাৰিব। স্মাৰ্টফোন থকাসকলৰ পৰা প্ৰেছকিপছনখনৰ ফটো হোৱাটছএপ যোগে লৈ ল’ম। যিসকলৰ স্মাৰ্টফোন নাই সেইসকলৰ পৰা ঔষধৰ নাম লিখি লোৱা হ’ব। এমপিডব্লিউ বা আশা কৰ্মীসকলে ঘৰত গৈ ঔষধটো যোগান ধৰিব।‘ মন্ত্ৰীগৰাকীয়ে কয়।
ইয়াৰোপৰি বিনামূলীয়া ঔষধৰ ভড়ালত থাকিলে ঔষধটো বিনামূলীয়া হ’ব বা ২০০ টকা পৰ্য্যন্ত ঔষধৰ মূল্য লোৱা নহ’ব বুলি স্বাস্থ্য মন্ত্ৰীগৰাকীয়ে জানিলৈ দিয়ে।
তেওঁ কয় ‘২০০ টকাৰ ওপৰত ঔষধৰ মূল্য ৰোগীসকলে বহন কৰিব লাগিব। যদি জিলাৰ ভিতৰত ঔষধটো লাভ কৰে তেওঁলোকে ২৪ ঘন্টাৰ ভিতৰত ঔষধটো যোগান ধৰিব। অসমৰ বাহিৰৰ পৰা আনিবলীয়া হ’লে এসপ্তাহ-১০ দিনৰ ভিতৰত ঔষধটো ৰোগীসকলে লাভ কৰিব। যদি জিলাৰ বাহিৰত গুৱাহাটী নাইবা ডিব্ৰুগড় ইত্যাদি ঠাইৰ পৰা আনিবলগীয়া হয় তেন্তে ৪৮ ঘন্টাৰ ভিতৰত লাভ কৰিব।‘
ইপিনে, ১০৪ নম্বৰটো ব্যস্ত হৈ থকা বুলি বহুতৰে পৰা অভিযোগ লাভ কৰা বুলি মন্তব্য কৰি তেওঁ লগতে কয় ‘তথাপি অলপ ধৈৰ্য্য ধৰি ফোন কৰিলে এটা সময়ত লাগি যাব। অচিৰেই হোৱেটছএপ নম্বৰ এটাও মুকলি কৰি দিম। তেতিয়া তেওঁলোকে পোনে পোনে প্ৰেছকিপছনখন হোৱেটছএপ কৰি দিব পাৰিব। আজিৰে পৰা এই ধনন্তৰী সেৱা ৰাইজৰ সেৱাৰ বাবে মুকলি কৰা হ’ব।‘
ইয়াৰোপৰি অসম আৰক্ষীয়ে ৪৮০০ লোকৰ ঘৰত গৈ ল’কডাউনৰ সময়ত দৰৱৰ যোগান ধৰিছে বুলি মন্ত্ৰীগৰাকীয়ে সদৰী কৰে।
আনহাতে, সেই একেখন সংবাদমেলতে ধুবুৰী জিলাত COVID19 পজিটিভ কেচৰ সংখ্যা বৃদ্ধি পোৱা বুলি উল্লেখ কৰি মন্ত্ৰীজনে লগতে কয়, ‘ধুবুৰীত পাঁচটা কেচ নিৰ্দিষ্ট সময়ৰ ব্যৱধানত নতুনকৈ আহি আছে। পশ্চিমবংগৰ পৰিৱেশ বেয়া হৈ পৰা বাবে সীমান্তৱৰ্তী জিলা কোকৰাঝাৰ আৰু ধুবুৰীৰ ওপৰত বিশেষ নজৰ ৰখাৰ প্ৰয়োজনীতা আহি পৰিছে।‘
