বোকাখাতৰ মহকুমাধিপতিৰ কাৰ্যালয়ৰ সভাকক্ষত কৃষি মন্ত্রী অতুল বৰাৰ উপস্থিতিত আফ্ৰিকান ছোৱাইন ফিভাৰৰ সন্দৰ্ভত এখনি জৰুৰী বৈঠক অনুষ্ঠিত হয়।
বৈঠকত মন্ত্রী গৰাকীয়ে মহকুমাটোত আফ্ৰিকান ছোৱাইন ফিভাৰৰ বৰ্তমানৰ পৰিস্থিতি সম্পৰ্কে জিলা তথা মহকুমা পশু চিকিৎসা বিভাগৰ মুৰব্বী বিষয়াসকলৰ লগত আলোচনা কৰে।
বৈঠকত মন্ত্ৰী বৰাই বিভাগক সষ্টম হৈ থকাৰ লগতে মহকুমাটোৰ গাহৰি পালকসকলক যথাবিহিত সহায় সহযোগিতা আগবঢ়াবলৈ নিৰ্দেশ দিয়ে।
মহকুমা পশু চিকিৎসা বিভাগে জানিবলৈ দিয়া মতে বোকাখাতৰ তিনিটা মৌজাত তিনিটাকৈ টাস্ক ফৰ্চ গঠন কৰাৰ লগতে আজিৰ পৰা মহকুমাটোৰ গাহৰি পালিত অঞ্চলসমূহত জনস্বাস্থ্য কাৰিকৰী বিভাগৰ দ্বাৰা বীজানুমুক্ত কৰাৰ ব্যৱস্থা কৰা হৈছে।
কাজিৰঙা ৰাষ্ট্ৰীয় উদ্যানৰ বনৰীয়া গাহৰিলৈ যাতে এই ৰোগ সংক্ৰমিত নহয় তাৰ প্ৰতি সতৰ্ক দৃষ্টি ৰাখি বিহিত ব্যৱস্থা লোৱা বুলি বৈঠকত মন্ত্ৰী বৰাক অৱগতে কৰে উদ্যান কৰ্তৃপক্ষই।
বৈঠকত মহকুমা পশু চিকিৎসা বিভাগে দিয়া তথ্য অনুসৰি মহকুমাটোত প্ৰায় ৩০ হাজাৰটা পোহনীয়া গাহৰি আছে আৰু ইয়াৰে ৭৩৫ টা গাহৰিৰ বিভিন্ন কাৰণত মৃত্যু হৈছে। মৃত গাহৰিৰ নমুনা পৰীক্ষাগাৰলৈ প্ৰেৰণ কৰা হৈছে।
বৈঠকৰ অন্তত মন্ত্রী বৰাই কাজিৰঙাৰ অগৰাতলী বনাঞ্চলৰ লগতে মহকুমাটোৰ বিভিন্ন গাহৰি পালন কৰা এলেকাসমূহৰ পৰিদৰ্শন কৰি পৰিস্থিতিৰ বুজ লয়।
উক্ত বৈঠকত মহকুমাধিপতি বিবেক শ্যাম, চক্ৰ বিষয়া মানসজ্যোতি নাথ, সহকাৰী আয়ুক্তদ্বয় শান্তনু গগৈ আৰু ৰণনময় ভৰদ্বাজ, চক্ৰ বিষয়া সংলগ্ন শ্বগুফতা অঞ্জুম চোহেলী, কাজিৰঙা ৰাষ্ট্ৰীয় উদ্যানৰ সঞ্চালক পি.শিৱকুমাৰ, পূব অসম বন্যপ্ৰাণী সংমণ্ডল প্ৰাধিকাৰী ৰমেশ কুমাৰ গগৈ, বোকাখাত মহকুমা পশু চিকিৎসা বিষয়া ডা০ ৰঞ্জিত বৰাৰ লগতে জনস্বাস্থ্য কাৰীকৰি বিভাগৰ লোক উপস্থিত থাকে।
