সমগ্ৰ ৰাজ্যতে আজি সদৌ অসম ছাত্ৰ সন্থা আৰু ২৮ টা জনগোষ্ঠীয় সংগঠনৰ আহ্বানত জাতি ধ্বংসী নাগৰিকত্ব সংশোধনী বিধেয়ক ২০১৬ বাতিলৰ দাবীত জোঁৰ সমদল কাৰ্যসূচী ৰূপায়ণ কৰা হয়।
শিৱসাগৰ :
আজি সন্ধিয়া ৫.৩০ বজাত নগৰৰ ব’ৰ্ডিং খেল পথাৰৰ পৰা আছুসহ ২৮ জনগোষ্ঠীয় সংগঠনৰ ৫ শতাধিক প্ৰতিনিধিয়ে হাতত জোঁৰ লৈ নগৰৰ মাজমজিয়াত সমদল কৰে। ‘বিজেপি গ’ বেক, সৰ্বানন্দ সোণোৱাল মুৰ্দাবাদ, নাগৰিকত্ব সংশোধনী বিধেয়ক বাতিল কৰক, বাংলাদেশী হুঁচিয়াৰ, জাতি মাটি ভেটিৰ কথা কোৱা বিজেপি চৰকাৰ হুঁচিয়াৰ’ আদি প্ৰতিবাদী শ্ল’গানেৰে উত্তাল প্ৰতিবাদ সাব্যস্ত কৰে।ড়
বিশ্বনাথ :
আজি সন্ধিয়া নাগৰিকত্ব সংশোধনী বিধেয়ক ২০১৬ বাতিলৰ দাবীত বিশ্বনাথৰ ৰাজপথত প্ৰায় ৭০০ প্ৰতিবাদকাৰীয়ে হাতত জোঁৰ লৈ বিশ্বনাথৰ আকাশ-বতাহ কঁপাই তোলে। এই প্ৰতিবাদী কাৰ্যসূচীত বিশ্বনাথ চাৰিআলি আঞ্চলিক ছাত্ৰ সন্থা, পাভৈ আঞ্চলিক ছাত্ৰ সন্থাৰ উদ্যোগত সদৌ অসম গৰীয়া মৰীয়া দেশী জাতীয় পৰিষদসহ ২৮ জনগোষ্ঠীয় সংগঠনে প্ৰতিবাদী শ্ল’গানেৰে বিশ্বনাথৰ ৰাজপথ কঁপাই তোলে।
মাৰ্ঘেৰিটা :
মাৰ্ঘেৰিটাটো বিভিন্ন জাতি-জনগোষ্ঠীয় দল-সংগঠনৰ সহযোগত আছুৱে এক বিশাল জোঁৰ সমদল কাৰ্যসূচী ৰূপায়ণ কৰে।
জোঁৰ সমদল উলিয়াই নাগৰিকত্ব সংশোধনী বিধেয়কখন শীঘ্ৰে বাতিলৰ দাবী জনাই মাৰ্ঘেৰিটা আঞ্চলিক ছাত্ৰ সন্থাৰ সভাপতি প্ৰশান্ত গগৈয়ে জাতীয় নায়ক সৰ্বানন্দ সোণোৱালক বদন আখ্যা দিবলৈ বেছি সময় নালাগিব বুলি স্পষ্ট কৰি দিয়ে।
গৌৰীসাগৰ :
নাগৰিকত্ব বিধেয়ক বাতিলৰ দাবীত আজি সন্ধিয়া হাতীঘূলি আঞ্চলিক ছাত্ৰ সন্থা আৰু গৌৰীসাগৰ আঞ্চলিক ছাত্ৰ সন্থাই পৃথকে পৃথকে জোঁৰ সমদল কাৰ্যসূচী হাতত লয়।
হাতীঘূলি আঞ্চিলক ছাত্ৰ সন্থা আৰু গৌৰীসাগৰ আঞ্চলিক ছাত্ৰ সন্থাই পৃথকে পৃথকে প্ৰায় ২ ঘণ্টা সময় ধৰি নাগৰিকত্ব সংশোধনী বিধেয়ক বাতিলৰ দাবীত প্ৰতিবাদী শ্ল’গানেৰে ৰাজপথ কঁপাই তোলে।
বৰপেটা :
বৰপেটাতো নাগৰিকত্ব সংশোধনী বিধেয়ক বাতিলৰ দাবীত বৰপেটা আঞ্চলিক ছাত্ৰ সন্থাৰ সহযোগত জোঁৰ সমদল কাৰ্যসূচী ৰূপায়ণ কৰা হয়।
প্ৰতিবাদকাৰীসকলে ‘কেন্দ্ৰীয় চৰকাৰ হায় হায়, নাগৰিকত্ব বিধেয়ক বাতিল কৰক, অসম চুক্তি অৱমাননা কৰা নচলিব’ আদি প্ৰতিবাদী শ্ল’গানাৰে ৰাজপথ কঁপাই তোলে।
তেজপুৰ :
সদৌ অসম ছাত্ৰ সন্থাৰ আহ্বান মৰ্মে আজি সন্ধ্যা বালিপৰা আঞ্চলিক ছাত্ৰ সন্থা, অসম সেনা আৰু উন্নতি সভাৰ উদ্যোগত ২৮ টাকৈ জাতীয়-জনগোষ্ঠীয় সংগঠনৰ সহযোগত কেইবাশতাধিক প্ৰতিবাদকাৰীয়ে হাতত জোঁৰ সমদল উলিয়াই প্ৰতিবাদ সাব্যস্ত কৰে।