বিশ্বজুৰি সমাদৃত আমেৰিকাৰ বিখ্যাত ফ’ৰ্বছ আলোচনীয়ে অলপতে প্ৰকাশ কৰা ৩০-অনূৰ্ধ্ব-৩০ ভাৰতীয়ৰ ২০১৯ বৰ্ষটোৰ তালিকাত স্থান পালে অসমৰ হিমা দাসে।
নিজৰ প্ৰতিভাৰ বলত কম বয়সতে বিশেষ কৃতিত্ব অৰ্জা আৰু সমাজত প্ৰভাৱ ৰাখিবলৈ সক্ষম হোৱা ব্যৱসায়ী, শিল্পী, ক্ৰীড়াবিদ, য়ু টিউবাৰ আদি মুঠ ১৬টা শিতানত ৩০ বছৰৰ কম বয়সৰ ৩০জন ভাৰতীয়ক এই তালিকাত সামৰি লোৱা হৈছে।
প্ৰতি বছৰত এবাৰকৈ প্ৰকাশ কৰা ফ’ৰ্বছৰ এই শিতানটো (৩০-অনূৰ্ধ্ব-৩০ ভাৰতীয়)ৰ এয়া ষষ্ঠ সংস্কৰণ।
ফ’ৰ্বছৰ কৰ্তৃপক্ষই জনোৱামতে, বিশদ গৱেষণামূলক প্ৰক্ৰিয়াৰ মাজেৰে এই প্ৰতিভাশালী যুৱক-যুৱতীসকলক বাছি উলিওৱা হৈছে। হিমাৰ উপৰি তালিকাখনত ১৮ বছৰীয়া ক্ৰিকেটাৰ তথা ৰাষ্ট্ৰীয় মহিলা ক্ৰিকেট দলটোৰ সদস্য স্মৃতি মানধনা, ডিজাইনাৰ অদিতি আগৰৱাল আৰু অঞ্জলী মেনন, থ্ৰী-ডি আৰ্টিষ্ট আৰু এনিমেশ্যন চিনেমা নিৰ্মাতা নিনাদ কুলকাৰ্ণী, অভিনেতা বিজয় দেৱেৰাকুণ্ডা আদিয়ে ঠাই পাইছে।
ভাৰতীয় হিচাপে ট্ৰেকত যোৱা বছৰ চাঞ্চল্যৰ সৃষ্টি কৰা ১৯ বছৰীয়া হিমাই ক্ৰীড়া (sports) শিতানত স্থান লাভ কৰিছে।
উল্লেখযোগ্য যে যোৱা বছৰ অনূৰ্ধ্ব-২০ বিশ্ব চেম্পিয়নশ্বিপত হিমাই খিতাপ দখল কৰিছিল। ট্ৰেকত বিশ্বখিতাপ দখল কৰা তেৱেঁই প্ৰথম ভাৰতীয়। ইপিনে যোৱা বছৰেই জাকাৰ্টাত অনুষ্ঠিত এছিয়ান গেইমছতো দুটা ৰূপৰ পদক আৰু এটা স্বৰ্ণ (দলীয়) লাভ কৰিছিল।
নিজৰ বিৰল প্ৰতিভাৰ বলত কম সময়তে দেশজুৰি ধিং এক্সপ্ৰেছ হিচাপে পৰিচিত হৈ উঠা হিমাই ৩০গৰাকী প্ৰতিভাশালী আৰু প্ৰভাৱশালী যুৱ ভাৰতীয়ৰ মাজত স্থান পোৱাটোত স্বাভাৱিকতে আনন্দিত হৈছে অসমবাসী।