ৰাজ্যৰ কৃষকলৈ সুখবৰ। সোণোৱাল নেতৃত্বাধীন চৰকাৰে ৰাজ্যখনৰ কৃষকৰ বাবে আৰম্ভ কৰিছে এক নতুন আঁচনি। এই আঁচনিৰ জৰিয়তে কৃষকে লাভ কৰিব আৰ্থিক অনুদান।
কৃষকৰ সহায় হোৱাকৈ কৃষি সা-সঁজুলি বা অন্যান্য সামগ্ৰী ক্ৰয় কৰিবৰ বাবে এই আঁচনি ৰূপায়ন কৰা হৈছে। ‘মুখ্যমন্ত্ৰী কৃষি সা-সঁজুলি যোজনা’ নামেৰে নামকৰণ কৰা এই বিশেষ আঁচনিৰ যোগেদি ৰাজ্যৰ প্ৰতিজন কৃষকলৈ পাঁচ হাজাৰ টকাকৈ আৰ্থিক সাহায্য আগবঢ়াব।
আনহাতে ৰাজ্যৰ অন্য প্ৰান্তৰ লগতে শিৱসাগৰ জিলাটো এই আঁচনিৰ জৰিয়তে কৃষকক আৰ্থিক সাহায্য প্ৰদান কৰিবলৈ ব্যৱস্থা গ্ৰহণ কৰা হৈছে।
২১ বছৰ উৰ্ধ্বৰ আৰু কমেও তিনি বছৰ একেৰাহে কৃষি কৰ্মৰ লগত জড়িত শিৱসাগৰ জিলাৰ ক্ষুদ্ৰ আৰু উপান্ত কৃষক সকলে এই আঁচনিৰ সুবিধা লাভৰ বাবে জিলা কৃষি বিভাগৰ সম্প্ৰসাৰণ সহায়ক, কৃষি উন্নয়ন বিষয়া, মহকুমা কৃষি বিষয়া বা জিলা কৃষি বিষয়াৰ লগত যোগাযোগ কৰিবলৈ শিৱসাগৰ জিলা কৃষি বিষয়া ললিত চন্দ্ৰ দাসে আহ্বান জনাইছে।
