শিৱসাগৰৰ বিহুবৰৰ প্ৰজাবস্তিত বীৰ লাচিত সেনাৰ কৰ্মী মানসজ্যোতি চেতিয়াৰ ৰহস্যজনক মৃত্যুক লৈ অসম আৰক্ষীয়ে তদন্ত অধিক তীব্ৰ কৰি তুলিছে। মুখ্যমন্ত্ৰী হিমন্ত বিশ্ব শৰ্মাৰ নিৰ্দেশৰ পিছতেই ঘটনাটোক গুৰুত্বসহকাৰে লৈ আৰক্ষীয়ে তদন্ত আগবঢ়াইছে।
এই ঘটনাক লৈ বিহুবৰ আৰক্ষী থানাত ১০/২৬ নম্বৰত এটা গোচৰ ৰুজু কৰা হৈছে। ভাৰতীয় ন্যায় সংহিতাৰ ১০৩(১) আৰু ৩(৫) ধাৰাত গোচৰটো ৰুজু কৰা হৈছে। শিৱসাগৰৰ এছ এছ পি পাপৰি চেতিয়া নেতৃত্বত তদন্ত চলি আছে আৰু তেওঁ নিজেই ঘটনাস্থলী পৰিদৰ্শন কৰিছে।
ইয়াৰ মাজতে আই জি (ই আৰ) কে জে শইকীয়া বিহুবৰৰ ঘটনাস্থলীলৈ ৰাওনা হৈছে। আনহাতে, ডি আই জি ডা০ ৰবীন কুমাৰৰ নেতৃত্বত এটা ফৰেনচিক দল গুৱাহাটীৰ পৰা শিৱসাগৰলৈ গৈ তদন্তত সহায় কৰিছে।
জানিব পৰা মতে, দেওবাৰে নিশা প্ৰায় ১০ বজাত প্ৰজাবস্তিৰ পথৰ কাষত গুৰুতৰভাৱে আহত অৱস্থাত মানসজ্যোতি চেতিয়াক উদ্ধাৰ কৰা হৈছিল। তেওঁক এটা ৰহস্যজনক পথ দুৰ্ঘটনাত আহত হোৱা বুলি জানিব পৰা গৈছে। পিছত তেওঁক ডিব্ৰুগড় মেডিকেল কলেজ হাস্পতালত ভৰ্তি কৰোৱা হয় যদিও চিকিৎসাধীন অৱস্থাতে তেওঁৰ মৃত্যু হয়।
মানসজ্যোতি চেতিয়াৰ মৃত্যুৰ পিছতে ঘটনাটো কেৱল দুৰ্ঘটনা নে পৰিকল্পিত হত্যাকাণ্ড, তাক লৈ সন্দেহ আৰু অভিযোগ উত্থাপন হৈছে। বীৰ লাচিত সেনাই ঘটনাটোৰ সম্পূৰ্ণ আৰু নিৰপেক্ষ তদন্তৰ দাবী জনাইছে। সংগঠনটোৰ মুখ্য প্ৰশাসনিক সম্পাদক শৃংখল চলিহাই মানসজ্যোতি চেতিয়াক ‘জাতীয় শ্বহীদ’ বুলি ঘোষণা কৰিছে।
ইফালে আৰক্ষীয়ে মানসজ্যোতি চেতিয়াৰ ম’বাইল ফোন উদ্ধাৰ কৰিছে। কিন্তু ম’বাইলটোৰ স্ক্ৰীণ লক সলনি কৰা হোৱা বুলি জানিব পৰা গৈছে। এই ঘটনাই তদন্তৰ মাজত নতুন সন্দেহৰ সৃষ্টি কৰিছে।
বৰ্তমান আৰক্ষীয়ে ঘটনাটোৰ সকলো দিশ পৰীক্ষা কৰি আছে। মানসজ্যোতি চেতিয়াৰ মৃত্যুৰ প্ৰকৃত কাৰণ আৰু ইয়াৰ আঁৰত আন কোনো ঘটনা আছে নেকি, সেই বিষয়ে তদন্ত সম্পূৰ্ণ হোৱাৰ পিছতহে স্পষ্ট হ’ব।
