মঙলদৈত ৩৫ লাখ টকা মূল্যৰ অবৈধ অৰুণাচলী সুৰা, দুখন ট্ৰাক জব্দ

আবকাৰী চোৰাংচোৱা বিভাগৰ এটা দলে মঙলদৈ আৰক্ষীৰ সহযোগত বৃহস্পতিবাৰে জব্দ কৰে ৩৫লাখ টকাৰ অবৈধ অৰুণাচলী সুৰা আৰু দুখন ট্ৰাক।

গোপন খবৰৰ ভিত্তিত চলোৱা অভিযানটোত মঙলদৈৰ এন আৰ এল পেট্ৰল পাম্পৰ সমীপত যুটীয়া দলটোৱে ১০ চকীয়া ট্ৰাক দুখনৰ সৈতে জব্দ কৰে ২৪০০ কেছ অৰুণাচলী সুৰা।

বিভাগীয় সূত্ৰ মতে, অৰুণাচল প্ৰদেশৰ পৰা আন্তঃৰাজ্যিক সীমা পাৰ হৈ বাহনকেইখন মঙলদৈত প্ৰৱেশ কৰিছিল।

আবকাৰী চোৰাংচোৱা দলটোৱে বাহন ক্ৰমে NL-01 L-6374 আৰু RJ-52G A-1305 পঞ্জীয়ন নম্বৰৰ বাহন দুখন পিচ লয়।

লকডাউনৰ মাজত চাৰি ঘণ্টাজোৰা অভিযানৰ অন্তত মঙলদৈ আৰক্ষীৰ সহযোগত জব্দ কৰিবলৈ সক্ষম হয়।

কেন্দ্ৰীয় গৃহ মন্ত্ৰ্যালয়ে ইয়াৰ শেহতীয়া নিৰ্দেশনাত দেশজুৰি সুৰাৰ বিক্ৰীত নিষেধাজ্ঞা আৰোপ কৰিছিল।

অসমৰ আবকাৰী মন্ত্ৰী পৰিমল শুক্লবৈদ্যই অবৈধ সুৰাৰ ওপৰত অভিযান চলোৱা যুটীয়া দলটোলৈ কৃতজ্ঞতা জ্ঞাপন কৰিছে।

আবকাৰী মন্ত্ৰীৰ জনসম্পৰ্কৰক্ষী বিষয়া শৈলেন্দ্ৰ পাণ্ডেই কয় যে আবকাৰী আয়ুক্তই অবৈধ সুৰাৰ বেহাত জৰিতসকলৰ ওপৰত অসম আবকাৰী আইনৰ অধীনত কঠোৰ ব্যৱস্থা ল’বলৈ নিৰ্দেশ দিছে।