অসমৰ ৰাজনীতিত এক ঐতিহাসিক পট পৰিৱৰ্তন দেখিবলৈ পোৱা যাব। শাসক বিজেপিক ২০২৬ চনৰ বিধানসভা নিৰ্বাচনত প্ৰতিহত কৰিবলৈ একত্ৰিত হৈছে বিৰোধী ঐক্য। শেহতীয়া খবৰ অনুসৰি, বিৰোধী দলসমূহৰ নেতৃবৃন্দই কংগ্ৰেছৰ শীৰ্ষ নেতৃত্বৰ সৈতে এখন বৈঠকত মিলিত হৈছে। ২০২৬ চনৰ বিধানসভা নিৰ্বাচনত বিজেপিৰ অপশাসনৰ পৰা ৰাজ্যক মুক্তি দি এখন সমৃদ্ধ আৰু ন্যায়ভিত্তিক চৰকাৰ গঠন কৰাৰ লক্ষ্যৰে এই বৈঠকত সকলোৱে ঐক্যমতত উপনীত হয়।
কংগ্ৰেছৰ আহ্বানত ৰাইজৰ দল, অসম জাতীয় পৰিষদ, আঞ্চলিক গণ মৰ্চা, চিপিএম, চিপিআই, চিপিআই(এমএল) আৰু এপিএইচএলচিৰ সভাপতি আৰু ৰাজ্যিক সম্পাদকসকলে অংশগ্ৰহণ কৰা এই বৈঠকত অসমৰ ৰাজনৈতিক দৃশ্যপট পৰিৱৰ্তন কৰাৰ প্ৰতিশ্ৰুতি দিছে।
সভাপতি গৌৰৱ গগৈয়ে কয়, “বিজেপিৰ অন্যায়, অত্যাচাৰ আৰু দুৰ্নীতিৰ পৰা অসমবাসীক মুক্ত কৰি নতুন যুগৰ সূচনা কৰিবলৈ আমি সকলো একত্ৰিত হৈছো।”
বিধায়ক মনোৰঞ্জন তালুকদাৰ, বিধায়ক অখিল গগৈ, সাংসদ অজিত কুমাৰ ভূঞা আৰু অসম জাতীয় পৰিষদৰ সভাপতি লুৰীণজ্যোতি গগৈয়ে এই সিদ্ধান্তক সমৰ্থন কৰি কয় যে, এই ঐক্যই অসমৰ উন্নয়নৰ নতুন দুৱাৰ উন্মোচন কৰিব।
সাংসদ অজিত কুমাৰ ভূঞা (আঞ্চলিক গণ মৰ্চা), ৰাইজৰ দলৰ সভাপতি অখিল গগৈ, অসম জাতীয় পৰিষদৰ সভাপতি লুৰীণজ্যোতি গগৈ, চিপিএমৰ বিধায়ক মনোৰঞ্জন তালুকদাৰ আৰু ৰাজ্যিক সম্পাদক সুপ্ৰকাশ তালুকদাৰ, চিপিআইৰ কনক গগৈ, চিপিআই(এমএল)-ৰ বিবেক দাস আৰু এপিএইচএলচিৰ বিক্ৰম হাঞ্চে বৈঠকত অংশগ্ৰহণ কৰে। ইয়াৰোপৰি, বৈঠকত বহুকেইজন জ্যেষ্ঠ কংগ্ৰেছ নেতাও অংশগ্ৰহণ কৰে।
ইয়াৰ পূৰ্বে, আজিৰে ৰাজীব ভৱনত অনুষ্ঠিত প্ৰদেশ কংগ্ৰেছৰ ৰাজনৈতিক পৰিক্ৰমা সমিতিৰ বৈঠকতো একাধিক ইতিবাচক সিদ্ধান্ত গৃহীত হৈছে, যিবোৰে জনগণৰ সৈতে সীমাহীন সংযোগ স্থাপন কৰিব।
সভাপতি গৌৰৱ গগৈয়ে সংবাদমেলত জনায় যে, ৰাইজৰ সুখ-দুখ বুজিবলৈ ‘ৰাইজৰ পদূলিত ৰাইজৰ কংগ্ৰেছ’ শীৰ্ষক বিশেষ অভিযান আৰম্ভ কৰা হৈছে।
গগৈয়ে কয়, “অসমৰ চুকে-কোণে, গাঁৱে-ভূঞে গৈ কংগ্ৰেছ নেতাসকলে সাধাৰণ মানুহৰ সৈতে আলোচনা কৰিব আৰু তেওঁলোকৰ ঘৰত নিশা কটাব। বাগানীয়া, চৰঅঞ্চল, পাহাৰীয়া বা জনজাতীয় অঞ্চলসমূহতো এই সংযোগ স্থাপন কৰি আমি জনগণৰ হৃদয় জয় কৰিম।”
তেওঁ লগতে কয় যে, অসমৰ প্ৰতিটো অঞ্চলত বিশেষ সভাসমূহ অনুষ্ঠিত কৰা হ‘ব, য‘ত দলীয় সীমা অতিক্ৰম কৰি উদাৰমনা সমাজ সচেতক লোকসকলক আমন্ত্ৰণ জনোৱা হ‘ব। এই সভাসমূহ ৰাইজৰ মঞ্চ হিচাপে কাম কৰিব আৰু স্থানীয় বুদ্ধিজীৱী, সাহিত্যিক আৰু অৰ্থনীতিবিদসকলৰ মতামত গ্ৰহণ কৰি অৰ্থনৈতিক আৰু সাংস্কৃতিক উন্নয়নৰ পথ নিৰ্ধাৰণ কৰা হ‘ব।
ইয়াৰ উপৰি, ভোট চুৰি ৰোধৰ বাবে প্ৰায় ২৯ হাজাৰ বুথত ৮০-৯০ শতাংশ বিএলএ (Booth Level Agent) নিযুক্তিৰ ব্যৱস্থা গ্ৰহণ কৰা হৈছে আৰু এই মাহৰ শেষলৈ সেই প্ৰক্ৰিয়া সম্পূৰ্ণ কৰা হ‘ব।
গগৈয়ে লগতে যোগ কৰে, “কাজবোৰ সুন্দৰকৈ চলি আছে; এই ব্যৱস্থাই গণতন্ত্ৰক অধিক মজবুত কৰিব।”
দলটোৱে সাংস্কৃতিক ঐক্যৰ প্ৰতি সমৰ্থন জনাই অহা ১৮ নৱেম্বৰত প্ৰাণৰ শিল্পী জুবিন গাৰ্গদেৱৰ জন্মদিন উদযাপনৰ সৈতে সংগতি ৰাখি “কাঞ্চনজঙ্ঘা – সংস্কৃতি হওক মৈত্ৰীৰ মন্ত্ৰ” শীৰ্ষক বিশেষ সংগীতানুষ্ঠানৰ আয়োজন কৰিছে।
লগে লগে, তেওঁৰ প্ৰকৃতিপ্ৰেমৰ স্মৃতিত অসমৰ প্ৰতিটো বুথত নাহৰ পুলি ৰোপণৰ কাৰ্যসূচী গ্ৰহণ কৰি পৰিৱেশ সংৰক্ষণৰ প্ৰতি কংগ্ৰেছৰ প্ৰতিশ্ৰুতি পূৰণ কৰা হ’ব।
