দেশত কোভিডৰ দ্বিতীয় ঢৌৱে সংহাৰৰ সৃষ্টি কৰাৰ সময়তে অসমতো কোভিডৰ সংহাৰ বৃদ্ধি পাইছে।
এনে সময়তে আজি নৱ নিযুক্ত স্বাস্থ্য মন্ত্ৰী কেশৱ মহন্তই গুৱাহাটীৰ আজাৰস্থিত গিৰিজানন্দ চৌধুৰী ইনষ্টিটিউট অৱ মেনেজমেণ্ট এণ্ড টেকন’ল’জি (GIMT) ত স্থাপন কৰা কোভিড কেয়াৰ চেণ্টাৰ পৰিদৰ্শন কৰে।
কোভিড ৰোগীৰ বাবে ৭০০ খন বিচনাৰ ব্যৱ্স্থা থকা GIMT ৰ কোভিড কেয়াৰ চেণ্টাৰটো পৰিদৰ্শন কৰি স্বাস্থ্যমন্ত্ৰী কেশৱ মহন্তই সন্তুষ্টি ব্যক্ত কৰা পৰিলক্ষিত হয়।
উল্লেখ্য শ্ৰীমন্ত শংকৰ একাডেমী( SSA)ছোচাইটিৰ অধীনত পৰিচালিত ৰাজ্যৰ অগ্ৰণী শৈক্ষিক প্ৰতিষ্ঠান আজাৰাস্থিত GIMTত ৰাজ্যত কোভিডৰ প্ৰথমটো ঢৌ অহাৰ সময়তো,অৰ্থাৎ যোৱা বছৰতো কোভিড কেয়াৰ চেণ্টাৰ স্থাপন কৰা হৈছিল।
GIMT ৰ কোভিড কেয়াৰ চেণ্টাৰ পৰিদৰ্শন কৰাৰ পূৰ্বে স্বাস্থ্যমন্ত্ৰী কেশৱ মহ্ন্তই গুৱাহাটী চিকিৎসা মহাবিদ্যালয় চিকিৎসালয়লৈ গৈ কোভিড ব্যৱস্থাপনাৰ বুজ লয়।
মন্ত্ৰীগৰাকীয়ে চিকিৎসা মহাবিদ্যালয় চিকিৎসালয় খনৰ শীৰ্ষ বিষয়াবৰ্গৰে সৈতে কোভিড ৰোগীৰ চিকিৎসা সম্পৰ্কে এক আলোচনাতো মিলিত হয়।
তেওঁ চিকিৎসালয় খনৰ বিষয়াসকলক কোভিড ৰোগীৰ দ্ৰুত চিকিৎসা নিশ্চিত কৰিবলৈ নিৰ্দেশ দিয়ে।
স্বাস্থ্যমন্ত্ৰীগৰাকীয়ে আজি মহেন্দ্ৰ মোহন চৌধুৰী চিকিৎসালয়,জালুকবাৰীস্থিত চৰকাৰী আয়ুৰ্বেদিক মহাবিদ্যালয় চিকিৎসালয়,কাঁহিকুছিৰ কৃষি বিজ্ঞান কেন্দ্ৰত স্থাপন কৰা কোভিড কেয়াৰ চেণ্টাৰো পৰিদৰ্শন কৰে।
তেওঁ গুৱাহাটী চিকিৎসা মহাবিদ্যালয় চিকিৎসালয় আৰু মহেন্দ্ৰ মোহন চৌধুৰী চিকিৎসালয়ত কোভিড ৰোগীৰ বাবে অহা ২৫ দিনৰ ভিতৰত নতুনকৈ ২০০ খন আইচিইউ বিচনাৰ ব্যৱস্থা কৰিবলৈ নিৰ্দেশ দিয়ে।
উল্লেখ্য স্বাস্থ্যমন্ত্ৰী হিচাবে নিযুক্ত হোৱাৰ পিছতে মন্ত্ৰী কেশৱ মহ্ন্তই কোভিড পৰিস্থিতি নিয়ন্ত্ৰণৰ বাবে দেখুওৱা এনে তৎপৰতাক ৰাইজে একেমুখে শলাগিছে।
স্বাস্থ্যমন্ত্ৰীগৰাকীৰ এনে তৎপৰতাই ৰাজ্যবাসীক কাল কোভিডৰ পৰা ৰক্ষা কৰিব পাৰিব বুলি সকলোৱে আশা ব্যক্ত কৰিছে।
