নতুনকৈ স্থাপিত কেইবাখনো বিশ্ববিদ্যালয়ত শেহতীয়াকৈ চৰকাৰে উপাচাৰ্য্য নিযুক্তি দিয়াৰ বিপৰীতে এতিয়াও উপাচাৰ্য্য আৰু পঞ্জীয়কহীন হৈ ৰৈছে যোৰহাটৰ অসম মহিলা বিশ্ববিদ্যালয়।
যোৱা বছৰ মাৰ্চত ৰাজ্যজুৰি তোলপাৰ লগাৰ পিছত মুখ্য মন্ত্ৰী সৰ্বানন্দ সোণোৱালৰ পৰা আৰম্ভ কৰি বিধান সভাৰ অধ্যক্ষ তথা যোৰহাটৰ বিধায়ক হিতেন চন্দ্ৰ গোস্বামীলৈকে সকলোৱে বিষয়টোৰ মীমাংসা কৰাৰ আশ্বাস দিছিল।
কিন্তু এতিয়া আন বহুকেইগৰাকী উপাচাৰ্য্য নিযুক্তিৰ সময়তো মহিলা বিশ্ববিদ্যালয়ৰ বিষয়টোক লৈ অসম চৰকাৰে আনকি স্পষ্টীকৰণ এটাও নিদিয়াত ছাত্ৰীসকলে ক্ষুভিত হৈ পৰিছে।
তাৰোপৰি উপাচাৰ্য্যহীন বিশ্ববিদ্যালয়খনৰ মুঠ ১৫টা বিভাগৰ অধীনত স্নাতকোত্তৰ আৰু স্নাতক পাঠ্যক্ৰমৰ ব্যৱস্থা আছে যদিও নাই এগৰাকীও স্থায়ী অধ্যাপক বা সহযোগী অধ্যাপক!
বিশ্ববিদ্যালয়ৰ ৱে’বচাইট মতে বিভাগসমূহত মুঠ ৪৭গৰাকী সহকাৰী অধ্যাপক আছে। আৰু তেওঁলোকৰ ৩১ গৰাকী ‘তদৰ্থ ভিত্তিক’ আৰু ১৬গৰাকী ঠিকাভিত্তিক।
কিন্তু এবছৰ পাৰ হৈ যোৱাৰ পিছতো চৰকাৰে এখোজো আগ নবঢ়োৱাত বিশ্ববিদ্যালয়খন আৰু ইয়াৰ ডিগ্ৰীক লৈ সন্দিহান অৱস্থাতেই আছে অধ্যয়নৰত কেইবাশ ছাত্ৰী।
তাৰোপৰি ইতিপূৰ্বে বিশ্ববিদ্যালয়খনৰ ডিগ্ৰী লৈ চাকৰি কৰি থকা বহু ছাত্ৰীয়ে নিজৰ কেৰিয়াৰক লৈ আশংকাত ভুগিব লগা হৈছে।
বিশ্ববিদ্যালয়খনৰ পৰা উত্তীৰ্ণ কেবাগৰাকী ছাত্ৰী ইতিমধ্যে শিক্ষকৰ যোগ্যতা নিৰ্ণয়কাৰী ৰাষ্ট্ৰীয় প্ৰতিযোগিতামূলক পৰীক্ষা নে’ট (NET)টো উত্তীৰ্ণ হৈছে। কিছুসংখ্যক ছাত্ৰীয়ে ডিব্ৰুগড় আৰু নে’হু (NEHU) বিশ্ববিদ্যালয়ত এম ফিল আৰু ডক্তৰে’ট কৰি আছে। বহুবিলাক ছাত্ৰী চৰকাৰী, বেচৰকাৰী বিভিন্ন চাকৰিত মকৰল হৈ আছে।
২০১৮ বৰ্ষত সোণোৱাল চৰকাৰে বিশ্ববিদ্যালয়খনক এখন উচ্চ শিক্ষা প্ৰতিষ্ঠানলৈ সলনি কৰাৰ যো-জা চলাইছিল যদিও সমগ্ৰ অসমতে হোৱা প্ৰবল প্ৰতিবাদৰ বাবে চৰকাৰ থমকি ৰ’বলৈ বাধ্য হৈছিল।
অসম বিধান সভাতো বিশ্ববিদ্যালয়খনক লৈ চলিছিল তীব্ৰ বিতৰ্ক। তেতিয়া শিক্ষা মন্ত্ৰী হিমন্ত বিশ্ব শৰ্মাই বিশ্ববিদ্যালয় খনক এক পূৰ্ণাংগ ৰূপত গঢ় নিদিয়াৰ বাবে তৰুণ গগৈ নেতৃত্বাধীন কংগ্ৰেছ চৰকাৰক দোষাৰোপ কৰিছিল।
কিন্তু বিজেপিয়ে অসমত চৰকাৰ গঠনৰ তিনিটা বছৰ সম্পূৰ্ণ কৰাৰ পাছতো আজি পৰ্য্যন্ত বিশ্ববিদ্যালয়খনক পূৰ্ণাংগ ৰূপ দিব নোৱাৰিলে কিয়?
