ভাৰতৰ নিয়ন্ত্ৰক আৰু মহাহিচাপ পৰীক্ষকৰ শেহতীয়া প্ৰতিবেদনত অসমৰ সামাজিক নিৰীক্ষণ গোটৰ পৰিচালনা আৰু কাৰ্যপ্ৰণালীত গুৰুতৰ বিসংগতি পোহৰলৈ আহিছে। গ্ৰামাঞ্চলৰ উন্নয়নমূলক কাৰ্যসূচীসমূহত স্বচ্ছতা আৰু উত্তৰদায়িত্ব নিশ্চিত কৰাৰ উদ্দেশ্যে গঠিত এই গোটটোৱে বিগত প্ৰায় পাঁচ বছৰ ধৰি বৈধ পঞ্জীয়ন অবিহনেই নিজৰ কাম-কাজ চলাই আছে। ছ’চাইটি পঞ্জীয়ন আইন, ১৮৬০ৰ অধীনত গোটটোৰ পঞ্জীয়ন ২০১৯ চনৰ ডিচেম্বৰ মাহতে উকলি যোৱাৰ পিছতো পৰিচালনা সমিতিৰ নিয়মীয়া বৈঠক অনুষ্ঠিত নকৰাৰ ফলতে এই গুৰুতৰ অনিয়ম সংঘটিত হোৱা বুলি ২০২৪ চনৰ মাৰ্চ মাহত অন্ত পৰা সময়ছোৱাৰ বাবে প্ৰস্তুত কৰা কেগৰ প্ৰতিবেদনত প্ৰকাশ পাইছে।
মহাত্মা গান্ধী ৰাষ্ট্ৰীয় গ্ৰাম্য নিয়োগ নিশ্চিত আঁচনিৰ অধীনত সামাজিক নিৰীক্ষণ কৰাৰ বাবে ২০১৬ চনৰ ডিচেম্বৰত এই গোটটো পঞ্জীয়ন কৰা হৈছিল। মুখ্য সচিবৰ অধ্যক্ষতাত পৰিচালিত আৰু এজন স্বতন্ত্ৰ সঞ্চালকৰ দ্বাৰা নেতৃত্ব প্ৰাপ্ত এই গোটটোৰ পৰিচালনা সমিতিৰ বৈঠক নিৰ্ধাৰিত সময়ত অনুষ্ঠিত কৰাত হোৱা ব্যাপক বিফলতাই চৰকাৰী পৰ্যায়ত তদাৰকৰ অভাৱকে সূচায় বুলি প্ৰতিবেদনত উল্লেখ কৰা হৈছে। বৈঠক অনুষ্ঠিত নোহোৱাৰ বাবে গোটটোৰ বাজেট অনুমোদন আৰু বাৰ্ষিক হিচাপৰ প্ৰমাণীকৰণৰ দৰে গুৰুত্বপূৰ্ণ কামসমূহো বাধাগ্ৰস্ত হৈছে।
প্ৰতিবেদনখনত গোটটোৰ তীব্ৰ কৰ্মচাৰীৰ অভাৱৰ কথাও বিশেষভাৱে আঙুলিয়াই দিয়া হৈছে। বৰ্তমান গোটটোত সামগ্ৰিকভাৱে ৪৩ শতাংশ পদ খালী হৈ আছে, যিয়ে সামাজিক নিৰীক্ষণৰ লক্ষ্য পূৰণ আৰু সময়মতে নিৰীক্ষণ কাৰ্য সম্পূৰ্ণ কৰাত তীব্ৰ নেতিবাচক প্ৰভাৱ পেলাইছে। ২০১৭ চনৰ আগষ্ট মাহতে প্ৰস্তাৱিত মানৱ সম্পদ নীতি বিত্ত বিভাগৰ পৰ্যালোচনাৰ পিছতো আজিকোপতি চূড়ান্ত নোহোৱাটো এক চিন্তনীয় বিষয় হিচাপে চিহ্নিত হৈছে।
