ওদালগুৰিত ১২ ফ্ৰেব্ৰুৱাৰিত অনুষ্ঠিত হোৱা এখন প্ৰতিবাদী সভাত অসম আৰক্ষীৰ এজন কৰ্তব্যৰত জোৱানে বিদ্ৰোহী সংগঠন এন ডি এফ বিৰ সমৰ্থনত ‘‘এন ডি এফ বি লং লিভ’’ লিখা প্লে কাৰ্ড লৈ থকা থকাৰ এখন ফটো ছ’চিয়েল মিডিয়াত ভাইৰেল হোৱাক কেন্দ্ৰ কৰি এতিয়া অস্বস্তিত পৰিছে অসম আৰক্ষী।
মঙলবাৰে বড়ো মহিলা ন্যায়ৰক্ষী সমিতি, বি পি চি পি আই আৰু এচ আই পি আৰৰ উদ্যোগত ৩০ অক্টোবৰৰ বোমা বিস্ফোৰণত দোষী সাব্যস্ত হোৱা এন ডি এফ বিৰ অধ্যক্ষ ৰঞ্জন দৈমাৰীৰ মুক্তি বিচাৰি ওদালগুৰিত এখন প্ৰতিবাদী সভা অনুষ্ঠিত কৰা হৈছিল। উক্ত সভাতে আবেগক সম্বৰণ কৰিব নোৱাৰি ডিঙিত আৰণাই পৰিহিত আৰক্ষী জোৱান এজনে প্ৰতিবাদকাৰীৰ হাতৰ পৰা বিদ্ৰোহী সংগঠনটোৰ সমৰ্থনত লিখা প্লে কাৰ্ড লৈ প্ৰতিবাদত অংশগ্ৰহণ কৰে।
সূত্ৰৰ পৰা লাভ কৰা খবৰ অনুসৰি আৰক্ষী জোৱানজন লক্ষ্যধৰ ডেকা বুলি চিনাক্ত কৰা হৈছে। মঙলবাৰে জোৱানজন ওদালগুৰি চহৰত কৰ্তব্যৰত আছিল। ইতিমধ্যে ওদালগুৰি আৰক্ষীয়ে বিষয়টো গুৰুত্বসহকাৰে লৈ জোৱানজনৰ এনে কাৰ্য্যৰ বাবে জেৰা অব্যাহত ৰাখিছে। এজন শীৰ্ষ পৰ্য্যায়ৰ আৰক্ষী বিষয়াই ঘটনাত দোষী সাব্যস্ত হ’লে জোৱানজনক নিলম্বন কৰা হ’ব বুলি মন্তব্য কৰে।
উল্লেখযোগ্য যে, চি বি আইৰ বিশেষ আদালতে ২০০৮ চনৰ ৩০ অক্টোবৰত ৰাজ্যত সংঘটিত ধাৰাবাহিক বোমা বিস্ফোৰণৰ ঘটনাৰ গোচৰত এন ডি এফ বিৰ অধ্যক্ষ ৰঞ্জন দৈমাৰীক দোষী সাব্যস্ত কৰি আজীৱন কাৰাদণ্ডৰে দণ্ডিত কৰিছিল।
