অসম বিধানসভাৰ শীতকালীন অধিৱেশনত ৰাজ্যৰ চাহ শ্ৰমিকক ভূমিপট্টা প্ৰদানৰ ক্ষেত্ৰত গ্ৰহণ কৰা সিদ্ধান্তক লৈ চাহ বাগিচা অঞ্চলসমূহত উল্লাসৰ পৰিৱেশ বিৰাজ কৰিছে। বহুতে এই পদক্ষেপক আদৰণি জনাইছে যদিও একাংশই ইয়াক ৰাজনৈতিক ষড়যন্ত্ৰ বুলিও সন্দেহ কৰিছে। ইয়াৰ মাজতে তেজপুৰত অখিল ভাৰতীয় চাহ মজদুৰ সংঘই (অসম) সংবাদমেল সম্বোধন কৰি চৰকাৰৰ এই পদক্ষেপক আদৰণি জনাইছে আৰু ইয়াক “দীঘলীয়া সংগ্ৰামৰ সফলতা” বুলি উল্লেখ কৰে।
সংবাদমেলত সংগঠনৰ সাধাৰণ সম্পাদক ৰয়েল চৰেঙে কয় যে তেওঁলোকৰ মূল তিনিটা দাবী আছিল—মাটি, মজুৰি আৰু মৰ্যাদা। চৰকাৰে মাটিৰ পট্টা প্ৰদানৰ সিদ্ধান্ত লৈ এটা গুৰুত্বপূৰ্ণ পদক্ষেপ গ্ৰহণ কৰিছে। তেওঁ লগতে কয়, “২০০৮ চনৰে পৰা চলি অহা আন্দোলনে পৰৱৰ্তী সময়ত ২০১৭ চনৰ তেজপুৰৰ বিশাল অভিৱৰ্তন আৰু ২০২৪-২৫ চনত বিভিন্ন আন্দোলন-কাৰ্যসূচীৰ পথ অতিক্ৰম কৰিছে। চাহ শ্ৰমিক, আদিবাসী সংগঠন আৰু ছাত্ৰ সংগঠনৰ ঐক্যবদ্ধ দাবীৰ ফলত চৰকাৰে আজি এই সিদ্ধান্ত ল’বলৈ বাধ্য হৈছে।” চৰেঙে অৱশ্যে এই সিদ্ধান্তৰ বাস্তৱায়নৰ ওপৰত চকু ৰখা হ’ব বুলিও মন্তব্য কৰে।
সংগঠনৰ সভাপতি দীনেশ নায়কে সংবাদমেলত ভূমিপট্টা প্ৰদান প্ৰক্ৰিয়াক লৈ কেইটামান গুৰুত্বপূৰ্ণ দাবী উত্থাপন কৰে:
১. উচ্ছেদ প্ৰতিৰোধ: চাহ বাগিচাৰ বাহিৰৰ ভূমিত যি শ্ৰমিক তথা শ্ৰমিকৰ পৰিয়াল বহু দিন ধৰি বসবাস কৰি আছে, তেওঁলোকে যাতে কোনো কাৰণতে উচ্ছেদৰ সন্মুখীন হ’ব নালাগে। মাটিৰ পট্টা প্ৰদানৰ ক্ষেত্ৰত তেওঁলোকৰ বাবে স্পষ্ট ব্যৱস্থা লোৱাটো অত্যাৱশ্যক।
২. সমান বিতৰণৰ নিশ্চয়তা: চাহ বাগিচাত কেৱল এটা বিশেষ ধৰ্ম বা জাতিৰ লোক নাথাকে। জলাহ, কোচ ৰাজবংশী, বিহাৰী আদি বিভিন্ন জাতি-ধৰ্মৰ লোক চাহ শ্ৰমিক হিচাপে কাম কৰে। সেই সকলোকে লৈ কোনো প্ৰকাৰৰ ৰাজনৈতিক বা ধৰ্মীয় বিভাজন সৃষ্টি নকৰি সকলোকে সমানভাৱে ভূমিপট্টা দিয়াৰ নিশ্চয়তা চৰকাৰে দিব লাগিব।
৩. দালালচক্ৰৰ নিয়ন্ত্ৰণ: দালালচক্র যাতে এই প্ৰক্ৰিয়াত সোমাব নোৱাৰে, সেই দিশত কঠোৰ নিৰীক্ষণৰো তেওঁ আহ্বান জনায়।
৪. ব্যাপক অন্তৰ্ভুক্তি: চৰকাৰৰ দ্বাৰা ঘোষিত ভূমিপট্টা প্ৰদান কৰিবলগীয়া পৰিয়ালৰ সংখ্যা তুলনামূলকভাৱে কম। ৰাজ্যজুৰি ৫০-৬০ লাখ শ্ৰমিক আৰু প্ৰাক্তন শ্ৰমিক থকাৰ পৰিপ্ৰেক্ষিতত সকলোকে এই সুবিধাৰ অধীনত অন্তৰ্ভুক্ত কৰাৰ ব্যৱস্থা কৰাটো প্ৰয়োজনীয়।
ইফালে চি আই টি ইউৰ ৰাজ্যিক সম্পাদক তপন শৰ্মাই এই সংবাদমেলত উপস্থিত থাকি মন্তব্য কৰে যে সিদ্ধান্তটো সঠিক, কিন্তু চাহ শ্ৰমিকৰ আশা-অভিলাষ পূৰণ হ’ব নে নাই, সেইটো বাস্তৱায়নৰ ওপৰতেই নিৰ্ভৰ কৰিব। তেওঁ অভিযোগ কৰে যে আগতে দিয়া বহু প্ৰতিশ্ৰুতি বাস্তৱায়িত হোৱা নাই আৰু ইয়াৰ অভিজ্ঞতা জনতাৰ আছে।
তেওঁ চৰকাৰক পৰামৰ্শ দি কয় যে, চাহ বাগিচাৰ ভূমি চৰকাৰে বৰ্তমান লিজত দিয়া আছে। সেই ভূমি পুনৰ অধিগ্ৰহণ কৰি এক নতুন সমিতিৰ অধীনত পৰিচালনা কৰিব লাগিব।আৰু জিলা প্ৰশাসন, চাহ শ্ৰমিক সংগঠন তথা আদিবাসী ছাত্ৰ সংগঠনক লৈ এখন যৌথ সমিতি গঠন কৰাৰো প্ৰয়োজনীয়তা আছে।
