আহিবলগা বিধানসভা নিৰ্বাচনৰ আগতেই অসমত অনুষ্ঠিত হ‘ব ভোটাৰ তালিকাৰ বিশেষ পুনৰীক্ষণ (Special Revision – SR)। এই প্ৰক্ৰিয়াটো সাধাৰণ SSR বা SIR—দুয়োটাৰ পৰাই কিছুমান ক্ষেত্ৰত পৃথক। ২০২৬ চনৰ ১ জানুৱাৰী যোগ্যতা অৰ্জনৰ তাৰিখ হিচাপে নিৰ্ধাৰিত হৈছে।
নিৰ্বাচন আয়োগে ১৭ নৱেম্বৰ, ২০২৫ত অসমত এই প্ৰক্ৰিয়া আৰম্ভ কৰিবলৈ আনুষ্ঠানিক নিৰ্দেশ জাৰী কৰে। আয়োগে দিয়া সূচী অনুসৰি ২০২৬ চনৰ ১০ ফেব্ৰুৱাৰীত চূড়ান্ত ভোটাৰ তালিকা প্ৰকাশ হ’ব। যিহেতু সেই বছৰে বিধানসভা নিৰ্বাচন অনুষ্ঠিত হ’ব, সেইবাবে বিশেষ পুনৰীক্ষণ প্ৰক্ৰিয়াটোক বিশেষ গুৰুত্বপূৰ্ণ ধৰা হৈছে।
SR–SIR–SSR: কি পাৰ্থক্য?
বিষয়াসকলৰ মতে, এই বিশেষ পুনৰীক্ষণ প্ৰক্ৰিয়া মূলত “SSR-ৰ এটা উন্নত সংস্কৰণ”। এজন জ্যেষ্ঠ বিষয়াৰ ভাষ্য অনুসৰি “এই পদ্ধতিত গণনা প্ৰ-পত্ৰ ব্যৱহাৰ নকৰাকৈ BLO-এ ঘৰে ঘৰে গৈ প্ৰথমতে সংগৃহীত তথ্য পৰীক্ষা কৰিব।” ইতিমধ্যে কেন্দ্রীয় নিৰ্বাচন আয়োগে ১২খন ৰাজ্যৰ বাবে SIR নিৰ্দেশ জাৰী কৰিছে, যদিও অসমত বিশেষ পুনৰীক্ষণ (SR)-ই প্ৰযোজ্য হ’ব।
অসমৰ মুখ্যমন্ত্ৰী হিমন্ত বিশ্ব শৰ্মাই নিৰ্বাচন আয়োগৰ এই সিদ্ধান্তক আদৰণি জনাই সামাজিক মাধ্যমত লিখিছে—
“অসমত বিশেষ পুনৰীক্ষণৰ সিদ্ধান্তক অসম চৰকাৰে আদৰণি জনাইছে। চৰকাৰে পূৰ্ণ সহযোগিতা আগবঢ়াব।”
নিৰ্বাচন আয়োগৰ মতে SR সূচী
- ২২ নৱেম্বৰ – ২০ ডিচেম্বৰ, ২০২৫: ঘৰে ঘৰে পৰীক্ষণ
- ২৭ ডিচেম্বৰ, ২০২৫: সংহত খচৰা তালিকা প্ৰকাশ
- ১০ ফেব্ৰুৱাৰী, ২০২৬: চূড়ান্ত ভোটাৰ তালিকা প্ৰকাশ
ভোটাৰ হোৱাৰ যোগ্যতা
সংবিধানৰ ৩২৬ নং অনুচ্ছেদ আৰু RPA Act, 1950 অনুসৰি—
- ভাৰতৰ নাগৰিক হ‘ব লাগিব
- ০১.০১.২০২৬-ত বয়স ১৮ বছৰ বা অধিক হ‘ব
- সংশ্লিষ্ট সমষ্টিৰ সাধারণ বাসিন্দা হ‘ব
- আইনৰ অধীনত ভোটাধিকাৰৰ বাবে অযোগ্য নোহোৱাকৈ
- মানসিক দৃষ্টিৰে সক্ষম হ‘ব
চিইঅ’ৰ দায়িত্ব: কি কি নিশ্চিত কৰিব লাগিব?
- পৰিয়ালৰ সকলো ভোটাৰ একেটা অংশতে তালিকাভুক্ত হ‘ব
- ঘৰৰ সংখ্যা সঠিকভাৱে প্ৰতিফলিত হ‘ব
- ভোট কেন্দ্ৰসমূহ তলৰ মহলা/পথ-প্ৰৱেশ স্তৰত হ‘ব
- প্ৰপত্ৰ-৭ৰে দ্বৈত/মৃত/স্থানান্তৰিত ভোটাৰ ১০০% আঁতৰোৱা
- BLO-ৰ মাধ্যমেৰে ১০০% ভোট কেন্দ্ৰ পৰীক্ষণ
- প্ৰতি কেন্দ্ৰত ১২০০ৰ উপৰলৈ ভোটাৰ নাথাকিবলৈ নতুন কেন্দ্ৰৰ প্ৰয়োজনীয়তা মূল্যায়ন
- ECI মানদণ্ড অনুসৰি ফটো গুণগত মান ৰক্ষা
ব্ল’ক লেভেল অফিচাৰ (BLO) এ ঘৰে ঘৰে কি সংগ্ৰহ কৰিব?
- একাধিক ভোটাৰ নাম, মৃত ব্যক্তি, স্থানান্তৰিত ভোটাৰ চিনাক্তকৰণ
- সংশোধনৰ তথ্য সংগ্ৰহ
- প্ৰপত্ৰ-৬ আৰু ৮ত ইচ্ছামাফিক আধাৰ নম্বৰ আগবঢ়াব পাৰিব
- আধাৰ নেদিয়াৰ বাবে কোনো আবেদন নাকচ হ‘ব নোৱাৰে
- আধাৰ সংযোগ নকৰাটো ভোটাৰ নাম অন্তৰ্ভুক্তিৰ অধিকাৰ আটকাব নোৱাৰে
স্বচ্ছতা নিশ্চিতকৰণ
পুনৰীক্ষণ সূচী জাৰি কৰাৰ লগতে সকলো স্বীকৃত ৰাজনৈতিক দলৰ সৈতে বৈঠক অনুষ্ঠিত কৰি প্ৰক্ৰিয়াটোৰ স্বচ্ছতা বজাই ৰখা হ‘ব।
চূড়ান্ত তালিকা প্ৰকাশৰ আগতেই নিৰ্বাচন আয়োগৰ লিখিত অনুমতি ল’ব লাগিব। মুখ্য কাৰ্যবাহী বিষয়াই ১৪ ফেব্ৰুৱাৰী, ২০২৬ৰ ভিতৰত এছআৰ চূড়ান্ত প্ৰতিবেদন জমা দিব লাগিব।
