গুৱাহাটীত ৯০০ বিচনাযুক্ত ক’ভিড চিকিৎসালয় মুকলি

অসমৰ স্বাস্থ্য মন্ত্ৰী হিমন্ত বিশ্ব শৰ্মাই বুধবাৰে গুৱাহাটীত ৯০০ বিচনাযুক্ত এক ক’ভিড চিকিৎসালয় মুকলি কৰিছে।

খানাপাৰাৰ পশু চিকিৎসা বিজ্ঞান মহাবিদ্যালয়ৰ খেলপথাৰত এই চিকিৎসালয়খন স্থাপন কৰা হৈছে।

“পজিটিভ কেছৰ বৰ্ধিত সংখ্যাৰ মাজত ই আমাৰ চিকিৎসা সক্ষমতা সবল কৰিব,” চিকিৎসালয়খন মুকলি কৰাৰ পিছত স্বাস্থ্য মন্ত্ৰী শৰ্মাৰ টুইট।

তেওঁ লগতে সদৰী কৰা মতে চিকিৎসালয়খনত ৰোগীসকলৰ বাবে সংলগ্ন বাথৰুমৰ সৈতে ব্যক্তিগত কোঠাৰ ব্যৱস্থা কৰা হৈছে।

অসমত বিশেষকৈ গুৱাহাটী মহানগৰীত শেহতীয়াকৈ ক’ভিড ৰোগীৰ সংখ্যা ব্যাপকভাৱে বৃদ্ধি পাইছে।

শেহতীয়াকৈ মিৰ্জাস্থিত পতঞ্জলি যোগপীঠত থকা কুৱাৰেণ্টিন কেন্দ্ৰকো ক’ভিড চিকিৎসালয়লৈ পৰিৱৰ্তন কৰা হৈছিল।

ইফালে গুৱাহাটীৰ মহেন্দ্ৰ মোহন চৌধুৰী হস্পিটেলতো বুধবাৰে এটা ক’ভিড পৰীক্ষাগাৰ মুকলি কৰা হৈছে।

Inaugurated a 900-bed #COVID19 care hospital today at Khanapara field, Guwahati, in presence of MoS @Pijush_hazarika. It has individual rooms with attached bathrooms for patients.

It shall strengthen our treatment capacity amid rising number of positive cases.#AssamCares pic.twitter.com/qj0hzK1w5a

— Himanta Biswa Sarma (@himantabiswa) July 1, 2020

ৰাজ্যত ১৩সংখ্যক ক’ভিড লেবটো মুকলি কৰি স্বাস্থ্য মন্ত্ৰীয়ে কয় যে শীঘ্ৰে আৰু ছটা ক’ভিড পৰীক্ষাগাৰ মুকলি কৰা হ’ব।

অসমত ১৮৪গৰাকী ব্যক্তিয়ে বুধবাৰে আৰোগ্য লাভ কৰিছে।

অসমৰ বিভিন্ন অসামৰিক, জিলা আৰু আদৰ্শ চিকিৎসালয়ৰ পৰা তেওঁলোকক মুকলি কৰি দিয়া হৈছে।

এইসকল ব্যক্তিক মুকলি কৰি দিয়াৰ পিছত অসমত সক্ৰিয় ক’ভিড ৰোগীৰ সংখ্যা হৈছে ২৭০১গৰাকী।

অসমত এতিয়ালৈকে ক’ভিডৰ পৰা আৰোগ্য হৈছে মুঠ ৫৮৩১গৰাকী ব্যক্তি।

অসমত এতিয়ালৈকে চিনাক্ত মুঠ ক’ভিড ৰোগীৰ সংখ্যা হৈছে ৮৫৪৭গৰাকী।

ইয়াৰে ১২গৰাকীৰ মৃত্যু হোৱাৰ বিপৰীতে তিনিগৰাকী আন ঠাইলৈ স্থানান্তৰিত হৈছে।