ৰাফেল যুদ্ধ বিমান ক্ৰয় কেলেংকাৰি, পে’ট্ৰল-ডিজেলকে ধৰি অত্যাৱশ্যকীয় সামগ্ৰীৰ মূল্যবৃদ্ধিৰ প্ৰতিবাদত আজি ৰাজপথলৈ ওলাই আহিল বিৰোধী দল কংগ্ৰেছ।
আজি মহানগৰীৰ লতাশিল খেলপথাৰৰ পৰা ঢোল-তাল আদি বাদ্য বজাই বিজেপি নেতৃত্বাধীন কেন্দ্ৰ আৰু ৰাজ্য চৰকাৰৰ বিৰুদ্ধে ৰাজভৱনলৈ সমদল উলিয়ায় দলটোৰ সহস্ৰাধিক নেতা-কৰ্মীয়ে।
প্ৰতিবাদকাৰী দলটোৰ নেতৃত্ব দিয়ে অসম প্ৰদেশ কংগ্ৰেছ কমিটীৰ সভাপতি ৰিপুন বৰা, বিৰোধী দলপতি দেৱব্ৰত শইকীয়াই। এই কাৰ্যসূচীত নিখিল ভাৰত কংগ্ৰেছ কমিটীৰ সাধাৰণ সম্পাদক তথা উত্তৰ-পূবৰ তত্ত্বাৱধায়ক হৰিশ ৰাৱত, ৰকিবুল হুছেইন, নীলমণি সেন ডেকাকে ধৰি কেইবাজনো প্ৰাক্তন মন্ত্ৰী, প্ৰাক্তন তথা বৰ্তমানৰ বিধায়ক উপস্থিত থাকে।
কংগ্ৰেছৰ দলটোৱে নৰেন্দ্ৰ মোদী চৰকাৰৰ বিৰুদ্ধে শ্ল’গান দি ৰাজভৱনলৈ প্ৰতিবাদী সমদল কৰাৰ অন্তত ৰাজ্যপালক সাক্ষাৎ কৰি তেওঁৰ জৰিয়তে ৰাষ্ট্ৰপতিলৈ স্মাৰকপত্ৰ প্ৰেৰণ কৰে।
প্ৰতিবাদৰ নেতৃত্ব দি প্ৰদেশ কংগ্ৰেছৰ সভাপতি ৰিপুণ বৰাই কয়, “ৰাফেল বিমান ক্ৰয় কেলেংকাৰি ভাৰতৰ সকলোতকৈ বৃহৎ কেলেংকাৰি। এই কেলেংকাৰিৰ কথা আমি কোৱা নাই, এইয়া স্বয়ং ফ্ৰান্সৰ প্ৰাক্তন ৰাষ্ট্ৰপতিয়ে কৈছে, বায়ুসেনা বাহিনীৰ চীফ মাৰ্চেলৰ ভাষ্যত প্ৰকাশ পাইছে।
“কংগ্ৰেছ চৰকাৰৰ দিনত ভাৰতে ফ্ৰান্সৰ লগত বায়ু সেনাৰ পৰামৰ্শ অনুসৰি ১২৬খন বিমান ক্ৰয়ৰ চুক্তি কৰিছিল। কিন্তু মোদী চৰকাৰে এই চুক্তি সলাই মাত্ৰ ৩৬খন বিমান ক্ৰয় কৰাৰ সিদ্ধান্ত লোৱাৰ কথাটো কোনেও গম নাপালে।” এইদৰে কয় ৰিপুণ বৰাই।
তেওঁ লগতে যুদ্ধ বিমান নিৰ্মাণৰ কোনো অভিজ্ঞতা নথকা ৰিলায়েন্স কোম্পানিক ৰাফেল বিমান নিৰ্মাণৰ কাম দিয়া বিষয়টোৰো বিৰোধিতা কৰে। ইয়াৰ উপৰি পে’ট্ৰল-ডিজেলকে ধৰি অত্যাৱশ্যকীয় সামগ্ৰীৰ মূল্যবৃদ্ধিতো তীব্ৰ আপত্তি কৰে।
প্ৰতিবাদত ভাগ লৈ নিখিল ভাৰত কংগ্ৰেছ কমিটীৰ সাধাৰণ সম্পাদক হৰিশ ৰাৱতে কয়, “বিজেপি চৰকাৰে ৰাইজক দিয়া প্ৰতিশ্ৰতি ৰক্ষা কৰাত সম্পূৰ্ণৰূপে ব্যৰ্থ হৈছে। এতিয়া এই চৰকাৰখনে দেশৰ সুৰক্ষাৰ লগত জড়িত বিষয়তো আপোচ কৰা দেখা গৈছে।”
কংগ্ৰেছে সমগ্ৰ দেশজুৰি ইয়াৰ বিৰুদ্ধে ব্যাপক আন্দোলন কাৰ্যসূচী গ্ৰহণ কৰি যাব বুলি ৰাৱতে মন্তব্য কৰে।
ইপিনে, আজিৰ এই প্ৰতিবাদী কাৰ্যসূচীত ভিন্ন ৰূপত দেখা গ’ল কেইবাজনো কংগ্ৰেছ নেতাক।
প্ৰতিবাদৰ সময়ত ৰাজভৱনৰ সন্মুখৰ বেৰিকেইডৰ ওপৰত বগাই প্ৰতিবাদ সাব্যস্ত কৰিলে নিখিল ভাৰত কংগ্ৰেছ কমিটীৰ সাধাৰণ সম্পাদক হৰিশ ৰাৱতে। কিন্তু ৰাৱতে বাঁহ এডালৰ ওপৰতে উঠি সাংবাদিকৰ আগত মন্তব্য প্ৰকাশ কৰি থকাৰ সময়তে ভাগি পৰে বেৰিকেইডৰ বাঁহডাল। কথমপি আঘাতৰ পৰা ৰক্ষা পৰে কংগ্ৰেছ নেতাজন। একেদৰে বেৰিকেইডৰ বাঁহত বগালে প্ৰাক্তন মন্ত্ৰী অকণ বৰায়ো।
আনহাতে, বেৰিকেইডৰ ওপৰত উঠি ভোৰতাল বজাই প্ৰতিবাদ সাব্যস্ত কৰা দেখা গ’ল সততে চৰ্চাত থকা মৰিয়নিৰ বিধায়ক ৰূপজ্যোতি কুৰ্মীক। তেওঁৰ ওচৰতে ঠিয় দিলে সৰুক্ষেত্ৰীৰ বিধায়ক জাৰিৰ হুছেইন শিকদাৰে।