সামাজিক নিৰীক্ষণৰ মানদণ্ড অনুসৰি সহায়কসকলৰ বাবে এখন আচাৰ বিধি থকাটো বাধ্যতামূলক যদিও বৰ্তমানলৈকে তেনে কোনো বিধি প্ৰস্তুত কৰা হোৱা নাই। আনহাতে, নিৰীক্ষণত ধৰা পৰা পুঁজিৰ অপব্যৱহাৰৰ পাছত ধন উদ্ধাৰৰ হাৰো অতি হতাশাজনক। কেগৰ পৰ্যবেক্ষণ অনুসৰি, অপব্যৱহাৰ হোৱা ধনৰ মাত্ৰ চাৰি শতাংশতকৈয়ো কম অংশহে উদ্ধাৰ কৰিবলৈ সক্ষম হৈছে। ইয়াৰ উপৰি কিছুমান গাঁও পঞ্চায়তে নিৰীক্ষণকাৰী দলক প্ৰয়োজনীয় নথিপত্ৰ যোগান নধৰাৰ কথাও প্ৰতিবেদনত প্ৰকাশ পাইছে, যিয়ে পঞ্চায়তীৰাজ প্ৰতিষ্ঠানসমূহৰ মাজত সামাজিক নিৰীক্ষণৰ গুৰুত্ব সম্পৰ্কে সজাগতাৰ অভাৱকে প্ৰতিফলিত কৰে।
নিৰীক্ষণৰ ফলাফলৰ ভিত্তিত গ্ৰহণ কৰিবলগীয়া ব্যৱস্থাৰ ক্ষেত্ৰতো নিৰীক্ষণ ব্যৱস্থা অতি দুৰ্বল বুলি কেগে সমালোচনা কৰিছে। ৰাজ্যিক নিয়োগ নিশ্চিত পৰিষদে সামাজিক নিৰীক্ষণৰ প্ৰতিবেদন আৰু চৰকাৰে দাখিল কৰা ব্যৱস্থা গ্ৰহণৰ প্ৰতিবেদনসমূহ তদাৰক কৰাত ব্যৰ্থ হৈছে। তদুপৰি, গোটটোৱে গ্ৰামোন্নয়ন মন্ত্ৰালয়ে নিৰ্ধাৰণ কৰা আৰ্হিত প্ৰধান মহাহিসাপ পৰীক্ষক বা মহাহিচাপ পৰীক্ষকক ত্ৰৈমাসিক প্ৰতিবেদন দাখিল কৰাতো বিফল হোৱা বুলি প্ৰতিবেদনত উল্লেখ আছে।
এই সমগ্ৰ বিসংগতিসমূহ দূৰ কৰি পৰিস্থিতি উন্নত কৰাৰ বাবে কেগে এলানি গুৰুত্বপূৰ্ণ পৰামৰ্শ আগবঢ়াইছে। ইয়াৰ ভিতৰত পৰিচালনা সমিতিৰ বৈঠক নিয়মীয়াকৈ অনুষ্ঠিত কৰা, মানৱ সম্পদ নীতি শীঘ্ৰে চূড়ান্ত কৰি পৰ্যাপ্ত কৰ্মচাৰী নিযুক্তি দিয়া আৰু ব্লক তথা জিলা পৰ্যায়ত ৰাজহুৱা শুনানিৰ জৰিয়তে তদাৰক ব্যৱস্থা শক্তিশালী কৰা অন্যতম। গ্ৰামোন্নয়ন আঁচনিসমূহত অধিক স্বচ্ছতা আৰু উত্তৰদায়িত্ব নিশ্চিত কৰিবলৈ স্থানীয় নিকায়সমূহৰ মাজত সজাগতা বৃদ্ধি কৰাৰ লগতে আচাৰ বিধিখন তৎকালীনভাৱে প্ৰস্তুত কৰি কাৰ্যকৰী কৰিবলৈয়ো চৰকাৰক আহ্বান জনোৱা হৈছে।
