‘শীঘ্ৰে ৰাজ্যত ৯,০০০ শিক্ষকৰ নিযুক্তি প্ৰক্ৰিয়া আৰম্ভ হ’ব। নতুন শিক্ষকৰ নিযুক্তিৰ বাবে অনলাইন প্ৰক্ৰিয়া আৰম্ভ হৈছে।’ ৬ জানুৱাৰিত বিধানসভাত এই কথা উল্লেখ কৰে শিক্ষা মন্ত্ৰী সিদ্ধাৰ্থ ভট্টাচাৰ্যই।
বুধবাৰে সদনত কংগ্ৰেছৰ বিধায়ক আব্দুল খালেকে বহু বিদ্যালয়ত ছাত্ৰ-ছাত্ৰীৰ অনুপাতে শিক্ষক-শিক্ষয়িত্ৰী নথকাৰ প্ৰসংগ উত্থাপন কৰে। আৰু খালেকে উত্থাপন কৰা প্ৰশ্নৰ উত্তৰ দি মন্ত্ৰী ভট্টাচাৰ্যই বিধানসভাত উক্ত তথ্য সদৰী কৰে।
লগতে মন্ত্ৰী গৰাকীয়ে কয় যে চৰ-দুৰ্গম অঞ্চলত কৰ্মৰত মহিলা টে’ট শিক্ষকসকলৰ বাবে থকাৰ কিবা ব্যৱস্থা কৰিব পৰা যায় নেকি, এই সন্দৰ্ভতো চৰকাৰে চিন্তা-চৰ্চা কৰিছে।
তাৰোপৰি জিলা পৰ্যায়ৰ শিক্ষকৰ ৰেচনেলাইজেশ্বন প্ৰক্ৰিয়া জিলা উপায়ুক্তৰ তত্বাৱধানত সংশ্লিষ্ট জিলাৰ ভিতৰতে কৰিব পৰা যায় নেকি এই সন্দৰ্ভতো বিবেচনা কৰা হ’ব বুলিও বিধানসভাত মন্ত্ৰী ভট্টাচাৰ্যই উল্লেখ কৰে।