অসমত আগন্তুক ৰঙালী বিহুৰ পূৰ্বেই বিধানসভা নিৰ্বাচন অনুষ্ঠিত হোৱাৰ পূৰ্ণ সম্ভাৱনা দেখা দিছে। নিৰ্বাচনী প্ৰস্তুতিৰ বুজ ল’বলৈ শনিবাৰে নিৰ্বাচন আয়োগৰ এটা সঁজাতী দল দুদিনীয়া ভ্ৰমণসূচীৰে গুৱাহাটীত উপস্থিত হৈছে। মনিষ গাৰ্গ, পৱন কুমাৰ শৰ্মা, সঞ্জয় কুমাৰ আৰু ভানু কুমাৰ য়াতুবক লৈ গঠিত এই দলটোৱে ৰাজ্যৰ উচ্চপদস্থ বিষয়া তথা বিভিন্ন পক্ষৰ সৈতে আলোচনাত মিলিত হ’ব।
গুৱাহাটীত উপস্থিত হৈ নিৰ্বাচন আয়োগৰ দলটোৱে প্ৰতিখন জিলাৰ জিলা আয়ুক্ত আৰু জ্যেষ্ঠ আৰক্ষী অধীক্ষকসকলৰ সৈতে এক গুৰুত্বপূৰ্ণ বৈঠকত মিলিত হ’ব। ইয়াৰ উপৰি দলটোৱে ৰাজ্যৰ মুখ্য সচিব আৰু আৰক্ষী সঞ্চালক প্ৰধানৰ (DGP) সৈতেও সুকীয়া বৈঠকত বহিব। সূত্ৰ অনুসৰি, আয়োগৰ এই দলটোৱে শাসক আৰু বিৰোধী উভয় পক্ষৰ বিভিন্ন ৰাজনৈতিক দলৰ প্ৰতিনিধিৰ সৈতেও আলোচনাত মিলিত হোৱাৰ সম্ভাৱনা আছে।
অসম চৰকাৰে বিহুৰ পূৰ্বেই নিৰ্বাচনী প্ৰক্ৰিয়া সমাপ্ত কৰিবলৈ আয়োগক ইতিমধ্যে আহ্বান জনাইছে। এনে পৰিপ্ৰেক্ষিতত, এই ভ্ৰমণসূচী সমাপ্ত কৰি দলটোৱে দিল্লীলৈ উভতি যোৱাৰ পিছত ফেব্ৰুৱাৰীৰ শেষ সপ্তাহত নিৰ্বাচনৰ দিন ঘোষণা কৰাৰ সম্ভাৱনা আছে। অৱশ্যে তাৰ পূৰ্বে ভাৰতীয় নিৰ্বাচন আয়োগৰ এটা পূৰ্ণ পৰ্যায়ৰ দল অসমলৈ অহাৰ কথা। উল্লেখযোগ্য যে, আগন্তুক নিৰ্বাচনৰ বাবে ১০ ফেব্ৰুৱাৰীত চূড়ান্ত ভোটাৰ তালিকা প্ৰকাশ পাব।
অসমৰ লগতে পশ্চিমবংগ, তামিলনাডু, কেৰালা আৰু পুডুচেৰীত একে সময়তে নিৰ্বাচন অনুষ্ঠিত হ’ব। নিৰাপত্তাৰক্ষীৰ মোতায়েন আৰু আনুষঙ্গিক দিশসমূহৰ প্ৰতি লক্ষ্য ৰাখি আয়োগে প্ৰথমে অসম আৰু পশ্চিমবংগত ভোটগ্ৰহণ সম্পন্ন কৰাৰ পৰিকল্পনা কৰিছে। অসমত এইবাৰ নিৰ্বাচন দুটা পৰ্যায়ত অনুষ্ঠিত হোৱাৰ সম্ভাৱনা অধিক।
স্মৰ্তব্য যে, ২০২১ চনত ২৬ ফেব্ৰুৱাৰীত নিৰ্বাচন ঘোষণা কৰা হৈছিল আৰু অসমত তিনিটা পৰ্যায়ত (২৭ মাৰ্চ, ১ এপ্ৰিল আৰু ৬ এপ্ৰিল) ভোটগ্ৰহণ অনুষ্ঠিত হৈছিল। আনহাতে, ২০১৬ চনতো বিহুৰ পূৰ্বে দুটা পৰ্যায়ত (৪ এপ্ৰিল আৰু ১১ এপ্ৰিল) নিৰ্বাচন অনুষ্ঠিত হৈছিল। ৰাজ্যত বৰ্তমানৰ শান্তিপূৰ্ণ আইন-শৃংখলা পৰিস্থিতিৰ প্ৰতি লক্ষ্য ৰাখি এইবাৰো বিহুৰ পূৰ্বেই প্ৰক্ৰিয়াটো সমাপ্ত কৰাৰ লক্ষ্য লোৱা হৈছে।
এইবাৰৰ নিৰ্বাচনৰ আটাইতকৈ লক্ষণীয় বিষয়টো হ’ল সমষ্টি পুনৰ নিৰ্ধাৰণ । সমষ্টিৰ গাঁথনি আৰু সীমাৰ ব্যাপক পৰিৱৰ্তনৰ পাছত এয়া হ’ব ৰাজ্যৰ প্ৰথমটো বিধানসভা নিৰ্বাচন। সমষ্টিৰ মুঠ সংখ্যা (১২৬ খন আসন) একে থাকিলেও বহু পুৰণি সমষ্টি বিলুপ্ত হৈছে আৰু কেইবাটাও নতুন সমষ্টিৰ সৃষ্টি হৈছে।
