ভাৰত আৰু ম্যানমাৰ সীমান্তত অসম ৰাইফলছে অভিযান চলাই দেওবাৰে নিষিদ্ধ নিচা জাতীয় সামগ্ৰী জব্দ কৰে।
অসম ৰাইফলছৰ অভিযানকাৰী দলে মণিপুৰৰ চাণ্ডেল জিলাত এই নিচাযুক্ত সামগ্ৰী সমূহ উদ্ধাৰ কৰিবলৈ সক্ষম হয়।
‘‘লাইচিং-কোটাক খুন্টাক পথত চলোৱা অভিযানৰ সময়তে নিচাযুক্ত সামগ্ৰী সমূহ উদ্ধাৰ হয়,’’ অসম ৰাইফলছ(দক্ষিণ)ৰ জনসম্পৰ্কৰক্ষী বিষয়াই এইদৰে সদৰী কৰে।
উদ্ধাৰ হোৱা নিষিদ্ধ নিচাযুক্ত সামগ্ৰীখিনিৰ আনুমানিক বজাৰ মূল্য প্ৰায় ৬৮ লাখ টকাৰ ওচৰা-উচৰি হ’ব বুলিও অসম ৰাইফলছে কয়।
নিশা প্ৰায় ৩.৩০ বজাত অসম ৰাইফলছৰ অভিযানকাৰী দলটোৱে এই অভিযান চলায়।
উদ্ধাৰ হোৱা নিচাযুক্ত সামগ্ৰী সমূহ অসম ৰাইফলছৰ দলটোৱে চাণ্ডেল আৰক্ষীক গটায় দিয়ে।
মণিপুৰ আৰক্ষীয়ে ক্ৰমাগতভাৱে নিষিদ্ধ ড্ৰাগছ জাতীয় সামগ্ৰীৰ বিৰুদ্ধে অভিযান অব্যাহত ৰাখিছে।
বিগত মাহতো মণিপুৰ আৰক্ষীয়ে ভালেসংখ্যক ড্ৰাগছ সৰবৰাহকাৰীক গ্ৰেপ্তাৰ কৰিবলৈ সক্ষম হৈছিল। মণিপুৰৰ লগতে উত্তৰ পূবৰ অন্য ৰাজ্য সমূহতো আৰক্ষীয়ে ড্ৰাগছ বিৰোধী অভিযান অব্যাহত ৰাখিছে।
