ৰাউল কৌশিক নাথ ফাউণ্ডেচনে আয়োজন কৰা তৃতীয় বাৰ্ষিক ‘মনগীত: দ্য ছৌউল মিউজিক’ অনুষ্ঠানৰ অপাৰ সফলতাৰ পিছত দ্বিতীয় বাৰ্ষিক মনকবিতা জ্ঞানপীঠ বিজয়ী নীলমণি ফুকনৰ কবিতাৰ ওপৰত আয়োজন কৰা হৈছে।
আয়োজসকলে জানিবলৈ দিয়া মতে ১৯ ফেব্ৰুৱাৰীত সোণাপুৰৰ ডেকাচাঙত নিৰ্বাচিত দৰ্শকৰ উপস্থিতিত এই অনুষ্ঠানৰ আয়োজন কৰা হৈছে। উক্ত অনুষ্ঠানত কবিতা আবৃত্তি, সংগীত পৰিবেশন আৰু চলচ্চিত্ৰ সম্পৰ্কেও আলোচনা কৰা হ’ব।
মনকবিতা অনুষ্ঠানটি অনলাইন পৰ্টেল www.eastmojo.com ৰ জৰিয়তে চোৱাৰ সুবিধা উপলব্ধ কৰিছে আয়োজক কৰ্তৃপক্ষই। উল্লেখ্য যে মনকবিতা, মনতুলিকা আৰু মনগীত এই তিনিওটা অনুষ্ঠান ৰাউল কৌশিক নাথ ফাউণ্ডেচনে আয়োজন কৰি আহিছে।
অনুষ্ঠানকেইটাৰ লক্ষ্য হৈছে অসমৰ বিভন্ন প্ৰান্তৰ সৃষ্টিশীল কৰ্মক আগুৱাই অনা৷ ৰাউল কৌশিক নাথ ফাউণ্ডেচনৰ মেনেজিংট্ৰাষ্টী কৌশিক নাথে জানিবলৈ দিয়ে যে মনগীত, মনতুলিকা আৰু মনকবিতা অনুষ্ঠানৰ জৰিয়তে অসমত ভাল কামৰ এক সুস্থ পৰিৱেশ সৃষ্টি কৰাৰ প্রয়াস কৰা হৈছে।
বিশেষকৈ যুৱপ্রজন্মৰ লোকসকলক এই অনুষ্ঠানত বিশেষ প্ৰাধান্য দিয়াৰ চেষ্টা কৰা হৈছে। ফাউণ্ডেচনৰ উদ্যোগত ১৫ৰ পৰা ১৭ জানুৱাৰীলৈ মাজুলীৰ ডেকাচাঙত মনগীত উৎসৱৰ আয়োজন কৰা হয়।
মনগীত উৎসৱৰ কৰ্মশালাত অসমত ৩৩গৰাকী যুৱ তথা উঠি অহা প্ৰজন্মৰ সংগীতৰ প্ৰতিভাক প্ৰশিক্ষণ প্রদান কৰা হয়।
এই প্রশিক্ষণ প্রদান কাৰ্যসূচীত বিশেষভাৱে উপস্থিত থাকে অংগৰাগ পাপন মহন্ত, জয় বৰুৱা, ধ্ৰুৱজ্যোতি ফুকন, শাশ্বতী ফুকন, নীলোৎপল বৰা, শংকুৰাজ কৌৱৰ, তৰালি শৰ্মা, নিখিল পল জৰ্জ আৰু নীতিন শংকৰ।
এই অনুষ্ঠানত বিশেষভাৱে সহযোগ কৰে অ’ছম আছাম (অসম পৰ্যটন উন্নয়ন নিগম), সাংস্কৃতিক পৰিক্ৰমা মন্ত্ৰালয়, অইল ইণ্ডিয়া লিমিটেড, ষ্টেট বেংক অৱ ইণ্ডিয়া, মেক্স চিমেণ্ট লিমিটেডে৷
লগতে সহযোগী স্পনছৰ হিচাপে থাকে ছিষ্টাৰ মছলা। ভ্ৰমণ সহযোগী হিচাপে মেৰিডিয়ান মটৰ্ছ কিয়া, সম্প্ৰচাৰ সহযোগী হিচাপে ৰামধেনু, সংবাদ মাধ্যম সহযোগী হিচাপে ‘নিয়মীয়া বাৰ্তা’, আলোচনী সহযোগী হিচাপে ‘আইনা জীৱনৰ’, ৰেডিঅ’ সহযোগী হিচাপে ৯২.৭ এফ. এম, আৰু টি ছিৰিজে সহযোগিতা আগবঢ়ায়।
আনহাতে প্রথম বাৰ্ষিক মনতুলিকা উৎসৱ তিনিদিনীয়া কাৰ্যসূচীৰে কেইবাগৰাকীও প্ৰতিষ্ঠিত চিত্ৰশিল্পীৰ উপস্থিতিত আয়োজন কৰা হয়। লুইতৰ বুকুত সৃষ্টিশীলতাৰ পৰশ তুলি আয়োজন কৰা মনতুলিকা উৎসৱত উপস্থিত থাকে ননী বৰপূজাৰী, সমীৰণ বৰুৱা, চম্পক বৰবৰা, নিখিলেশ্বৰ বৰুৱা, মধুসূদন দাস, খনীন দাস আৰু ভৃগুপতি হাজৰিকা।
ৰাউল কৌশিক নাথ ফাউণ্ডেচনৰ মেনেজিংট্ৰাষ্টী কৌশিক নাথে অনুষ্ঠানকেইটালৈ সহযোগ আগবঢ়োৱাৰ বাবে জনসাধাৰণৰ লগতে স্পনছৰসকলক ধন্যবাদ আৰু কৃতজ্ঞতা জ্ঞাপন কৰে।
তেওঁ লগতে অনাগত দিনত ফাউণ্ডেচনৰ উদ্যোগত উঠি অহা প্রজন্মৰ ছবি নিৰ্মাতাসকলৰ সহায়ক হোৱাকৈ চিত্ৰনাট্যৰ ওপৰতো কৰ্মশালাৰ আয়োজন কৰা হ’ব বুলি জানিবলৈ দিয়ে।
