অপাৰেচন সিন্দুৰৰ পাছত ভাৰত-পাকিস্তানৰ সম্পৰ্কৰ উত্তেজনাই সীমান্তৰ সিপাৰৰ বহু পৰিয়ালৰ ব্যক্তিগত জীৱনতো প্ৰভাৱ পেলাইছিল। ৱাঘাহ-আটাৰী সীমান্তৰ মাজেৰে যাতায়ত বন্ধ কৰি দিয়া হৈছিল। ভিছাৰ জটিলতাৰ বাবে বহু বিয়াৰ পৰিকল্পনা আবদ্ধ হৈ পৰিছিল। সেই পৰিস্থিতিত পাকিস্তানৰ সিন্ধ প্ৰদেশৰ কমেও ১৫০ গৰাকী যুৱতীয়ে বিকল্প পথেৰে ভাৰতত উপস্থিত হ’ল। তেওঁলোক ভাৰতীয় যুৱকৰ সৈতে বিবাহপাশত আবদ্ধ হ’ব।
নাগপুৰৰ সিন্ধী সম্প্ৰদায়ৰ প্ৰতিনিধি ৰাজেশ ঝাম্বিয়াই কয় যে নাগপুৰ, ৰায়পুৰ, যোধপুৰ, পুনেকে ধৰি ভাৰতৰ বিভিন্ন চহৰত প্ৰায় ১৫০ গৰাকী যুৱতীৰ বিবাহৰ কথা আছিল। সীমান্ত বন্ধ হোৱাৰ বাবে তেওঁলোক বহু সময় পাকিস্তানত আবদ্ধ হৈ আছিল। পিছলৈ তেওঁলোকৰ পৰিয়ালে বিকল্প পথেৰে ভাৰতলৈ অহাৰ চেষ্টা আৰম্ভ কৰে। এই পৰিস্থিতিত পাকিস্তানৰ সিন্ধ প্ৰদেশৰ ঘোটকী অঞ্চলৰ শাদানি দৰবাৰে গুৰুত্বপূৰ্ণ ভূমিকা পালন কৰিছিল।
ধৰ্মীয় অনুষ্ঠানটোৰ মুৰব্বী সন্ত যুধিষ্ঠিৰলাল শাদানীৰ উদ্যোগত বিবাহৰ বাবে ভাৰতলৈ আহিব বিচৰা যুৱতী আৰু তেওঁলোকৰ পৰিয়ালৰ তালিকা ভাৰতীয় কৰ্তৃপক্ষলৈ প্ৰেৰণ কৰা হয়। তেওঁলোকক ভিছা প্ৰদানৰ বাবেও আবেদন কৰা হৈছিল।
ইয়াৰ পিছত কেন্দ্ৰীয় গৃহ মন্ত্ৰালয়ে অনুমতি দিয়ে। অৱশ্যে ৱাঘাহ-আটাৰী সীমান্তৰে পোনপটীয়াকৈ নহয়, বিমানযোগে তৃতীয় দেশৰ মাজেৰে ভাৰতত প্ৰৱেশ কৰিবলৈ দিয়া হৈছিল। একেদৰে যোৱা এপ্ৰিলৰ পৰা প্ৰায় ১৫০ গৰাকী পাকিস্তানী যুৱতী আৰু তেওঁলোকৰ পৰিয়ালৰ সদস্যই ডুবাই, ওমান, শ্ৰীলংকা, বাংলাদেশকে ধৰি বিভিন্ন দেশৰ মাজেৰে ট্ৰেনজিট পথ ব্যৱহাৰ কৰি ভাৰতত উপস্থিত হৈছে।
এই যাত্ৰা আছিল দীঘলীয়া আৰু ব্যয়বহুল। কিন্তু বহু পৰিয়ালৰ বাবে মূল লক্ষ্য আছিল অৱশেষত তেওঁলোকৰ দীৰ্ঘদিন ধৰি আৱদ্ধ হৈ পৰা বিবাহ সম্পূৰ্ণ কৰা। ইতিমধ্যে নাগপুৰকে ধৰি ভাৰতৰ কেইবাখনো চহৰত এই যুৱতীসকলৰ বিবাহৰ ব্যৱস্থা কৰা হৈছে।
ৰাজেশ ঝাম্বিয়াই কয় যে আৰু প্ৰায় ৩০০ পাকিস্তানী যুৱতী এতিয়াও ভাৰতলৈ আহিবলৈ অপেক্ষা কৰি আছে। তেওঁলোকক ভিছা প্ৰদানৰ বাবেও আবেদন কৰা হৈছে।
জম্মু-কাশ্মীৰত পেহেলগাম আক্ৰমণৰ পিছত ভাৰতে ২০২৫ চনৰ মে’ মাহত ‘অপাৰেচন সিন্দুৰ’ আৰম্ভ কৰিছিল।তাৰ পিছত দুয়োখন দেশৰ মাজত কূটনৈতিক উত্তেজনা বৃদ্ধি পায় আৰু ৱাঘাহ-আটাৰী সীমান্তৰে যাত্ৰা বন্ধ কৰি দিয়া হয়। ফলত বিয়াৰ বাবে ভাৰতলৈ আহিবলৈ অপেক্ষা কৰি থকা বহু পাকিস্তানী সিন্ধী যুৱতীৰ ভৱিষ্যত অনিশ্চিত হৈ পৰিল।
ভাৰত-পাকিস্তানৰ সম্পৰ্ক এতিয়াও উত্তেজনাপূৰ্ণ হৈ থকাৰ সময়তে এই ঘটনাই সীমান্তৰ ৰাজনৈতিক বাস্তৱতাৰ উপৰিও দুয়োখন দেশৰ জনসাধাৰণৰ পাৰিবাৰিক আৰু সামাজিক সম্পৰ্কৰ আন এটা দিশ পোহৰলৈ আনিছে। ৰাজনৈতিক উত্তেজনাৰ মাজতো বহু পৰিয়ালে বিবাহৰ দৰে ব্যক্তিগত সম্পৰ্ক গঢ়ি তুলিবলৈ তৃতীয় দেশৰ পথ বাছি লৈছে।