এতিয়া মহাবিদ্যালয়ৰ পৰা উন্নীত কৰি বিশ্ববিদ্যালয় কৰা ৰাজ্যৰ কেইবাখনো বিশ্ববিদ্যালয়ত উপাচাৰ্য্য নিয়োগ কৰাৰ পিছত প্ৰতিক্ৰিয়া কৰিছে বিশ্ববিদ্যালয়খনৰ ছাত্ৰী একতা সভাৰ সাধাৰণ সম্পাদিকা হিমাদ্ৰী শইকীয়াই।
“আমাৰ বিশ্ববিদ্যালয়ত কেতিয়ালৈ উপাচাৰ্য্য নিযুক্তি দিব তাক লৈ আমি এতিয়াও অনিশ্চয়তাত আছো। ২০১৮ চনৰ চেপ্তেম্বৰ মাহত অসম চৰকাৰে আমাক জনাইছিল যে অসম মহিলা বিশ্ববিদ্যালয়ৰ উপাচাৰ্য্যৰ লগতে ৭ টা পদৰ বাবে অনুমোদন জনোৱা হৈছে। কিন্তু সেই পদসমূহ এতিয়ালৈ পূৰণ হোৱা নাই,” শইকীয়াই জনায়।
চৰকাৰক ছাত্ৰীগৰাকীৰ প্ৰশ্ন, ২০১৮ চনত স্থাপন হোৱা মাজুলী সাংস্কৃতিক বিশ্ববিদ্যালয়ৰ বাবে উপাচাৰ্য্য নিযুক্তি হৈ গ’ল কিন্তু অসম মহিলা বিশ্ববিদ্যালয় প্ৰতিষ্ঠাৰ পাঁচ বছৰ হোৱাৰ পাছতো আজিলৈ উপাচাৰ্য্য নিযুক্তি নহ’ল কিয়?
২১/০৮/২০১৩ তাৰিখে এল জি এল ১৪৯/২০১১/৯২ জাননীযোগে ৰাজ্যিক বিশ্ববিদ্যালয় হিচাপে অসম বিধান সভাই অনা ২০১৩ৰ XXII আইনযোগে বিশ্ববিদ্যালয়খন প্ৰতিষ্ঠা হৈছিল।
ইউজিচি আইন ১৯৫৬ৰ ২২ ধাৰাৰ অধীনত আয়োগে নিৰ্দিষ্ট কৰি দিয়া অনুসৰি বিশ্ববিদ্যালয়খনে ডিগ্ৰী প্ৰদান কৰিব পাৰিব বুলি বিভাগীয় ৱে’বছাইটত উল্লেখ আছে।
লগতে পঢ়ক– অসম মহিলা বিশ্ববিদ্যালয়ৰ স্বীকৃতি অক্ষুণ্ণ থাকিব : বিধানসভাৰ অধ্যক্ষ হিতেন্দ্ৰনাথ গোস্বামী
