৭৪ সংখ্যক গণৰাজ্য দিৱসৰ পেৰেডত অসমৰ প্ৰতীকপটত বীৰ লাচিত বৰফুকনক বিকৃত ৰূপত উপস্থাপনৰ বিৰুদ্ধে সৰৱ হৈ পৰিছে অসম তৃণমূল যুৱ কংগ্ৰেছ। এক বিবৃতিত যুৱ তৃণমূল কংগ্ৰেছৰ সভাপতি বন্দীপ দত্তই এগৰাকী জাতায় বীৰৰ বিকৃত উপস্থাপন ৰাজ্য আৰু কেন্দ্ৰীয় চৰকাৰৰ বাবে লজ্জাজনক বুলি মন্তব্য কৰে।
দত্তই লগতে এনেকুৱা এক বিষয়ত বিজেপি চৰকাৰে গা এৰা মনোভাৱ প্ৰদৰ্শন কৰাটো বীৰ জনাৰ প্ৰতি চৰম অপমান বুলি অভিযোগ কৰে।
দত্তই কয়, ‘’কিছুদিন পূৰ্বে নতুন দিল্লীত বিজেপি চৰকাৰে লাচিত বৰফুকনৰ ৪০০ বছৰীয়া জন্মজয়ন্তী অনুষ্ঠিত কৰি সমগ্ৰ দেশতে বীৰজনাক চিনাকি কৰাই দিয়াৰ বাবে কৰা প্ৰয়াসৰ পাছত লাচিত বৰফুকনৰ সম্পূৰ্ণ পৃথক এক প্ৰতিচ্ছবি গণৰাজ্য দিৱসৰ পেৰেডত ব্যৱহাৰ কৰাৰ লগে লগে জনসাধাৰণৰ মাজত এক নিশ্চিত বিভ্ৰান্তিৰ সৃষ্টি হব যে কোনজন প্ৰকৃত লাচিত বৰফুকন- ইমানদিনে চৰকাৰে ব্যৱহাৰ কৰি অহা আলোকচিত্ৰখনৰ মুখাৱয়ৱ নে প্রতীকপটৰ পেৰেডত ব্যৱহাৰ কৰা মুখাৱয়ৱ?’’
তেওঁ লগতে কয়, ‘’ইতিহাসৰ মূল ব্যক্তিগৰাকীৰ প্ৰকৃত ফটোগ্ৰাফ উপলব্ধ নথকা অৱস্থাত এক নিৰ্দিষ্ট মুখাৱয়ৱক কেন্দ্ৰ কৰি আগবঢ়া হয়। কিন্তু একেখন চৰকাৰে দুমাহৰ ভিতৰত দুখন মুখাৱয়ৱ যদি দাঙি ধৰে তেন্তে জনসাধাৰণ বিভ্ৰান্ত হোৱাটো স্বাভাৱিক। চৰকাৰ সৃষ্ট এই বিভ্ৰান্তিৰ আমি তীব্ৰ বিৰোধিতা কৰিছো।‘’
তেওঁ শীঘ্ৰে বীৰজনাৰ এক নিৰ্দিষ্ট মুখাৱয়ৱৰ বিষয়ে ৰাইজৰ আগত তুলি ধৰিবলৈ চৰকাৰৰ ওচৰত দাবী জনায়।
