সন্মুখত স্বাধীনতা দিৱস। স্বাধীনতা দিৱস উলহ-মালহেৰে উদযাপন কৰিবলৈ সাজু হৈছে চৰকাৰ তথা জনতা। ইয়াৰ মাজতে ধাৰাসাৰ বৰষুণৰ আগজাননীয়ে অসমত বৰষুণে স্বাধীনতা দিৱসৰ আনন্দ পানী কৰিব পাৰে বুলি বহুতে আশংকা কৰিছে। শেহতীয়াকৈ উৎকট গৰমে দহিছে ৰাজ্যৰ বিভিন্ন প্ৰান্ত।বহু ঠাইত আহো আহোকৈয়ো অহা নাই শীতল বৰষুণ এজাক। পৰ্যাপ্ত বৰষুণৰ অভাৱত ৰাজ্যৰ বহু ঠাইৰ পথাৰত চিৰাল ফাঁট মেলাও দেখা গৈছে।
এনে সময়তে কেন্দ্ৰীয় বতৰ বিজ্ঞান কেন্দ্ৰই ৰাজ্যবাসীক দিছে এক আশাৰ খবৰ। ৰাজ্যবাসীক গৰমৰ পৰা সকাহ দিব পৰাকৈ ১২-১৬ আগষ্টলৈ ৰাজ্য খনৰ বিভিন্ন স্থানত হ’ব বৰষুণ।
ভাৰতীয় বতৰ বিজ্ঞান কেন্দ্ৰ মতে গুজৰাটৰ সৌৰাষ্ট্ৰ আৰু পশ্চিম বংগৰ পশ্চিম অংশত সৃষ্টি হোৱা সাগৰীয় ঘূৰ্ণীবতাহৰ ফলত নিম্ন চাপৰ সৃষ্টি হৈছে। উত্তৰ বংগোপসাগৰতো নিম্ন চাপৰ সৃষ্টি হৈছে।ক্ৰমাৎ ত অধিক শক্তিশালী হ’বলৈ ধৰিছে।
এনে নিম্ন চাপৰ ফলতে অসমকে ধৰি উত্তৰ-পূবৰ ৰাজ্য সমূহত ৬৪.৫ মিমি-১১৫.৫ মিমি পৰ্যন্ত বৰষুণ হোৱাৰ সম্ভাৱনা আছে। অসমত ১৩-১৬ আগষ্টৰ ভিতৰত সৰ্বাধিক বৰষুণ হ’ব বুলি বতৰ বিজ্ঞান কেন্দ্ৰই প্ৰকাশ কৰিছে।
কেন্দ্ৰীয় বতৰ বিজ্ঞান কেন্দ্ৰই প্ৰকাশ কৰা তথ্য অনুসৰি উক্ত দিন কেইটাত অসমকে ধৰি সমগ্ৰ উত্তৰ পূৰ্বাঞ্চলত বৰষুণ হ’ব।
বতৰ বিজ্ঞান কেন্দ্ৰৰ মতে এই দিনটোত বৰষুণৰ লগতে বতাহেও কোবাই যাব অসম তথা উত্তৰ পূবক।
অসমৰ উপৰি নাগালেণ্ড.মণিপুৰ,অৰুণাচল প্ৰদেশ,মেঘালয় আৰু ছিকিমতো বিজুলী গাজনিৰে ধাৰাসাৰ বৰষুণ হ’ব বুলি বতৰ বিজ্ঞান কেন্দ্ৰই প্ৰকাশ কৰিছে।
