যোৱা ২৫ ডিচেম্বৰত সমাপ্ত হোৱা ৰঞ্জি ট্ৰফীৰ মেচত গোৱাক নাটকীয়ভাৱে পৰাস্ত কৰিবলৈ সক্ষম হোৱা ঘৰুৱা দল অসমে আজিৰ পৰা এলিট গ্ৰুপ চি’ৰ অন্য এখন গুৰুত্বপূৰ্ণ মেচত জম্মু-কাশ্মীৰৰ বিৰুদ্ধে অৱতীৰ্ণ হৈছে।
গুৱাহাটীৰ বৰ্ষাপাৰ ক্ৰিকেট ষ্টেডিয়ামত অনুষ্ঠিত হোৱা মেচখনত জম্মু-কাশ্মীৰে টছত জয়ী হৈ প্ৰথমে বলিং কৰাৰ সিদ্ধান্ত গ্ৰহণ কৰে। প্ৰথম ইনিংছ মুকলি কৰি পুনৰবাৰ বেটিং বিপৰ্যয়ৰ সন্মুখীন হ’বলগীয়া হয় অসম। ঘৰুৱা দলটোৱে আটাইকেইটা উইকেট হেৰুৱাই সংগ্ৰহ কৰিবলৈ সক্ষম হয় মাত্ৰ ১২৮ ৰান।
দুৰ্ভাগ্যজনক কথাটো হ’ল যে অসমৰ শীৰ্ষৰ আঠগৰাকী বেটছমেনৰ ভিতৰত ছগৰাকী বেটছমেনেই দহকৰ ঘৰ স্পৰ্শ নকাৰকৈ পেভেলিয়নলৈ উভটি যায়। আগশাৰীৰ বেটছমেন কেইজনৰ ব্যৰ্থতাৰ বিপৰীতে ১০ আৰু ১১ নম্বৰত বেটিং কৰিবলৈ অহা মুখতাৰ হুছেইন আৰু মৃণ্ময় দত্তই ক্ৰিজত কিছু দৃঢ়তা দেখুৱাই দলটোক এক সন্মানজনক স্থিতিত উপনীত কৰায়। মৃণ্ময় দত্তই ৩৫ আৰু মুখতাৰে ২৪ ৰান কৰিবলৈ সক্ষম হয়।
অসমৰ এই বেটিং বিপৰ্যয়ৰ মূলতে আছিল জম্ম-কাশ্মীৰৰ দুৰ্ধৰ্ষ বলিং আক্ৰমণ। জম্মু-কাশ্মীৰৰ হৈ ৰোহিত শৰ্মা আৰু উমাৰ নাজিৰ মিৰে তিনিটাকৈ আৰু ইৰফান পাঠান আৰি ৰাছিখ চালামে দুটাকৈ উইকেট দখল কৰে।
ইফালে ১২৮ ৰানৰ প্ৰত্যুত্তৰত বেটিং কৰিবলৈ অহা জম্মু-কাশ্মীৰৰো বেটছমেন সকলে ৰানৰ বাবে কঠোৰ সংগ্ৰাম কৰিবলগীয়া হয়। আৰম্ভণিতে মুখতাৰ হুছেইনে অপেনাৰ আহমেদ বেণ্ডিক শূণ্যতে আউট কৰি আলহী দলটোক বেকফুটলৈ ঠেলি দিয়ে। ইয়াৰ পাছৰে পৰা মুখতাৰ হুছেইন আৰু অৰূপৰ বলিং যুটী অধিক আক্ৰমণাত্মক হয় আৰু আলহী দলটোক মাত্ৰ ১৪৪ ৰানতে অল আউট কৰে।
অসমৰ হৈ মুখতাৰ হুছেইনে ১৭ অভাৰত ৩৯ ৰান খৰছ কৰি ৫টা উইকেট, অৰূপ দাসে ৩টা আৰু পল্লৱ কুমাৰ দাসে এটা উইকেট লাভ কৰে। আনহাতে জম্মু-কাশ্মীৰৰ হৈ অপেনাৰ কামৰান ইকবালে ধৈৰ্য্যসহকাৰে বেটিং কৰি ৬৪ ৰান আৰু ইৰফান পাঠানে ৩৫ ৰান কৰাৰ বাহিৰে বাকী বেটছমেনসকল ব্যৰ্থ হোৱা পৰিলক্ষিত হয়।
ইপিনে ১৬ ৰানত পিছ পৰি থকা অসমে দ্বিতীয় ইনিংছ আৰম্ভ কৰি এটাও উইকেট নেহেৰুৱাই প্ৰথম দিনাৰ খেলৰ অন্তলৈকে ৬ ৰান সংগ্ৰহ কৰে। দুয়োগৰাকী অপেনাৰে ১ ৰানকৈ সংগ্ৰহ কৰি অপৰাজিত হৈ ৰয়।
উল্লেখ্য যে বলিং ৰম্যভূমিলৈ পৰিণত হোৱা বৰ্ষাপাৰা ক্ৰিকেট ষ্টেডিয়ামত প্ৰথমদিনাই ২০টাকৈ উইকেট পতন হোৱা কাৰ্যই স্বাভাৱিকতে ক্ৰিকেটপ্ৰেমীৰ মাজত উৎকণ্ঠা যথেষ্ট পৰিমাণে বৃদ্ধি পোৱা পৰিলক্ষিত হৈছে।