ভূমিকম্পৰ ফলত বিধ্বস্ত হৈ পৰিছে কলম্বিয়া। কেলি, পেৰেইৰা, কুইবডো — তিনিখন ডাঙৰ চহৰ — প্ৰায় ধ্বংসাৱশেষত পৰিণত হৈছে। এই পৰ্যন্ত কমেও ১১১জন লোকৰ মৃত্যু হোৱা বুলি জানিব পৰা গৈছে। বহু লোক ধ্বংসাৱশেষৰ তলত আবদ্ধ হৈ আছে। তেওঁলোকৰ উদ্ধাৰ অভিযান চলি আছে। ইফালে কলম্বিয়াৰ ৰাষ্ট্ৰপতি এবেলাৰ্ডো ডি লা এস্পেৰান্জাই সোমবাৰে নিশা সমগ্ৰ দেশতে জৰুৰীকালীন অৱস্থা ঘোষণা কৰে।
সোমবাৰে পুৱা ৭:৩৪ বজাত কলম্বিয়াত ভয়ংকৰ ভূমিকম্পই কঁপাই তুলিছিল। ৰিখটাৰ স্কেলত এই ভূমিকম্পৰ প্ৰাবল্য আছিল ৭.৪। ভূমিকম্পৰ কেন্দ্ৰবিন্দু আছিল চোকো প্ৰদেশৰ ছান জোছ ডেল পালমাৰ। মাত্ৰ তিনিদিন পূৰ্বে ৰাষ্ট্ৰপতিৰ আসনত বহিছিল এস্প্ৰিয়াল্লা। ৰাজধানী বগোটাৰ পৰা তেওঁ কয় যে চৰকাৰে জীৱন ৰক্ষা, ভুক্তভোগীৰ কাষত থিয় দিয়া আৰু আৰ্তজনৰ প্ৰতিটো অঞ্চললৈ সাহায্য প্ৰদানৰ বাবে অক্লান্তভাৱে কাম কৰি আছে।
কলম্বিয়াৰ তৃতীয় বৃহত্তম চহৰ কেলিত কমেও ২০টা বৃহৎ অট্টালিকা ভাঙি পৰিছে। বহু লোক ধ্বংসাৱশেষৰ তলত আবদ্ধ হৈ আছে বুলি মহানগৰীৰ মেয়ৰ আলেজান্দ্ৰ’ আডাৰে জনায়। চোকোৰ ৰাজ্যপালগৰাকীয়ে ব্যাপক ক্ষতিৰ আশংকা প্ৰকাশ কৰিছে। কুইবডোৰ সমাজকৰ্মী লুইছ গ্ৰেগ’ৰিয়া মৰেনোৱে কয় যে, “আমি সকলোৱে বিধ্বস্ত হৈছো। মৃত্যুৰ সংখ্যা হুৰাহুৰে বৃদ্ধি পাইছে। বহু লোক আহত হৈছে। কিন্তু বেছিভাগ লোক সন্ধানহীন হৈ আছে।”
ইকুৱেডৰ, পানামা আৰু ভেনিজুৱেলাতো কম্পন অনুভুত হৈছে। পশ্চিম কলম্বিয়াৰ ছটা সৰু বিমানবন্দৰৰ সেৱা সাময়িকভাৱে বন্ধ কৰি দিয়া হৈছে। কেইবাখনো ফুটবল খেলো স্থগিত ৰখা হৈছে।
আমেৰিকাই ভূমিকম্পৰ পৰিস্থিতি নিৰীক্ষণ কৰি আছে বুলি বিবৃতি দি বিদেশ সচিব মাৰ্কো ৰুবিঅ’ই ছ’চিয়েল মিডিয়াত লিখিছে, “কলম্বিয়া এক প্ৰবল ভূমিকম্পই বিধ্বস্ত হৈছে। আমি সমগ্ৰ পৰিস্থিতি নিৰীক্ষণ কৰি আছো। আমেৰিকা কলম্বিয়াৰ জনসাধাৰণৰ কাষত থিয় দিবলৈ সাজু।”
ইউৰোপীয় ইউনিয়নৰ মুৰব্বী উৰ্চুলা ভন ডেৰ লেয়েনেও কলম্বিয়াক সাহায্যৰ প্ৰতিশ্ৰুতি দিছে। ইজৰাইল, মেক্সিকো, ইকুৱেডৰ আৰু ফ্ৰান্সেও সাহায্যৰ হাত আগবঢ়াইছে।
