কালি নিশা অসম চৰকাৰৰ মুখপাত্ৰস্বৰূপ এটা হোৱাটছএপ গ্ৰুপত এটা খবৰ আহিছিল যে জনসাধাৰণলৈ অসম আৰক্ষীৰ বিশেষ গোহাৰি।
DIPR ASSAM শীৰ্ষক এই গ্ৰুপটোত এটা নম্বৰৰ পৰা আহিছিল গোহাৰিখন। য’ত অসম আৰক্ষীৰ চিহ্ন সম্বলিত ১৩ টা পৰামৰ্শ সম্বলিত জাননী প্ৰকাশ কৰিছিল। চৰকাৰৰ মুখপাত্ৰস্বৰূপ এই গ্ৰুপত জাননীখন লাভ কৰি সেই সন্দৰ্ভত নৰ্থ ইষ্ট নাওত নিশাৰ ভাগতে বাতৰি প্ৰকাশ পাইছিল।
তাৰ পাছতে অসম আৰক্ষীয়ে এইটো এক ভুৱা বাতৰি আখ্যা দিয়ে।
প্ৰথম কথা অসম চৰকাৰৰ মুখপাত্ৰ হৈছে এই তথ্য আৰু জনসংযোগ বিভাগ। দ্বিতীয়তে অসমৰ যিকোনো প্ৰান্তৰ পৰা অহা ভুৱা খবৰ বোৰ প্ৰকৃততে ভুৱা বুলি ৰাইজৰ মাজত প্ৰচাৰ কৰে এই বিভাগে। এটা অৰ্থত ই ৰাজ্য চৰকাৰৰ FACT-CHECKER হিচাপে কাম কৰে।
কিন্তু তেনে এক দায়িত্বশীল বিভাগৰ হোৱাটছএপ গ্ৰুপতে ভাইৰেল হৈছে ভুৱা খবৰ। যি খবৰ যোৱা নিশা ১০:৩০ বজাত কোনো এজন চৰকাৰী বিষয়াই আপলোড কৰিছিল। এই কাণ্ডৰ পাছতে পুনৰবাৰ পোহৰলৈ আহিছে জন-সংযোগ বিভাগৰ কাণ্ডজ্ঞানহীনতাৰ ছবিখন।
তাৎপয্যপূৰ্ণভাৱে, সেই ভুৱা খবৰ প্ৰচাৰ কৰাৰ প্ৰায় ১৫ ঘন্টাৰ পাছতহে অসম আৰক্ষীৰ উচ্চ পৰ্যায়ৰ বিষয়াসকল এই বিষয়ে অৱগত হয়। ইপিনে, DIPR ASSAM গ্ৰুপৰ ফালৰ পৰাও উক্ত খবৰক লৈ বৰ্তমান পৰ্য্ন্ত কোনোধৰণৰ স্পষ্টীকৰণ অহা নাই।
উল্লেখযোগ্য যে, কালি প্ৰেৰণ কৰা উক্ত ভুৱা গোহাৰিত ‘মাস্ক পিন্ধাৰ সুযোগ লৈ অপৰাধীয়ে আপোনাৰ লগত সংঘটিত কৰিব পাৰে নানা অপৰাধ’ বুলি উল্লেখ কৰি তাৰ বাবে জনসাধাৰণে কেনেধৰণে সাৱধানতা উল্লেখ কৰিব তাৰ বিষয়ে ১৩ টা পৰামৰ্শ দাঙি ধৰিছিল।
তাৰ ভিতৰত কেইটামান ভুৱা পৰামৰ্শ তলত উল্লেখ কৰা হ’ল।
১)মহিলাসকলক বেছি আ-অলংকাৰ পৰিধান কৰি ঘৰৰ পৰা বাহিৰলৈ নোলাবলৈ পৰামৰ্শ অসম আৰক্ষীৰ।
২) নিৰ্জন বা অন্ধকাৰ ৰাস্তাৰে অকলে নাযাব বুলি পৰামৰ্শ।
৩) পাৰ্চ বা মানিবেগত মূল্যৱান সামগ্ৰী, অলংকাৰ, নগদ ধনৰাশি বেছিকৈ নাৰাখিবলৈ পৰামৰ্শ অসম আৰক্ষীৰ।
৪) অচিনাকী ব্যক্তিৰ পৰা চেনিটাইজাৰ, মাস্ক আৰু খাদ্য সামগ্ৰী ন’লব।
৫) অচিনাকী ব্যক্তিক আপোনাৰ ঘৰলৈ চেনিটাইজ কৰিবৰ বাবে আহিব নিদিব।
৬) বেছি টকা-পইচা লৈ বজাৰলৈ নাযাব। তাৰ পৰিৱৰ্তে অনলাইন বা বৈদ্যুতিক মাধ্যম প্ৰয়োগ কৰি ধন আদায় দিয়ক।
ইপিনে, ইয়াক আৰক্ষীৰ শীৰ্ষ মহলে ভুৱা বুলি আখ্যা দিছে যদিও বৰ্তমানলৈকে আনুষ্ঠানিকভাৱে কোনো স্পষ্টীকৰণ দিয়া নাই অসম আৰক্ষীয়ে।
