প্ৰথমে মোবাইলত চিনাকি৷ তাৰ পিছত প্ৰেম৷ পিছত বিয়াৰ প্ৰলোভনেৰে পশ্চিমবংগত নি বিক্ৰী মহিলাক৷ এইদৰেই মানৱ সৰবৰাহ চক্ৰৰ ফান্দত পৰিছে অসমৰ মহিলা।
অৱশেষত পশ্চিমবংগৰ ইছলামপুৰৰ পৰা সফলতাৰে সুষ্ঠ শৰীৰে অপহৃত মহিলা গৰাকীক উদ্ধাৰ কৰিছে ধূপধৰা আৰক্ষীয়ে৷ ইছলামপুৰৰ সন্দেহজনক “ৰেড লাইট” অঞ্চলৰ পৰা মহিলাগৰাকীক উদ্ধাৰ কৰিবলৈ সক্ষম হয় আৰক্ষী৷
ধূপধৰা আৰক্ষীৰ ভাৰপ্ৰাপ্ত আৰক্ষী বিষয়া মনোজ কুমাৰ দাসৰ নেতৃত্বত এটা অভিযানকাৰী দলে মানৱ সৰবৰাহ চক্ৰৰ কৱলত পৰা মহিলাগৰাকীক উদ্ধাৰ কৰে৷
ভাৰপ্ৰাপ্ত আৰক্ষী বিষয়া মনোজ কুমাৰ দাসে জানিব দিয়া অনুসৰি ১৭ ফেব্ৰুৱাৰীত ধূপধৰাৰ এখন গাঁৱৰ পৰা মহিলাগৰাকী নিৰুদ্দেশ সম্পৰ্কে আৰক্ষীক অৱগত কৰে পৰিয়ালৰ লোকে৷ তাৰ পিছতে আৰক্ষীয়ে প্ৰাথমিক অনুসন্ধান আৰম্ভ কৰে যদিও শুংসূত্ৰ লাভ কৰিব পৰা নাছিল৷
কিছুদিন পিছত মোবাইল ট্ৰেকিঙৰ জৰিয়তে পোৱা তথ্য অনুসৰি ধুবুৰীত মহিলাগৰাকীৰ মোবাইল বন্ধ হৈ থকাৰ তথ্য লাভ কৰে আৰক্ষীয়ে৷
পৰৱৰ্তী পৰ্যায়ত প্ৰায় দুমাহৰ অন্তত অনুসন্ধানৰ ভিত্তিত পশ্চিমবংগৰ এক স্থানত মহিলাগৰাকীক আৱদ্ধ কৰি ৰখাৰ পুনৰ খবৰ লাভ কৰে ধূপধৰা আৰক্ষীয়ে৷
যোৱা ১৮ এপ্ৰিলত পৰিয়ালৰ লোকে দিয়া এজাহাৰৰ ভিত্তিত ২২ এপ্ৰিল তাৰিখে মহিলাগৰাকীক উদ্ধাৰৰ বাবে পশ্চিমবংগলৈ ৰাওনা হয় ধূপধৰা আৰক্ষীৰ এটা অভিযানকাৰী দল৷
অৱশেষত পশ্চিমবংগৰ ইছলামপুৰৰ এক স্থানৰ পৰা অতি নাটকীয় কৌশলৰে আৰক্ষী বিষয়া মনোজ কুমাৰ দাসৰ নেতৃত্বত পৰিকল্পিত ভাৱে আৰক্ষী দলটোৱে সুষ্ঠ শৰীৰে উদ্ধাৰ কৰিবলৈ সক্ষম হয় মহিলাগৰাকীক৷ ধূপধৰা আৰক্ষীৰ অভিযানকিৰী দলক সহযোগিতা কৰে পশ্চিমবংগ আৰক্ষীয়েও ৷
মহিলা গৰাকীক উদ্ধাৰৰ পিছত মানৱ দেহ সৰবৰাহৰ লগত বৃহৎ চক্ৰ জড়িত থকাৰ সন্দেহত ইতিমধ্যে তদন্ত আৰম্ভ কৰিছে ধূপধৰা আৰক্ষীয়ে৷