নাগৰিকত্ব সংশোধনী বিধেয়ক ৰাজ্যসভাত উত্থাপন নোহোৱাৰ পিছত নিজ ৰাজ্যত উপস্থিত হৈছে অসম প্ৰদেশ কংগ্ৰেছ কমিতিৰ নেতৃবৃন্দ। দিল্লীৰ পৰা আহি গুৱাহাটীৰ বৰঝাৰ বিমান বন্দৰত উপস্থিত হোৱাৰ লগে লগে কংগ্ৰেছ নেতৃত্বক বিপুল আদৰণি জনাই দলীয় কৰ্মকৰ্তা সকলে।
ৰাজ্যসভাত বিধেয়কৰ বিপক্ষে প্ৰথমৰে পৰা বলিষ্ঠ ভূমিকা পালন কৰি থকা অসমৰ সাংসদ ভূৱনেশ্বৰ কলিতা, ৰাণী নৰহৰ লগতে অসম প্ৰদেশ কংগ্ৰছ কমিতিৰ সভাপতি ৰিপুন বৰা, বিৰোধী দলপতি দেৱব্ৰত শইকীয়া আৰু ৰকিবুল হুছেইন দিল্লীৰ পৰা আহি গুৱাহাটীত উপস্থিত হয়।
বিধেয়ক প্ৰসংগত কংগ্ৰেছৰ স্থিতি সবল আছিল আৰু দলৰ ৰাষ্ট্ৰীয় সভাপতি ৰাহুল গান্ধীয়ে এই ক্ষেত্ৰত বলিষ্ঠ ভূমিকা পালন কৰি অসমৰ জনসাধাৰণৰ পক্ষত থিয় হৈছিল বুলি প্ৰদেশ কংগ্ৰেছৰ নেতৃত্বই মন্তব্য কৰে।
উল্লেখযোগ্য যে, বুধবাৰে বিজেপিৰ কেন্দ্ৰীয় চৰকাৰে নাগৰিকত্ব সংশোধনী বিধেয়ক ৰাজ্যসভাত উত্থাপন কৰাত ব্যৰ্থ হোৱাৰ পিছত সমগ্ৰ অসমতে আনন্দৰ বন্যা বৈছে। নাগৰিকত্ব সংশোধনী বিধেয়কৰ প্ৰসংগলৈ বিভিন্ন ৰাজনৈতিক দলক সাক্ষাৎ কৰাৰ বাবে দিল্লীত বাহৰ পাতি আছিল আছু, নেছ’, কৃষক মুক্তি সংগ্ৰাম সমিতিকে আদি কৰি অগপৰ নেতৃত্ব।
আনহাতে, বিজেপি দলৰ মন্ত্ৰী চন্দ্ৰ মোহন পাটোৱাৰীয়ে কাম-বন নথকা মানুহেহে আন্দোলন কৰে বুলি ৰাজ্যবাসীৰ উদ্দেশ্যে বিৰূপ মন্তব্য প্ৰকাশ কৰে।
