দেশৰ প্ৰধান মন্ত্ৰী নৰেন্দ্ৰ মোদীৰ সপোন স্বচ্ছ ভাৰত অভিযানে দেশৰ বিভিন্ন প্ৰান্তৰ লগতে অসমত এতিয়াও সুফল পাবলৈ বহু বাকী। ইয়াকে যেন প্ৰমাণ কৰি দিলে উত্তৰ-পূবৰ স্বচ্ছ ভাৰত অভিযানৰ ব্ৰেণ্ড এম্বেছেডৰ তথা অৰুণাচল প্ৰদেশৰ মুখ্য মন্ত্ৰীৰ পৰামৰ্শদাতা ছটাই ক্ৰী য়ে।
যোৱা ২৭ নৱেম্বৰত ছটাই ক্ৰীয়ে অসমৰ মুখ্য মন্ত্ৰী সৰ্বানন্দ সোণোৱালক সাক্ষাৎ কৰি স্বচ্ছ ভাৰত অভিযানৰ বিষয়ে আলোচনা কৰে। আলোচনাৰ সময়তে উত্তৰ-পূবৰ অন্য নগৰ-চহৰতকৈ অসমৰ নগৰ-চহৰসমূহ বহু পৰিমাণে লেতেৰা তথা দুৰ্গন্ধময় বুলি উল্লেখ কৰে।
আনহাতে ক্ৰীয়ে অসমৰ চহৰ-নগৰ সমূহ যিকোনো প্ৰকাৰে পৰিষ্কাৰ তথা স্বাস্থ্যসন্মত কৰি তুলিবলৈ মুখ্য মন্ত্ৰীক অনুৰোধ জনায়। তদুপৰি উত্তৰ-পূৰ্বাঞ্চলৰ ভিতৰত ডিব্ৰুগড় চহৰখন বহু পুৰণি তথা ঐতিহ্যপূৰ্ণ চহৰ বুলি মন্তব্য কৰি চহৰখনৰো যতন ল’বলৈ আহ্বান জনায়।
উল্লেখ্য যে মুকলিৰ দিশত বগীবিল দলং। দলংখন মুকলি হোৱাৰ পাছতে এই চহৰখন উত্তৰ-পূৰ্বাঞ্চলৰ এখন অন্যতম মুখ্য চহৰ হিচাপে পৰিগণিত হ’ব, সেয়ে চহৰখন পৰিষ্কাৰ তথা স্বাস্থ্যসন্মত হোৱাটো প্ৰয়োজনীয় বুলিও তেওঁ উল্লেখ কৰে।
মন কৰিবলগীয়া যে নৰেন্দ্ৰ মোদীয়ে দেশৰ প্ৰধান মন্ত্ৰী হিচাপে কাৰ্যভাৰ গ্ৰহণ কৰাৰ পাছতে এখন স্বচ্ছ আৰু স্বাস্থ্যসন্মত ভাৰত গঢ়াৰ লক্ষ্যৰে স্বচ্ছ ভাৰত অভিযান আৰম্ভ কৰিছিল। কিন্তু চাৰিবছৰ অতিক্ৰম কৰাৰ পাছতো এই স্বচ্ছ ভাৰত অভিযান আঁচনিখন বাস্তৱ ৰূপত একো সুফল লাভ কৰা পৰিলক্ষিত হোৱা নাই বৰঞ্চ ই এক ধোৱা চাঙত পৰিগণিত হৈছে।
