অসমৰ পৰা মুম্বাইত থিতাপি লোৱা অভিনেত্ৰী, মডেল তৰা খাছগিৰ গিৰীয়েক ড০ ৰেজা বোৰহানিক মুম্বাই আৰক্ষীয়ে নিষিদ্ধ ড্ৰাগছৰ সৈতে যোৱা ২২ নৱেম্বৰত গ্ৰেপ্তাৰ কৰিছে।
৫০ বছৰীয়া বোৰহানিক মুম্বাইৰ ক্ৰাইম ব্ৰান্সৰ এণ্টি নাৰ্কটিক চেলে গ্ৰেপ্তাৰ কৰিছে আৰু তেওঁৰ পৰা জব্দ কৰা ড্ৰাগছখিনিৰ মূল্য প্ৰায় ১ কোটি টকা হ’ব।
ড্ৰাগছবিধ এল এছ ডি নামৰ এবিধ হাই এণ্ড ছিন্থেটিক পাৰ্টি ড্ৰাগ বুলি আৰক্ষীয়ে জানিবলৈ দিছে।
সূত্ৰটোৰ মতে, বোৰহানি Cannabis Health and Sciences Private Limited ৰ প্ৰতিষ্ঠাপক। তেওঁক আৰক্ষীয়ে এটা আন্তঃৰাষ্ট্ৰীয় ড্ৰাগ সৰবৰাহ চক্ৰৰ সৈতে জড়িত থকাৰ সন্দেহ কৰিছে। এই চক্ৰটোৱে ইউৰোপৰ পৰা ভাৰতলৈ ড্ৰাগছৰ চোৰাং সৰবৰাহ কৰে।
অৱশ্যে অভিনেত্ৰীগৰাকী এই ঘটনাৰ সৈতে জড়িত থকাৰ প্ৰমাণ এতিয়ালৈকে পোৱা নাই বুলি সূত্ৰটোৱে কয়।
নগাৱঁত জন্ম হোৱা তৰা খাছগিৰে প্ৰায় দুটা দশকৰ পূৰ্বেই মুম্বাইত অভিনয় আৰু মডেলিঙৰ কেৰিয়াৰ গঢ়ি তুলিছিল। তেওঁ মিছ গুৱাহাটী ১৯৯৩-ৰ প্ৰথম ৰানাৰ আপ আছিল।
২০০২ চনত বেষ্ট এছিয়ান মডেল খিতাপ লাভ কৰা তৰাই বোৰহানিৰ সৈতে মুম্বাইৰ এটা বঁটা বিতৰণী কাৰ্য্যসূচীত চিনাকি হৈছিল। ২০০৪ চনত দুয়ো বিবাহপাশত আবদ্ধ হয়।
ম’ডেলিং জগতত কেইবাটাও কৃতিত্ব থকা তৰাই বৰ্তমান সৌন্দৰ্য্য প্ৰতিযোগিতা আৰু মডেলিঙৰ বিচাৰক হিচাপে বিভিন্ন প্ৰতিযোগিতাত ভূমিকা পালন কৰে।
