আজি জম্মু আৰু কাশ্মীৰৰ পুলৱামাত সন্ত্ৰাসবাদীৰ ভয়ংকৰ আত্মঘাতী বোমা বিস্ফোৰণত নিহত প্ৰায় ৪০জন চি আৰ পি এফ জোৱানৰ মাজত অসমৰ একাধিক জোৱান আছে বুলি খবৰ ওলাইছে।
অৱশ্যে নৰ্থ-ইষ্ট নাওৰ তৰফৰ পৰা অসম আৰক্ষীৰ সঞ্চালক প্ৰধান কুলধৰ শইকীয়াক যোগাযোগ কৰাত এই খবৰ নিশ্চিত কৰিবলৈ যোগাযোগ কৰি থকা বুলিহে আমাক জানিবলৈ দিয়ে।
আনহাতে পলুৱামাৰ আৰক্ষীৰ সূত্ৰৰ উদ্ধৃতিৰে ৰাষ্ট্ৰীয় কাকতবোৰে দিয়া বাতৰি মতে, জম্মুত থকা ট্ৰেনজিত কেম্পৰ পৰা ৭৮খন গাড়ীত মুঠ ২৫৪৭জন জোৱান শ্ৰীনগৰলৈ গৈ থকা অৱস্থাতে বিস্ফোৰণটো ঘটায় আত্মঘাতী বোমাৰুজনে।
ইতিমধ্যে এই বিস্ফোৰণৰ দায়িত্ব স্বীকাৰ কৰিছে পাকিস্তান ভিত্তিক সন্ত্ৰাসবাদী সংগঠন জৈছ-ই-মহম্মদে, ৰাষ্ট্ৰীয় সংবাদ মাধ্যমত এই কথা প্ৰকাশ।
ইপিনে ভয়ংকৰ বিস্ফোৰণটোত জোৱানসকলৰ শৰীৰৰ সৈতে ছিন্ন-ভিন্ন হৈ পৰা বাছখনত যোৱা বুলি দাবী কৰা জোৱানসকলৰ এখন তালিকা ছ’চিয়েল মিডিয়াত বাগৰি ফুৰিছে, য’ত এম বসুমতাৰী আৰু নাছিৰ আহমেদ নামৰ অসমৰ দুজনৰ নাম দেখা গৈছে।