ইৰান আৰু মধ্যপ্ৰাচ্যত শেহতীয়াকৈ বৃদ্ধি পোৱা সামৰিক সংঘাতে ভাৰতীয় চাহ উদ্যোগৰ লগতে বিশেষকৈ অসমৰ অৰ্থনীতিলৈ এক গুৰুতৰ সংকটৰ আগজাননী কঢ়িয়াই আনিছে। অসমৰ অৰ্থডক্স চাহৰ সৰ্ববৃহৎ বজাৰ হিচাপে পৰিচিত এই অঞ্চলটোত যুদ্ধৰ বাবে আকাশমাৰ্গ আৰু ইণ্টাৰনেট সেৱা বন্ধ হৈ পৰাৰ ফলত ব্যৱসায়িক যোগাযোগ সম্পূৰ্ণৰূপে ব্যাহত হৈ পৰিছে। ইয়াৰ ফলশ্ৰুতিত এই সংঘাত দীঘলীয়া হ‘লে ৰাজ্যখনৰ চাহ ৰপ্তানি ক্ষেত্ৰখনে বৃহৎ লোকচানৰ সন্মুখীন হোৱাৰ আশংকা প্ৰকট হৈ উঠিছে।
আগশাৰীৰ চাহ ৰপ্তানিকাৰক মোহিত আগৰৱালাই জানিবলৈ দিয়া মতে, মধ্যপ্ৰাচ্যৰ এই যুদ্ধই ভাৰতৰ চাহ ৰপ্তানিত বিৰূপ প্ৰভাৱ পেলাব। তেওঁ উল্লেখ কৰে যে অসমত উৎপাদিত মুঠ অৰ্থডক্স চাহৰ প্ৰায় ৫০ শতাংশ কেৱল ইৰানেই ক্ৰয় কৰে। শেহতীয়াকৈ অসম চৰকাৰে অৰ্থডক্স চাহৰ ৰাজসাহায্য প্ৰতি কিলোগ্ৰামত ১৫ টকালৈ বৃদ্ধি কৰাৰ পিছত উদ্যোগটোৱে উৎপাদন বৃদ্ধি পোৱাৰ লগতে ইৰান আৰু ইৰাকলৈ বৃহৎ পৰিমাণৰ চাহ ৰপ্তানি হোৱাৰ আশা কৰিছিল। কিন্তু সাম্প্ৰতিক পৰিস্থিতিত তেওঁলোকে কেৱল এই সমস্যাটোৰ দ্ৰুত সমাধান কামনা কৰিবলগীয়া হৈছে।
ভাৰতৰ কৃষি আৰু দ্ৰুত উপভোক্তা সামগ্ৰীৰ (FMCG) ক্ষেত্ৰত ইৰান এক অতি গুৰুত্বপূৰ্ণ বাণিজ্যিক অংশীদাৰ। অৰ্থনৈতিক অৱৰোধৰ বাবে ধন পৰিশোধৰ ব্যৱস্থা ইতিমধ্যে দুৰ্বল হৈ থকাৰ সময়তে যুদ্ধজনিত অনিশ্চয়তাৰ ফলত সামগ্ৰী প্ৰেৰণত পলম হোৱা, মূল্য লাভক লৈ আশংকা আৰু চুক্তি বাতিল হোৱাৰ দৰে সমস্যাই দেখা দিছে। গুৱাহাটী চাহ নিলাম কেন্দ্ৰৰ ক্ৰেতা সন্থাৰ সম্পাদক দীনেশ বিহানিয়ে প্ৰকাশ কৰা মতে, ইৰান আৰু পশ্চিম এছিয়াত চাহৰ চাহিদা হ্ৰাস পালে ভাৰতত মজুত থকা চাহৰ পৰিমাণ বৃদ্ধি পাব, যাৰ ফলত বিশেষকৈ উন্নত মানৰ অৰ্থডক্স চাহৰ মূল্য দ্ৰুতগতিত হ্ৰাস পোৱাৰ পূৰ্ণ সম্ভাৱনা আছে। বিকল্প বজাৰ এখন সৃষ্টি নহ’লে এই লোকচান পূৰণ কৰাটো অসম্ভৱ হৈ পৰিব।
উল্লেখযোগ্য যে, ২০২৫ বৰ্ষত ভাৰতৰ চাহ ৰপ্তানিয়ে ২৮০ মিলিয়ন কিলোগ্ৰামৰ সৰ্বকালৰ অভিলেখ স্পৰ্শ কৰিছিল। যোৱা বছৰৰ জানুৱাৰীৰ পৰা ছেপ্টেম্বৰ মাহৰ ভিতৰত ভাৰতে প্ৰায় ২৫৪.১৯ মিলিয়ন কিলোগ্ৰাম চাহ ৰপ্তানি কৰিছিল। ইয়াৰ ভিতৰত ইৰাকে ৪৮.৮৮ মিলিয়ন, ইৰানে ১০.৬৯ মিলিয়ন আৰু সংযুক্ত আৰব আমিৰশ্বাহীয়ে ৪৫.৬৬ মিলিয়ন কিলোগ্ৰাম চাহ ক্ৰয় কৰিছিল। ৰপ্তানিকাৰকসকলৰ মতে, ইৰানলৈ যোৱা বেছিভাগ সামগ্ৰী ডুবাইৰ মাজেৰেই প্ৰেৰণ কৰা হয়। সাম্প্ৰতিক পৰিস্থিতিৰ সন্দৰ্ভত ভাৰতীয় চাহ ৰপ্তানিকাৰক সন্থাৰ অধ্যক্ষ অংশুমান কানোৰিয়াই কয় যে বৰ্তমানৰ অৱস্থাত কোনো চূড়ান্ত মন্তব্য আগবঢ়োৱাটো সমীচীন নহ’ব। তেওঁলোক সামগ্ৰিক পৰিস্থিতিক লৈ চিন্তিত যদিও ভৱিষ্যতলৈ এই সংঘাত কেনে দিশে গতি কৰে, সেয়া পৰ্যবেক্ষণ কৰিহে পৰৱৰ্তী পদক্ষেপ গ্ৰহণ কৰিব বুলি জানিবলৈ দিয়ে।
