ক্ৰিমিয়াৰ এটা ঠেক পাহাৰত দুৰ্ঘটনাগ্ৰস্ত হয় ৰাছিয়াৰ সামৰিক এন-২৬ কাৰ্গো বিমান। এই দুৰ্ঘটনাত ২৯ জন লোকৰ মৃত্যু হৈছে। ইয়াৰ ভিতৰত পাইলট আৰু ৬ জন ক্ৰু মেম্বাৰ আছে। বাকীসকল যাত্ৰী।
বুধবাৰে পুৱা ৰাছিয়াৰ সংবাদ সংস্থা TASS য়ে প্ৰকাশ কৰা অনুসৰি মঙলবাৰে সন্ধিয়া ৬ বজাত (মস্কোৰ সময় অনুসৰি) বিমানখনৰ সৈতে যোগাযোগ হেৰাই গৈছিল। যান্ত্ৰিক বিজুতিৰ বাবেই এই বিপৰ্যয়ৰ সৃষ্টি হোৱা বুলি অনুমান কৰা হৈছে।
দুৰ্ঘটনাস্থলী চিনাক্ত কৰা হৈছে যদিও ৰাছিয়াৰ সেনাই এতিয়াও কোনো বিতং তথ্য প্ৰদান কৰা নাই। বিমানখনত কিমানজন যাত্ৰী আছিল সেয়াও জানিব পৰা হোৱা নাই।
অৱশ্যে এটা সূত্ৰই দাবী কৰিছে যে বিমানখনত কোনো মিছাইল বা ড্ৰ’নে আক্ৰমণ কৰা নাছিল। আনকি কোনো চৰাইৰ সৈতে সংঘৰ্ষৰ বাবেও এই দুৰ্ঘটনা সংঘটিত হোৱা নাই। দুৰ্ঘটনাৰ কাৰণ জানিবলৈ সামৰিক আয়োগৰ সদস্যসকলে দুৰ্ঘটনাস্থলীলৈ ৰাওনা হৈছে।
এন-২৬ বিমানত সৰ্বাধিক ৪০ জন যাত্ৰী আৰু সামগ্ৰী কঢ়িয়াব পাৰি। এই বিমানখন ১৯৬০ চনৰ পৰা সামৰিক আৰু অসামৰিক পৰিবহণৰ বাবে ব্যৱহাৰ কৰিবলৈ আৰম্ভ কৰা হয়। ৰাছিয়াৰ এই সামৰিক বিমানখনে কম আৰু মজলীয়া দূৰত্ব অতিক্ৰম কৰিব পাৰে। ইয়াৰ পূৰ্বেও কেইবাটাও দুৰ্ঘটনা সংঘটিত হৈছিল ৰাছিয়াৰ সামৰিক বিমানৰ। কেতিয়াবা প্ৰশিক্ষণৰ সময়ত, কেতিয়াবা টহলৰ সময়ত কেইবাটাও দুৰ্ঘটনা সংঘটিত হৈছে।
এক সূত্ৰৰ মতে, ইয়াৰ পূৰ্বে ইউক্ৰেইন, দক্ষিণ চুডান আৰু আইভৰি কোষ্টত এন-২৬ বিমান দুৰ্ঘটনাগ্ৰস্ত হৈছিল। সেই দুৰ্ঘটনাত বহু লোকৰ মৃত্যু হৈছিল। ২০২২ চনত ইউক্ৰেইনৰ দক্ষিণ-পূব অঞ্চলৰ জাপ’ৰিজিয়া অঞ্চলত এন-২৬ বিমান দুৰ্ঘটনাগ্ৰস্ত হৈছিল। ২০২০ চনত এই এন-২৬ বিমানখন উত্তৰ-পূব ইউক্ৰেইনত প্ৰশিক্ষণৰ সময়ত দুৰ্ঘটনাগ্ৰস্ত হৈছিল আৰু ২৭ জন লোকৰ মৃত্যু হৈছিল।
সেই বছৰতে দক্ষিণ চুডানত বিমান দুৰ্ঘটনাত ৫ জন ৰাছিয়ান নাগৰিককে ধৰি ৮ জন লোকৰ মৃত্যু হয়। ২০১৭ চনত পশ্চিম আফ্ৰিকাৰ আইভৰি কোষ্টত এন-২৬ বিমান দুৰ্ঘটনাত ৪ জন লোকৰ মৃত্যু হৈছিল।
