বিশ্ব মাতৃভাষা দিৱসৰ দিনাই ‘ইউনিক’ড ফ্ৰ’ণ্ট’ আৰু ‘ৰসৰাজ ৰূপান্তৰক’ মুকলি অসম প্ৰকাশন পৰিষদৰ

অসম প্ৰকাশন পৰিষদৰ এলানি অভিলাষী প্রকল্পৰ ভিতৰত দুটা ভাষা প্ৰযুক্তি ভিত্তিক গুৰুত্বপূৰ্ণ ছপাযোগ্য ‘বাণীকান্ত অসমীয়া ইউনিক’ড ফ্ৰ’ণ্ট’ আৰু ‘ৰসৰাজ ৰূপান্তৰক’ আজি আনুষ্ঠানিকভাৱে মুকলি কৰা হয়।

পৰিষদৰ বামুণীমৈদামস্থিত কাৰ্যালয়ৰ সভাগৃহত আজি অনুষ্ঠিত এটা অনুষ্ঠানত এই প্ৰকল্প দুটা মুকলি কৰে ক্ৰুমে অসম প্রকাশন পৰিষদৰ উপাধ্যক্ষ সুমন্ত চলিহা আৰু অসম সাহিত্য সভাৰ সভাপতি ডঃ  কুলধৰ শইকীয়াই।

আজি এই প্ৰকল্প দুটা মুকলি অনুষ্ঠানত উদ্দেশ্য ব্যাখ্যা কৰি অসম প্ৰকাশন পৰিষদৰ সচিব প্ৰমোদ কলিতাই কয় যে অসম প্ৰকাশন পৰিষদৰ উদ্যোগত ভাষা প্ৰযুক্তি বিকাশ পৰিষদৰ সহযোগিতাত অসমীয়া লিপি ইউনিক’ড সমৰ্থিত ছপা উপযোগী এটা ফ্ৰ’ণ্ট পৰিয়াল (Front Family) নিৰ্মাণ কৰি উলিওৱা হৈছে।

বাণীকান্ত অসমীয়া ইউনিক’ড ফ্ৰ’ণ্ট মুকলি কৰি অসম প্ৰকাশন পৰিষদৰ উপাধ্যক্ষ সুমন্ত চলিহাই কয়, ‘অসম প্ৰকাশন পৰিষদৰ আজিৰ এই পদক্ষেপে অসমীয়া ভাষা তথা লিপিৰ উত্তৰণৰ ক্ষেত্ৰত এক সুদূৰ প্ৰসাৰী প্ৰভাৱ পেলাব।

ভাষণ প্ৰসংগত লগতে চলিহাই আৰু কয় ‘অসমীয়া ভাষা জননীৰ বাবে আজি এটা ঐতিহাসিক দিন হিচাপে বিবেচিত হ’ব।’

ইফালে আজিৰ অনুষ্ঠানতে নন্‌ ইউনিক’ড ফ্ৰ’ণ্টৰ আখৰ ইউনিক’ডলৈ ৰূপান্তৰ কৰিব পৰা ‘ৰসৰাজ ৰূপান্তৰক (NON UNICODE TO UNICODE CONVERTOR) মুকলি কৰে অসম সাহিত্য সভাৰ সভাপতি ডঃ কুলধৰ শইকীয়াই।

ভাষণ গ্ৰসংগত ডঃ শইকীয়াই কয়, “অসম প্ৰকাশন পৰিষদৰ উদ্যোগে অসম সাহিত্য সভাৰ ‘মোৰ ভাষা মোৰ গৌৰৱ’ ধ্বনিক আজি অধিক শক্তিশালী কৰিলে। ভাষা তথা লিপিৰ বিকাশ বিস্তৃতিৰ বাবে অসম প্ৰকাশন পৰিষনে গ্ৰহণ কৰা এই পদক্ষেপক ভূয়সী প্রশংসা কৰে আৰু সকলোকে এনে পদক্ষেপৰ প্ৰতি সঁহাৰি জনাবলৈ মুকলি আহ্বান জনায় সভাপতি ডঃ শইকীয়াই।

উল্লেখ্য যে, অসম চৰকাৰৰ উচ্চশিক্ষা বিভাগৰ অন্তৰ্গত অসম প্ৰকাশন পৰিষদে যোৱা ডেৰ বছৰীয়া প্ৰচেষ্টাৰ অন্তত অসমীয়া ভাষাৰ ভৱিষ্যৎ সুৰক্ষাৰ বাবে ‘ভাষা প্ৰযুক্তি বিকাশ পৰিষদ’ৰ সহযোগত অসমীয়া ‘ফ্ৰ’ণ্ট ফেমিলি’ নিৰ্মাণ কৰি উলিয়াইছে।

অসমীয়া নৰ্মেল, অসমীয়া ইটালিক, অসমীয়া ব’ল্ড আৰু ইংৰাজী ফণ্টৰ লগতে অসমীয়া ভাষাত ব্যৱহাৰ হোৱা IPA এই ইউনিক’ড ফ্ৰ’ণ্টে অসমীয়া ভাষাৰ কাৰিকৰী সমস্যা নাইকিয়া কৰিব বুলি আশা প্রকাশ কৰা হৈছে।

প্ৰণিধানযোগ্য যে অসমীয়া ভাষাৰ ভেটি গঢ়োতা গৱেষক ডঃ বাণীকান্ত কাকতিৰ নামত উৎসৰ্গিত এই ফ্ৰ’ণ্ট নিৰ্মাণৰ প্ৰকল্পত অসম প্রকাশন পৰিষদৰ উদ্যোগত ভাষা প্রযুক্তি বিকাশ পৰিষদৰ গুণদীপ চেতিয়া, ৰাজু গোহাঁই আৰু ডঃ ভাস্কৰজ্যোতি শৰ্মাই আগভাগ লৈছিল।

আজি ‘বিশ্ব মাতৃভাষা দিৱস’ৰ লগত সংগতি ৰাখি অসম প্ৰকাশন পৰিষদে এই ফ্ৰ’ণ্ট অসমীয়া ছপা মাধ্যমত ইউনিক’ডত প্রয়োগৰ বাবে মুকলি কৰি দিয়ে।

অসমীয়া ভাষাৰ বাবে কাৰিকৰী দিশত এক যুগান্তকাৰী সংযোজন হিচাপে চিহ্নিত হোৱা এই ছপাযোগ্য ‘বাণীকান্ত অসমীয়া ইউনিক’ড ফ্ৰ’ণ্ট’ আৰু ‘ৰসৰাজ ৰূপান্তৰক’ (NON UNICODE TO UNICODE CONVERTOR) অসম প্রকাশন পৰিষদৰ www.publicationboardassam.com বেৱছইটত বিনামূলীয়াকৈ উপলব্ধ হ’ব।