নগাঁও জিলাৰ চামগুৰি আৰক্ষী থানাৰ অন্তৰ্গত সোনাৰিবালি, গটঙা, লাওখোৱা আদি অঞ্চলত বন্ধ সমৰ্থকে পালন কৰা চূড়ান্ত বিক্ষোভ কাৰ্যসূচীত এক উত্তেজনাময় পৰিস্থিতিৰ সৃষ্টি হয় ।
প্ৰাপ্ত তথ্য মতে নগাঁও জিলাৰ চামগুৰিৰ সোণাৰিবালিত আজি পুৱাৰে পৰা বন্ধ সমৰ্থকে টায়াৰ জ্বলাই ৩৭ নং ৰাষ্ট্ৰীয় ঘাইপথ অবৰোধ কৰাৰ লগতে গুণোৎসৱৰ বাবে অহা বহু সংখ্যক শিক্ষক-কৰ্মচাৰীক পথতে আবদ্ধ কৰি ৰাখে।
আনহাতে বন্ধ সমৰ্থকৰ একাংশই ৩৭ নং ৰাষ্ট্ৰীয় ঘাই পথতে তেজপুৰৰ পৰা গুৱাহাটী অভিমুখী এ এছ টি চি বাছখন ভাঙি লণ্ডভণ্ড কৰে। ফলত বাছখনৰ দুগৰাকীকৈ মহিলা যাত্ৰী গুৰুতৰভাৱে আহত হয়।
ইফালে ৰঙাগড়াত বন্ধ সমৰ্থকে কৰা শিলাবৰ্ষণত এটি প্ৰায় দুবছৰীয়া শিশু গুৰুতৰভাৱে আহত হয়। ফলত ততাতৈয়াকৈ জৰুৰী চিকিৎসাৰ বাবে শিশুটিক জখলাবন্ধা অসামৰিক চিকিৎসালয়লৈ প্ৰেৰণ কৰা হয়।
একেদৰে যোৰহাটৰ পৰা গুৱাহাটী অভিমুখী এ এছ ০১ ডি চি ৯৯৯৯ নম্বৰৰ শিৱানী নামৰ ব্যক্তিগত চুপাৰখনৰো সন্মুখৰ গ্লাছ ভাঙি ব্যাপক ক্ষতি সাধন কৰে।
শতাধিক মটৰচাইকেল লৈ অহা একাংশ বন্ধ সমৰ্থকে চামগুৰিৰ লাওখোৱা আৰু শান্তি বজাৰৰ দৈনিক বজাৰৰ দোকান-পোহাৰ দাবী ধমকিৰে বন্ধ কৰি দিয়ে বুলি জানিব পৰা গৈছে। আনকি বন্ধ সমৰ্থকৰ উদ্ভণ্ডালিৰ সন্মুখত আৰক্ষী প্ৰশাসনো নিৰ্বিকাৰ হৈ পৰা পৰিলক্ষিত হয়।
ইফালে বিয়লিৰ ভাগত চামগুৰি সোণাৰিবালি, গটঙাৰ লগতে আন কেবাঠাইৰ পৰা প্ৰায় ২৬ জনকৈ বন্ধ সমৰ্থকক চামগুৰি আৰক্ষীৰ লগতে নগাঁও জিলাৰ অতিৰিক্ত আৰক্ষী অধীক্ষকসহ কলিয়াবৰৰ মহকুমা আৰক্ষী বিষয়া গৰাকীৰ নেতৃত্বত আটক কৰিবলৈ সক্ষম হয়।
বাতৰি লিখা সময়লৈকে আটকাধীন লোক কেইজনক চামগুৰি আৰক্ষী থানাত সোধপোছ কৰি আছে যদিও একাংশ লোকে আটকাধীন ২৬ জন লোকৰ মকুলৰি অপেক্ষাত চামগুৰি থানা চৌহদত ভিৰ কৰা পৰিলক্ষিত হৈছে।
