ছত্তিগড়ত মাওবাদী আক্ৰমণত ছহিদ হৈছে অন্য এক বীৰ অসম সন্তান বাবলু ৰাভা।
কেন্দ্ৰীয় সংৰক্ষিত আৰক্ষী বাহিনী(CRPF)ৰ ২১০ নং কোব্ৰা বেটেলিয়নৰ জোৱান অসমৰ দুধনৈৰ সন্তান বাবলু ৰাভা দেশৰ অন্য চাৰিজন বীৰ সন্তানৰ সৈতে ছহিদীবৰণ কৰিছে।
উল্লেখ্য যে শনিবাৰে ছত্তিশগড়ৰ বিজাপুৰ আৰু চুকমা জিলাৰ সীমান্তৰ মাওবাদী অধ্যুষিত পাহাৰীয়া অৰণ্যাঞ্চলত মাওবাদীৰ বিৰুদ্ধে অভিযান চলাবলৈ যোৱা নিৰাপত্তা বাহিনীৰ ওপৰত মাওবাদীয়ে অতৰ্কিতে ভয়ংকৰভাৱে আক্ৰমণ সংঘটিত কৰে।
উক্ত আক্ৰমণত অসমৰ বীৰ সন্তান বাবলু ৰাভাসহ অন্য চাৰিগৰাকী জোৱান ছহিদ হোৱাৰ উপৰি অতি কমেও ৩০ জন জোৱান আহত হৈছে।
ছহিদ বাবলু ৰাভাৰ ঘৰ গোৱালপাৰা জিলাৰ দুধনৈৰ নিকটৱৰ্তী দামৰা পাটপাৰাত।
পত্নী আৰু এগৰাকী ৭ বছৰীয়া কন্যা সন্তানক এৰি যোৱা বাবলু ৰাভাই ৯ বছৰ পূৰ্বে CRPFৰ কোব্ৰা বেটিলিয়নত যোগ দিছিল।
যোৱা ডিচেম্বৰত ঘৰলৈ অহা বাবলু ৰাভাৰ ছহিদীবৰণৰ খবৰ পোৱাৰ মাত্ৰকে দামৰাস্থিত তেওঁৰ ঘৰখনৰ লগতে সমগ্ৰ অঞ্চলটোত শোকৰ ছাঁ পৰিছে।
ছহিদ বাবলু ৰাভাৰ নশ্বৰ দেহ দেওবাৰে সন্ধিয়া অথবা সোমবাৰে দুধনৈৰ নিজা বাসগৃহত আহি পাবহি বুলি জানিব পৰা গৈছে।
